Bwami bwaLeza nimfulumende yakujulu. Iyoogwisya mfulumende eezi zimwi zyoonse alimwi iyoocita kuti kuyanda kwaLeza kucitwe kujulu amunyika. Makani aambula atalaa Bwami bwaLeza mabotu. Lino-lino Bwami bwaLeza buyoozuzikizya ciyandisyo cabantu cakubaa mfulumende mbotu. Iyoojatanizya bantu boonse bapona munyika.​—Bala Daniele 2:44; Matayo 6:9, 10; 24:14.

Bwami bweeleede kuba amwami. Jehova wakasala Mwanaakwe Jesu Kristo kuti abe Mwami waBwami bwakwe.​—Bala Ciyubunuzyo 11:15.

Yeebela kavidiyo kategwa Bwaami bwaLeza Niinzi?

Mwanaa Leza ngunguwe Mwami weelede nkaambo ulaluzyalo alimwi ukakatila muzintu zibotu. (Matayo 11:28-30) Akambo kakuti uyootonga nyika kali kujulu nkikaako ulaanguzu zyeelede zyakugwasya bantu. Naakabusigwa, wakataanta kaya kujulu, alimwi wakakkala kujanza lyaJehova lyalulyo kalindiinde. (baHebrayo 10:12, 13) Kumamanino, Leza wakamupa nguzu kuti atalike kutonga.​—Bala Daniele 7:13, 14.

Kabunga kayitwa kuti “basalali” kayootonga aJesu kabali kujulu. (Daniele 7:27) Basalali bakutanguna bakasaalwa mbaapostolo baJesu basyomeka. Kusikila lino, Jehova ucilikusala baalumi abanakazi basyomeka, mbuli basalali.  Aabo babusigwa kabalaa mibili yamuuya mbuli Jesu.​—Bala Johane 14:1-3; 1 baKorinto 15:42-44.

Mbangaana bantu biinka kujulu? Jesu wakabaamba kuti “katanga kanini.” (Luka 12:32) Kumamanino banooli 144-000. Bayootonga nyika kabalaa Jesu.​—Bala Ciyubunuzyo 14:1.

Bwami bwaLeza bwakatalika kutonga mumyaka wa 1914. * Mulimu wakutanguna wakacitwaa Jesu kali Mwami wakali wakuwalila aansi Saatani amadaimona aakwe munyika. Saatani wakalutila mpawo wakatalika kweetelezya zintu zibi munyika yoonse. (Ciyubunuzyo 12:7-10, 12) Kuzwa waawo, mapenzi kubantu alikuyungizya loko. Inkondo, nzala, malwazi, alimwi amizuzumo yanyika nzizimwi zya“citondezyo” cakuti lino lino Bwami buyooyeendelezya nyika yoonse.​—Bala Luka 21:7, 10, 11, 31.

Bwami bwaLeza bulikujatanizya bantu biingi kuzwa muzisi zyoonse, kwiinda mumulimu wakukambauka munyika yoonse. Bantu biingi babombe myoyo balikuba balelwa baJesu. Bwami bwaLeza buyoobakwabilila aawo nibutakanyonyoone bweende oobu bwazintu bubi bwanyika. Nkikaako boonse bayanda kujana kuBwami bwaLeza beelede kwiiya kuba balelwa baJesu bamuswiilila.​—Bala Ciyubunuzyo 7:9, 14, 16, 17.

Mukati kamyaka iili 1 000, Bwami buyoozuzikizya makanze aLeza aakumatalikilo kubantu. Nyika yoonse iyooba paradaiso. Mumamanino, Jesu uyoobwedezya Bwami kuli Wisi. (1 baKorinto 15:24-26) Ngwaani nguyanda kuzoomubuzya atalaa Bwami bwaLeza?​—Bala Intembauzyo 37:10, 11, 29.