Josiya wakaba mwaami wachisi chaJuda naakali aminyaka iili 8. Muchiindi eecho, bantu bakali kuchita zintu zyamasalamusi akukomba baleza bakubeja. Chiindi Josiya naakaba aminyaka iili 16, wakayiya nzila iiluleme yakukomba Jehova. Naakaba aminyaka iili 20, wakamwaya zipayililo zyabaleza bakubeja muchisi choonse. Alubo, chiindi naakaba aminyaka iili 26, wakachita mabambe aakuti tempele lyaJehova liyakululwe.

Mupayizi mupati Hilikkiya, wakajana bbuku lyamulawu waJehova mutempele alimwi kulakonzeka kuti bbuku eelyo lyakalembedwe aMusa. Mulembi wamwaami, Safani, wakatola bbuku lyaMulawu kuli Josiya alimwi wakamubalila. Chiindi Josiya naakali kuswiilizya, wakabona kuti bantu bakali kuchita zintu zitayandwi aJehova kwaminyaka myiingi loko. Mwaami Josiya wakabuzya Hilikkiya kuti: ‘Jehova ulitunyemenede. Koya ukaambuule aawe. Jehova uyootubuzya nzitweelede kuchita.’ Jehova wakabuzya musinsimi mukayintu Hulida, kuti: ‘MaJuda bandisiya. Bayoosubulwa, pesi tabakooyoosubulwa muchiindi chakweendelezya kwaJosiya nkaambo wakalibombya.’

Mwaami Josiya naakamvwa makani aaya, wakaya kutempele alimwi wakabungania maJuda boonse. Mpawo wakabalila bantu boonse Mulawu waJehova. Josiya abantu boonse bakasyomezya kuti bakali kuyooswiilila Jehova chamoyo woonse.

 MaJuda bakali baleka kusekelela pobwe lyaPasika kwaminyaka myiingi. Pesi chiindi Josiya naakabala mubbuku lyaMulawu kuti pobwe lyaPasika lyakeelede kuchitwa munyaka amunyaka, wakabuzya bantu boonse kuti: ‘Tuyoochitila Jehova Pasika.’ Kuzwa waawo, Josiya wakatuula zituuzyo zyiingi alimwi wakasala basikwiimba mutempele. Bantu bakachita Pasika, kuzwa waawo bakachita Pobwe Lyazinkwa Zitakwe Bumena kwamazuba ali musanu aabili. Taakwe nikwakachitidwe pobwe lyaPasika lili boobu kuzwa muchiindi chaSamiyele. Josiya wakali kuuyandisya Mulawu waLeza. Ulakuyandisya na kwiiya atala aJehova?