Jesu wakaza anyika kuti azookambawuke makani mabotu aBwaami bwaLeza. Jehova wakapa Jesu muuya uusalala kuti achite malele, zitondeezya nzyayoochita kali Mwaami. Wakali kuponia malwazi asiyene-siyene. Kufumbwa nkwaakabede bantu bachiswa bakali kusika kulinguwe alimwi wakali kubaponia boonse. Boofu bakali kubona, basinke matwi bakali kumvwa, bakatali kweenda bakali kweenda alubo wakali kutanda madimoni. Bamwi bakali kuponesegwa kuti bajata mumpipito wachigogo chakwe. Bantu bakali kutobela Jesu kufumbwa nkwakabede. Nikuba chiindi naakali kuyanda kuba alikke, Jesu taakali kubatanda pe bantu.

Chimwi chiindi, bantu bakeeta umwi mwaalumi wakatali kweenda kumuunzi Jesu nkwaakali kukkala. Pesi mung’anda kwakali bantu biingi zyakuti bakakachilwa kumunjizya. Mpawo bakavumbula kaluli kang’anda akumunjizizya kukaluli. Jesu wakabuzya mwaalumi ooyo kuti: ‘Buka weende.’ Naakakonzya kweenda bantu bakagamba.

Chimwi chiindi Jesu naakali kunjila mumuunzi, wakamvwa baalumi basizipele bali kkumi kaboompolola kuti: ‘Jesu kotugwasya!’ Kuchiindi eecho, basizipele teebakali kuzumizigwa kuswena afwiifwi abantu. Jesu wakabuzya baalumi aabo kuti biinke kutempele nkaambo Mulawu waJehova wakali kwaamba kuti basizipele bakeelede kuchita oobo kuti baponesegwa. Nibakali  munzila bakaponesegwa. Umwi wabasizipele naakabona kuti waponesegwa, wakabweeda kuyoolumba Jesu akulumbayizya Leza. Akati kabasizipele bali kkumi, umwi nguwe wakalumba Jesu.

Ùmwi mukayintu wakali kuchiswa kaminyaka iili 12 alimwi taakali kuyeeyela kuti uzoopona. Wakeendela musule aJesu akujata mumpipito wachigogo chaJesu. Achiindi eecho wakapona. Nizyakachitika eezyo, Jesu wakabuzya kuti: “Ino nguni waampa zyakusama zyangu?” Mukayintu wakayoowa pesi wakaza kunembo akumubuzya kasimpe. Jesu wakamuumbulizya kati: ‘Mwanaangu, koya ube aluumuno.’

Mupati wachikombelo utegwa Jayiro wakakumbila Jesu kuti: ‘Koboola kumuunzi wangu. Kana kangu kasimbi kaamba kufwa.’ Pesi Jesu kachili munzila, kasimbi kakafwa. Jesu naakasika wakajana bantu biingi kudilwe. Jesu wakababuzya kuti: ‘Mutalili, nkaambo ulikoona.’ Wakajata kuboko kwakasimbi mpawo wakati: ‘Kasimbi, buka!’ Kakabuka kakkala alimwi Jesu wakabuzya bazyali bakasimbi kuti bakape chakulya. Ubonaanga bazyali bakwe bakamvwa biyeni?