Johane wakali kukambawuka kati: ‘Kuli muntu mupati kwiinda ndime ulikuza.’ Jesu naakaba aminyaka iili 30, wakazwa kuGalilaya kaya kuMulonga waJordani, ooko Johane nkwaakali kubbabbatizya bantu. Jesu wakali kuyanda kuti Johane amubbabbatizye, pesi Johane wakati: ‘Tandeelede kukubbabbatizya pe. Pesi, nduwe weelede kundibbabbatizya.’ Mpawo Jesu wakabuzya Johane kuti: ‘Jehova uyanda kuti undibbabbatizye.’ Nkinkaako, bakanjila muMulonga waJordani, mpawo Johane wakabbizya Jesu mumaanzi.

Jesu naakazwa kubbabbatizigwa, wakakomba. Kuchiindi eecho, kujulu kwakajulika, alimwi muuya uusalala waLeza wakamuselukila kuli muchiimo chanziba. Mpawo kwakamvwigwa jwi lyaJehova kalizwa kujulu kaliti: “Nduwe Mwanaangu uuyandwa, ndakondwa loko kulinduwe.”

Chiindi Jesu naakatambula muuya uusalala waJehova, wakaba Kristu naa Mesiya. Lino wakali kukonzya kuchita mulimu ngwaakatumwa aJehova kuti awuchite anyika.

Naakazwaa kubbabbatizigwa, Jesu wakayinka kunkanda alimwi wakakkala nkuko kwamazuba aali 40. Naakaboola, wakayinka kuli Johane. Jesu naakalikuza kuli Johane, Johane wakati: ‘Ngooyu Mwanaambelele waLeza ugwisya chibi chanyika.’ Naakambuula majwi aaya, Johane wakali kutondeezya bantu kuti Jesu wakali Mesiya. Ulizi na kuti niinzi chakachitika chiindi Jesu naakali kunkanda? Atubone.