Mweendelezi wachisi chaRoma uutegwa Kkayisara Agusto wakalayilila kuti maJuda boonse babweede kulimbabo kuti bakalembwe. Josefa aMariya bakiinka kuBbetelehemu, nkaambo bamumpuli yaJosefa nkubakali kuzwa. Chiindi eechi Mariya wakali waba afwiifwi kutumbuka.

Nibakasika kuBbetelehemu, bakakkala mubbondo. Kabali mumo, Mariya wakatumbuka. Wakamuputila kabotu mwana akumulazika muchilido chabanyama.

Beembezi bamwi bakali kumilaga mansiku, afwiifwi akuBbetelehemu. Mpawo, mungelo wakalibonia kulimbabo alimwi bakamunikilwa amumuni wabulemu bwaJehova. Beembezi bakayoowa, pesi mungelo wakati: ‘Mutayoowi, ndamweetela makani mabotu, Mesiya  wazyalwa sunu kuBbetelehemu.’ Muchiindi eecho, kujulu kwakalibonia bangelo biingi kabaamba kuti: ‘Akube bulemu kuli-Leza kujulu lyamajulu aalo aansi akube luumuno.’ Mpawo, bangelo bakiinka. Beembezi bakachita biyeni?

Beembezi bakabuzyania kuti: ‘Atufwambaane tuye kuBbetelehemu.’ Bakiinka, mpawo bakajana Josefa aMariya kabali mubbondo amwanaabo mutete.

Bantu boonse bakagamba chiindi nibakamvwa mulumbe wabangelo ngubakabuzya beembezi. Mariya wakayeeyesesya atala amakani ngaakamvwa alimwi taakwe naakaluba pe. Beembezi bakabweeda kubutanga bwabo, kabalumba Jehova atala anzibakabona anzibakamvwa.