Bumwi busiku, Nebbukkadinezari wakalota chiloto chiyoosya. Wakayita baalumi basongo kuti bamuzoomupandulwide chiloto chakwe. Pesi taakwe wakakonzya kumupandulwida. Kumamanino wakiita Daniyele.

Nebbukkadinezari wakabuzya Daniyele kuti: ‘Muchiloto changu ndakabona munsamu. Wakakomena akusika kujulu. Wakaboneka koonse koonse kusikila kumagolelo aanyika. Wakali amatu mabotu amichelo myiingi. Banyama bakali kujana mweenzule munsi lyawo abayuni bakali kukkala mumitabi yawo akuyaka zitendele. Mpawo kwakasika mungelo uuzwa kujulu. Wakoompolola ajwi pati kaamba kuti: “Amugonke oyo munsamu akunyungawula mitabi yawo. Nekubaboobo amuleke chisiko chamiyanda chaangidwe chaanzyo chansimbi amukuba. Moyo wamunsamu ooyo usanduke, utabi moyo wabuntu, pesi ube amoyo wabunyama, mane minyaka iili musanu ayibili imane. Kuchitila kuti bantu boonse bazibe kuti Leza Nguuyendelezya alimwi ulakonzya kupa bwaami kufumbwa ngwayanda.”’

Jehova wakagwasya Daniyele kuziba kuti chiloto eecho chakali kwambaanzi. Daniyele naakaziba chiloto eecho mbuchakali kwaamba, wakayoowa. Mpawo wakati: ‘O Simalelaangu, ndalikubonaanga chiloto eechi chili atala abasinkondonyoko, pesi chaamba atala anduwe. Munsamu nguwakabona kawugonkwa, wiiminina nduwe. Bwaami buyoogwisigwa mumaanza ako, uyoolya masokwe mulusaka mbuli banyama bamusokwe. Pesi mungelo waamba kuti, amuleke chisiko chisyaale amiyanda yacho, zyaamba kuti uyoobweeda lubo achuuno chabwaami.’

Nikwakiinda munyaka, Nebbukkadinezari wakali kulanga muunzi waBbabbiloni kali mung’anda yakwe yamujulu. Wakati: ‘Muunzi ooyu ngundakayaka mupati loko. Manguzu aangu alagambya.’ Naakali kwaamba oobo, jwi lizwa kujulu lyakati: ‘Nebbukkadinezari! Bwaami bwagwisigwa mumaanza ako.’

Muchiindi eecho, Nebbukkadinezari wakasanguna kupenga alimwi wakaba mbuli munyama. Wakazwa mung’anda yakwe yabwaami akuyookkala mulusaka abanyama. Masusu aNebbukkadinezara akalampa  mbuli milimba yasikwaze alimwi maala aakwe akaba mbuli maala atuyuni.

Nikwakiinda minyaka iili musanu ayibili, Nebbukkadinezari wakapona alimwi Jehova wakamubweedezya kuti abe mwaami wakuBbabbiloni. Nebbukkadinezari wakati: ‘Ndalemeka akutembawula Mwaami wakujulu. Ndaziba kuti Jehova nguwe Mweendelezi. Aabo beenda chakulisumpula ulakonzya kubafwiinsya akuti ulakonzya kupa bwaami kumuntu ngwayanda.’