Milimu yaBaapostoli 8:1-40
8 Sawulu lwakwe wakazuminana aakujayigwa kwakwe.
Mubuzuba mbuboobo, mbungano yakali kuJerusalema yakapenzegwa loko alubo basikwiiya boonse bakamwayikila muzilawu zili muJudiya amuSamariya. Baapostoli mbabo abalikke bakasyaala.
2 Pesi bamwi baalumi bayoowa Leza, bakabweza Stefani baakumuzikka alubo bakamulila loko.
3 Nikuba oobo, Sawulu wakasaanguna koombya mbungano. Wakali kunjila ng’anda ang’anda kalikukwenkwelesya baalumi abanakazi kabatola kujele.
4 Pesi aabo bakamwayikide, bakali kuyabweenda munyika kabali kwaambilizya makani mabotu aajwi.
5 Filipi wakakunuka waya mumuunzi waSamariya* alubo wakasaanguna kubakambawukila atala aKkristu.
6 Naakali kwaambuula, bantu boonse bakali kuswiilisisya alubo bakali kubona zigambyo nzyaakali kuchita.
7 Nkaambo bantu biingi bakali aamyuuya mibi, alubo myuuya eeyo yakali kukwiila ajwi pati mpawo yakali kuzwa. Alubo biingi bakayumide mibili abakalemene, bakasilikwa.
8 Nkinkaako, kwakaba kukondwa kupati mumuunzi ooyo.
9 Mumuunzi ooyo, mwakali umwi mwaalumi wakali kutegwa Simoni. Kazitanachitika zintu eezi, mwaalumi ooyu wakali kuchita masalamusi alubo wakali kugambya chisi chaSamariya, kalyaamba kuti ulisumpukide kwiinda bamwi.
10 Bantu boonse, kuzwa kumuniini kusika kumupati, bakali kumuswiilila alubo bakali kwaamba kuti: “Mwaalumi ooyu Manguzu aaLeza Mapati.”
11 Nkinkaako, bantu bakali kumuswiilila nkaambo wakali waba aachiindi kabagambya amasalamusi aakwe.
12 Pesi bantu nibakasyoma Filipi, ooyo wakali kwaambilizya makani mabotu aaBwaami bwaLeza alubo aazina lyaJesu Kkristu, baalumi abanakazi bakali kubbabbatizigwa.
13 Anguwe Simoni wakaba musyomi mpawo naakabbabbatizigwa wakakkalaamwi aFilipi. Mwaalumi ooyu wakali kugamba naakali kubona zitondeezyo amilimu mipati iigambya njaakali kuchita Filipi.
14 Baapostoli bakali kuJerusalema nibakamvwa kuti bantu bakuSamariya batambula jwi lyaLeza, bakabatumina Petro aJohane.
15 Mpawo Petro aJohane bakakunuka kabaya nkuko, mpawo bakaakubakombela kuti bajane muuya uusalala,
16 nkaambo teewakalinasika naaba aali umwi wabo, pesi bakali babbabbatizigwa muzina lyaMwaami Jesu kupela.
17 Bakababikka maboko mpawo bakasaanguna kutambula muuya uusalala.
18 Simoni naakabona kuti bantu bakali kutambula muuya uusalala kwiinda mukubikkwa maboko abaapostoli, wakayanda kubapa mali,
19 kati: “Amundipe andime manguzu aaya, kuchitila kuti kufumbwa ngundinoobikka maboko, atambule muuya uusalala.”
20 Pesi Petro wakamubuzya kuti: “Nsiliva yako ayifwaamwi anduwe, nkaambo ubonaanga ulakonzya kuula chipo chitabbadalisigwi chaLeza amali.
21 Tukwe chipanzi pe nichiba chaabilo mumakani aaya, nkaambo moyo wako tawululeme pe mumeso aaLeza.
22 Nkinkaako, sanduka kububi bwako oobu alubo ukombelezye Jehova* kuchitila kuti, kuti kazikonzeka makanze mabi aali mumoyo wako alekelelwe,
23 nkaambo ndabona kuti ulimusamu uulula* alubo ulimuzike wazintu zitaluleme.”
24 Mpawo Simoni wakati: “Amundikombelezezye munkombyo kuli Jehova* kuchitila kuti zintu zyoonse eezi nzimwaamba zitandisikili pe.”
25 Nkinkaako, nibakamana kupa bukamboni buzwide akwaambuula atala ajwi lyaJehova,* bakabweeda kuJerusalema, kabayabwaambilizya makani mabotu mumyuunzi myiingi yamaSamariya.
26 Nikuba oobo, ngilozi yaJehova* yakabuzya Filipi kuti: “Nyampuka uye kubbazu lyakumusanza, kumugwagwa uuzwa kuJerusalema kuya kuGaza.” (Ooyu mugwagwa wamunkanda.)
27 Naakamvwa oobo, wakanyampuka weenda. Mpawo wakabona nkume-nkume yaku-Itopiya yakali* aachuuno chipati mubweendelezi bwaKkandesi, mwaami wachanakazi waku-Itopiya. Zintu zyoonse zyamung’anda yamwaami ooyo wachanakazi, zyakali mumaboko aakwe. Alubo wakali waya kukukomba kuJerusalema.
28 Mpawo wakalikkede mungolo yakwe kalikubweeda kulimbabo alubo wakali kulibalila aajulu bbuku lyamupolofita Isaya.
29 Mpawo muuya wakabuzya Filipi kuti: “Yinka kungolo iilya.”
30 Filipi wakachijaana kalikumbali aangolo eeyo alubo wakamumvwa kalikububalila aajulu bupolofita bwa-Isaya. Mpawo wakati: “Ulikuzimvwisisisya na nzulikubala?”
31 Mwaalumi ooyo wakati: “Nga ndilazimvwisisisya biyeni kunze kwakuti umwi muntu wandigwasya?” Nkinkaako, wakakumbila Filipi kuti anjile akkale aanguwe.
32 Chipanzi chaLugwalo nchaakali kubala chakali kuti: “Mbuli mbelele, wakatolwa kukujayigwa, alubo mbuli mwanaambelele uutalili nalikugelwa boya, anguwe tawujuli pe mulomo wakwe.
33 Naakali kufubaazigwa, taakabetekwa munzila iiluleme. Ngwani utazoowambe makani aali atala azyalani lyakwe? Nkaambo tachiwo pe aanyika.”
34 Nkume-nkume eeyo yakati kuli Filipi: “lnche kaka ndibuzye, mupolofita ooyu wakali kwaambani? Wakali kulyaamba na naakuti wakali kwaamba umwi muntu?”
35 Mpawo Filipi wakasaanguna kwaambuula, alubo kasaangunina alugwalo nduloolu, wakamubuzya makani mabotu aali atala aJesu.
36 Nibakali kuyabweenda mumugwagwa, bakasika aakali maanzi, mpawo nkume-nkume eeyo yakati: “Bona, ngaya maanzi, niinzi chindikachizya kubbabbatizigwa?”
37 *——
38 Mpawo wakayimikizya ngolo, mpawo we aFilipi bakaseluka, banjila mumaanzi, mpawo Filipi wakamubbabbatizya.
39 Nibakazwa mumaanzi, muuya waJehova* wakazulwida Filipi akumutola kumbi alubo nkume-nkume eeyo teeyakazoomubona lubo pe, pesi yakayinkilila kunembo alweendo lwayo kayilikubotelwa.
40 Nikuba oobo, Filipi wakalibona kali waba ku-Ashidodi, alubo wakayinda muchilawu eecho kayabwaambilizya makani mabotu mumyuunzi yoonse kusikila naakasika kuKkesariya.
Makani Aamunsi
^ Amwi malembe ati, “uuli muSamariya.”
^ Langa Bupanduluzi Bwamabala.
^ MuchiGrikki, “ulindulwe iilula.”
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ MuchiGrikki, “muzibe waku-Itopiya wakali.” Langa Bupanduluzi Bwamabala, “Muzibe.”
^ Vesi eeyi tayijaniki pe mulaamwi malembe aachiindi alubo kuyeeyelwa kuti tayili chipanzi chaMagwalo aakazulwidwa aamuuya.
^ Langa Bupanduluzi Bwamabala.
