Milimu yaBaapostoli 21:1-40
21 Nitwakaanzaana ambabo myoyo kayichisa, twakatanta bwaato, twalulama kuKkosi. Mubuzuba bwakatobela twakasika kuRodi mpawo nitwakazwa nkukooko, twakasika kuPatara.
2 Nitwakajana bwaato bwakali kuzubuka kabuya kuFonikke, twakatanta bwaato oobo mpawo twakeenda.
3 Nitwakasika mputwakalangana aakasuwa kaKkupro, twakakasiya kuchimweensi mpawo twakaya kuSiriya twaakuseluka kuTire, ooko bwaato nkubwakeelede kuselusya zintu.
4 Twakayanduula basikwiiya mpawo twakabajana alubo twakakkala nkukooko kwamazuba aali musanu aabili. Pesi kabazulwidwa aamuuya, bakaliswini kubuzya Pawulu kuti atayinki pe kuJerusalema.
5 Chiindi chesu nichakakkwana, twakazwa mpawo twakalusaanguna lubo lweendo lwesu, pesi boonse, banakazi abana bakatusindikila kusikila nitwakazwa aanze aamuunzi. Nitwakasika kumbali aalwizi, twakafugama twakomba,
6 mpawo twakalaya. Twakatanta bwaato mpawo bo bakabweeda kumyuunzi yabo.
7 Mpawo twakamaninsya lweendo lwesu lwamulwizi nitwakasika kuTolemayi katuzwa kuTire mpawo twakajuzya bakombima alubo twakakkala ambabo kwabuzuba bumwi.
8 Mubuzuba bwakatobela, twakazwa nkukooko mpawo twakasika kuKkesariya mpawo twakanjila mung’anda yaFilipi mukambawusi, ooyo wakali umwi wabaalumi bali musanu ababili mpawo twakakkala anguwe.
9 Mwaalumi ooyu wakali aabana basimbi bane bakatakwetwe* bakali kupolofita.
10 Pesi nitwakakkala nkukooko kwamazuba, mupolofita uutegwa Agabbasi wakakunuka kazwa kuJudiya.
11 Mpawo wakasika kulindiswe, wabweza bbanti lyaPawulu, walyaanga kumawulu akumaboko mpawo wakati: “Muuya uusalala waamba kuti, ‘Muntu uulaabbanti eeli, uzoowangwa mbuboobu amaJuda kuJerusalema alubo bazoomutola kubantu bazisi.’”
12 Nitwakamvwa makani aaya, iswe abamwi bakaliwo, twakasaanguna kumukombelezya kuti atatanti kaya kuJerusalema.
13 Mpawo Pawulu wakati: “Nkamboonzi nimulikulila, akundimana manguzu? Mutakataazikani pe, tandilibambilide kusungwa kupela kuJerusalema, pesi akufwa akaambo kazina lyaMwaami Jesu.”
14 Nitwakabona kuti twakachilwa kumuchincha muzeezo, twakaleka kumukazya* mpawo twakati: “Kuyanda kwaJehova* akuchitike.”
15 Naakayinda mazuba aayo, twakalibambila lweendo lwesu, mpawo twakanyampuka twaya kuJerusalema.
16 Bamwi basikwiiya bakuKkesariya bakayinka aandiswe, batutola kung’anda yaMunasoni wakuKkupro, ooyo wakali umwi wabasikwiiya bakusaanguna. Mpawo twakakkala mung’anda yakwe.
17 Nitwakasika kuJerusalema, bakombima bakatutambula kababotelwa.
18 Pesi mubuzuba bwakatobela, Pawulu wakayinkaamwi andiswe kuli Jakkobo alubo baalu boonse bakaliwo.
19 Wakabajuzya mpawo wakasaanguna kubabuzya buzwide atala azintu Leza nzyaakachita kubantu bazisi kwiinda mumulimu wakwe.
20 Nibakamvwa zintu eezi, bakasaanguna kulumbayizya Leza pesi bakamubuzya kuti: “Bona mukombima, kuli zyuulu zyiingi zyakaba basyomi aakati kamaJuda alubo boonse basungwaalila Mulawu.
21 Pesi bakamvwa ntwiintwi atala anduwe yakuti, walikuyiisya maJuda boonse bali aakati kazisi kuti baleke kutobela Mulawu waMozesi, kuli kubabuzya kuti batapaluli bana babo naakuti baleke kutobela ziyanza zyesu.
22 Nkinkaako, tuchite biyeni? Nkaambo bazooziziba kupela kuti wakasika.
23 Chita nzitulikukubuzya: Tuli aabaalumi bane bakachita chikonke.
24 Yinka aabaalumi aaba, ukalisalazye aamwi ambabo kweendelana amulawu alubo ubabbadalile ziyandikana, kuchitila kuti bagelwe. Mpawo bantu boonse bazooziba kuti ntwiintwi eeyi njibakamvwa atala anduwe teeyachoonzyo pe, pesi kuti ulikweenda bweelede akuti ulikuubamba Mulawu.
25 Pesi basyomi bali aakati kazisi, twakabalembela akubatumina eezyo nzitwakasala, kuti beelede kutantamuka zintu zyakapayizigwa kuzibumbwa, kutantamuka ganzi, zintu zisinidwe* abwaamu.”*
26 Mpawo mubuzuba bwakatobela, Pawulu wakayinka aabaalumi aaba, waakulisalazya aamwi ambabo kweendelana amulawu alubo wakanjila mutempele kuti akaakwaambe kuti mazuba aakulisalazya amana lili akuti umwi awumwi wabo wakali kuzoocheeta lili chipayizyo chakwe.
27 Mazuba aali musanu aabili naakali abaafwiifwi kumana, maJuda bazwa ku-Asiya nibakamubona mutempele, bakapa kuti nkamu yoonse yabantu ibusye musindo mpawo bakamujata,
28 kabalikoompoloIa kabati: “Nibaalumi bamu-lsrayeli, amutugwasye! Ooyu nguumwaalumi uuyabuyiisya bantu boonse koonse-koonse atala azintu ziteendelani abantu besu, Mulawu wesu andawu eeyi. Mukuyungizya, weeta maGrikki mutempele alubo wapa kuti ndawu eeyi iisalala, itasalali pe.”
29 Nkaambo aali chimwi chiindi, bakabwene Trofimo uuzwa ku-Efeso kalaamwi anguwe mumuunzi, alubo bakabonaanga Pawulu nguwe wakamweetede mutempele.
30 Muunzi woonse wakaba aalupyopyongano, alubo bantu bakaza buchijaana mpawo bakajata Pawulu bamukwelela aanze aatempele mpawo milyango yakajalwa mpawaawo.
31 Nibakali kuyanda kumujaya, jwi lyakuti muJerusalema mwaba lupyopyongano lyakasika kumweendelezi wamasoja.
32 Mpawo chakufwambaana wakabweza masoja abapati bamasoja waseluka kayabuchijaana kaya nkubakabede. Bantu nibakabona mweendelezi wamasoja amasoja, bakaleka kuuma Pawulu.
33 Mpawo mweendelezi wamasoja wakasika aafwiifwi, wamujata mpawo wakalayilila kuti asungwe aancheni zibili. Mpawo wakabuzya kuti wakalini akuti wakali wachitaanzi.
34 Pesi bamwi munkamu yabantu bakasaanguna koompolola kabaamba eechi, bamwi kabaamba eechiya. Mbukunga wakakachilwa kuziba zili nzizyo akaambo kalupyopyongano, wakalayilila kuti atolwe kunkambi yamasoja.
35 Pesi naakasika aamatantilo, wakanyampulwa biya amasoja akaambo kankamu yabantu yakali yabusya musindo,
36 nkaambo nkamu yabantu yakali kuyabutobela kayilikoompolola kayiti: “Ajayigwe!”
37 Pawulu naakali wabaafwiifwi kunjizigwa munkambi yamasoja, wakabuzya mweendelezi wamasoja kuti: “Ndilazumizigwa na kwaamba chimwi chintu kulinduwe?” Mpawo mweendelezi wamasoja wakati: “Ulakonzya na kwaambuula chiGrikki?
38 Teenduwe na mu-Ijipita uulya, aali chimwi chiindi wakapa kuti bantu babukile mfulumende, akuzulwida baalumi bajayi bali 4 000 munkanda?”
39 Mpawo Pawulu wakati: “Kwaamba choonzyo, ime ndili muJuda wakuTaso iili muKkilikkiya, ndilisichisi wamumuunzi uuzibinkene loko. Inche kaka, ndizumizye ndaambuule aabantu.”
40 Naakamuzumizya, Pawulu wakayimikila aamatantilo mpawo wakatandabika kuboko kubantu. Nibakawumuna kuti wii, wakasaanguna kwaambuula aambabo muchiHebberu, kati:
Makani Aamunsi
^ MuchiGrikki, “banakalindu bane.”
^ MuchiGrikki, “twakawumuna.”
^ Langa Bupanduluzi Bwamabala.
^ Naakuti, “zintu zyakajayigwa kazitanengedwe kuti zizwe ganzi.”
^ ChiGrikki, por·nei′a. Langa Bupanduluzi Bwamabala.
