Milimu yaBaapostoli 19:1-41
19 Apolo naakali muKkorinte, Pawulu wakayinda muzilawu zyakali kule loko akulwizi mpawo wakakunuka waya ku-Efeso. Naakasika nkukooko, wakajana bamwi basikwiiya,
2 mpawo wakati kulimbabo: “Mwakawutambula na muuya uusalala nimwakaba basyomi?” Mpawo bakamusandula kuti: “Tatunachimvwa biya pe chintu chitegwa muuya uusalala.”
3 Mpawo wakati: “Nkuukuli kubbabbatizigwa nkumwakabbabbatizigwa ankuko?” Bakati: “KwaJohane.”
4 Pawulu wakati: “Johane wakabbabbatizya bantu kachili chitondeezyo chakuti basanduka, kalikubabuzya kuti basyome ooyo wakali kuza musule lyakwe, nkukwaamba kuti basyome muli Jesu.”
5 Nibakamvwa zintu eezi, bakabbabbatizigwa muzina lyaMwaami Jesu.
6 Pawulu naakababikka maboko, muuya uusalala wakasika aalimbabo mpawo bakasaanguna kwaambuula imwi milaka akupolofita.
7 Baalumi aaba boonse bakali kusika ku 12.
8 Kwamyeezi iitatu, wakali kunjila muchikombelo kaambuula katayoowi, kalikupa nkani alubo wakali kwaambuuzyania aambabo munzila iikwelelezya, atala aBwaami bwaLeza.
9 Pesi bamwi nibakayumya myoyo akukaka kusyoma, kabalikwaambuula zintu zibi atala aBanzila Eeyi kunembo lyankamu yabantu, wakazwa aakati kabo mpawo wakagwisya basikwiiya aakati kabo alubo buzuba-abuzuba wakali kupa nkani mung’anda yaTirano yakali aachikolo.
10 Wakachita oobo kwaminyaka iibili, zyakuti bantu boonse, maJuda amaGrikki bakali kukkala muchilikiti cha-Asiya, bakamvwa jwi lyaMwaami.
11 Alubo Leza wakali kuchita milimu mipati iigambya kabelesya Pawulu,
12 zyakuti malembo ama-epuloni aakali kuguma mubili wakwe, akali kutolwa kubantu bachiswa mpawo malwazi aabo akali kumana alubo myuuya mibi yakali kuzwa.
13 Pesi bamwi maJuda bakali kweendeenda kabali kutanda madimoni, bakeezya kubelesya zina lyaMwaami Jesu kubantu bakali aamyuuya mibi. Bakali kwaamba kuti: “Muzina lyaJesu, ooyo Pawulu ngwakambawuka, ndati zwa mulinguwe.”
14 Kwakali bana bali musanu ababili bamupati wabapayizi muJuda uutegwa Sikkeva, bakali kuchita zintu eezi.
15 Pesi muuya mubi wakati kulimbabo: “Jesu ndilimuzi, aPawulu ndilimuzi pesi inywe ndinywe bani?”
16 Mpawo mwaalumi ooyo wakali aamuuya mubi wakasotokela umwi awumwi wabo, wabazunda boonse mpawo bakachija aang’anda eeyo kabatazweete pe alubo kabalichiside.
17 Makani aaya akazibinkana kubantu boonse, kumaJuda akumaGrikki bakali kukkala mu-Efeso. Eezi zyakapa kuti boonse bayoowe alubo zina lyaMwaami Jesu lyakayinkilila kunembo kulemekwa.
18 Alubo bantu biingi bakali baba basyomi, bakali kusika kabalyaambilila zibi zyabo akwaamba michito yabo kunembo lyabantu.
19 Kwaamba choonzyo, bantu biingi bakali kuchita zyamasalamusi, bakaza amabbuku aabo, baabunganizyaamwi alubo bakaatenta kunembo lyabantu boonse. Nibakalanga-langa kuti mabbuku aaya nga alaba amaliinzi, bakajana kuti mali yawo yakali kusika kunsiliva zili 50 000.
20 Nkinkaako, jwi lyaJehova* lyakali kuyabuvula akuzunda changuzu.
21 Nizyakayinda zintu eezi, Pawulu wakakanza mumoyo* wakwe kuti, naayinda muMakkedoniya amu-Akkaya, azooye kuJerusalema. Wakati: “Nindazwa ooko, ndeelede kwiinka akuRoma.”
22 Nkinkaako, aakati kabantu bakali kumugwasya, wakatuma baalumi babili Timoti a-Erastasi kuti bayinke kuMakkedoniya, pesi we wakasyaala kwakayindi muchilikiti cha-Asiya.
23 Aachiindi eecho, kwakaba lupyopyongano lupati akaambo kabantu Banzila Eeyi.
24 Nkaambo umwi mwaalumi uutegwa Dimetriyo sikufula nsiliva, ooyo wakali kupanga twaanda twakukombela twansiliva twa-Atemisi, wakali kupa kuti aabo bakali aaluzibo lwakupanga zintu, bajane mali nyingi loko.
25 Mwaalumi ooyu wakabunganizya baalumi aaba, kuswaanizya abamwi bakali kuchita mulimu uukozyenie awabo mpawo wakati: “Nibaalumi, muzizi kabotu kuti mulimu ooyu nguwo ulikupa kuti tunote.
26 Mulibwene alubo mulimvwide kuti Pawulu ooyu, wayunga nkamu mpati yabantu, kutali mu-Efeso kupela, pesi amuchilikiti choonse cha-Asiya, kati baleza bakapangwa amaboko aabantu teebaleza pe.
27 Mukuyungizya, penzi likonzya kubawo ndyakuti, mulimu wesu ulaba wabuyo atempele lyaleza wesu mupati Atemisi lilaba lyabuyo, alubo ooyo uukombwa muchilikiti choonse cha-Asiya amunyika yoonse, ulawubulwa.”
28 Baalumi aabo nibakamvwa oobo, bakanyema loko mpawo bakoompolola kabati: “Atemisi wabantu bamu-Efeso mupati!”
29 Nkinkaako, mumuunzi mwakazula lupyopyongano alubo bantu boonse bakachijaanina kubbuwa lyazisobano kabali kukwenkwelesya Gayo a-Aristakko bakuMakkedoniya, baalumi bakali kweenda aaPawulu.
30 Pawulu wakali kuyanda kunjila mubantu aabo, pesi basikwiiya bakamukasya.
31 Nibaba bamwi bapati bazyamisobano amapobwe bakamuzi, bakamutumina jwi kabalikumukombelezya kuti atabikki buumi bwakwe mungozi kwiinda mukwiinka kubbuwa lyazisobano.
32 Kwaamba choonzyo, bantu bakabungene bakali banyongana, bakali koompolola kabalikwaamba eechi, bamwi kabaamba eechiya alubo biingi teebakachizi pe kuti babunganinaanzi.
33 Nkinkaako, bakagwisya Alekizanda munkamu yabantu mpawo maJuda bakamutontela kunembo. Alekizanda wakatandabika kuboko kuti alisandwide kubantu.
34 Mbubakabona biyo kuti wakali muJuda, boonse bakoompololaamwi kwama-awa akasisike kuli aabili kabati: “Atemisi wabantu bamu-Efeso mupati!”
35 Kumamanino, mupati wamuunzi naakawumuzya bantu, wakati: “Nibaalumi bamu-Efeso, ngwani uutazi kuti muunzi wabantu bamu-Efeso nguwo uulangania tempele lya-Atemisi mupati achifanikisyo chakaloka kuzwa kujulu?
36 Mbukunga zintu eezi tatukonzyi pe kuzikazya, amubatame mutachiti zintu kamutayeeyede pe.
37 Nkaambo mweeta baalumi aaba ookuno, kakuli taakwe nibakabba zintu zyamutempele, nikuba kusampula leza wesu wachanakazi.
38 Nkinkaako, kuti Dimetriyo abantu mbabelekaabo kabali aakaambo awumwi muntu, mazuba aakubeteka mpaali amweendelezi* mpali. Abaze atwaambo twabo tuzoolangwe-langwe.
39 Pesi kuti kamulaamwi makani aayinda aaya, bapati bamumuunzi bazoowalanga-langa kumiswaangano njibachita.
40 Nzitwachita sunu zilakonzya kupa kuti tupegwe mulandu wakubukila bweendelezi. Tuzootyeni twazoobuzigwa kuti nkamboonzi nikwakaba lupyopyongano.”
41 Naakamaninsya kwaamba zintu eezi, wakabuzya bantu kuti beende.
Makani Aamunsi
^ Langa Bupanduluzi Bwamabala.
^ MuchiGrikki, “mumuuya.” Langa Bupanduluzi Bwamabala.
^ Wakali mweendelezi wamaRoma wachilikiti. Langa Bupanduluzi Bwamabala.
