Makani mabotu aakalembwa aaMateyo 9:1-38
9 Nkinkaako, wakatanta bwaato, wazubuka mpawo wakanjila mumuunzi wakulimbabo.
2 Bakamweetela umwi mwaalumi wakayumide mubili, kalede aabulo. Naakabona lusyomo lwabo, Jesu wakabuzya mwaalumi wakayumide mubili kuti: “Utayoowi pe mwanaangu! Zibi zyako zyalekelelwa.”
3 Bamwi balembi bakali kuyeeya mumyoyo yabo kabati: “Muntu ooyu ulikusampula.”
4 Kazi nzibakali kuyeeya, Jesu wakati: “Nkamboonzi nimulikuyeeya zintu zibi mumyoyo yanu?
5 Muchikozyano, nchiichili chuuba, kwaamba kuti, ‘Zibi zyako zyalekelelwa’ naakuti, ‘Nyampuka weende’?
6 Nikuba oobo, kuti muzibe kuti Mwanaamuntu ulaamanguzu aanyika aakulekelela zibi—” mpawo wakati kumwaalumi wakayumide mubili: “Nyampuka, ubweze bulo bwako, uye kumuunzaako.”
7 Mwaalumi ooyo wakanyampuka mpawo wakaya kumuunzaakwe.
8 Makamu aabantu naakabona zintu eezi, akayoowa loko mpawo akalumbayizya Leza, ooyo wakapa bantu manguzu aali boobo.
9 Mpawo naakali kuyabweenda kazwa aandawu eeyo, Jesu wakabona umwi mwaalumi uutegwa Mateyo, kakkede aang’anda yakutelela mutelo, mpawo wakati kulinguwe: “Ba mutobeli wangu.” Mpawo wakanyampuka mpawaawo, wamutobela.
10 Nikwakayinda chiindi, Jesu wakali kulya* mung’anda, alubo basimutelo biingi abasizibi bakasika basaanguna kulya aanguwe* abasikwiiya bakwe.
11 Pesi baFarisi nibakabona zintu eezi, bakati kuli basikwiiya bakwe: “Nkamboonzi muyiisi wanu nalya aabasimutelo abasizibi?”
12 Naakabamvwa, wakati: “Bantu batachiswi tabayandi musilisi pe, pesi bachiswa mbabo bayanda musilisi.
13 Nkinkaako, amwiinke mukamvwisisisye nzyaamba makani aakuti: ‘Ndiyanda lweetelelo, kutali chipayizyo pe.’ Nkaambo ndakazida kuzooyita basizibi, kutali bantu baluleme pe.”
14 Mpawo basikwiiya baJohane bakasika kulinguwe babuzya kuti: “Nkamboonzi iswe abaFarisi nitulyiimya kulya kakuli basikwiiya bako tabalyiimyi pe?”
15 Mpawo Jesu wakati kulimbabo: “Beenzinyina basikukwata tabakwe kaambo kapa kuti balile kuti sikukwata kachili aambabo, teembubo na? Pesi azoosika mazuba, aawo sikukwata natazoogwisigwe kulimbabo mpawo aachiindi eecho bazoolyiimya kulya.
16 Taakwe muntu uusuma chigamba chamulembo mupya aachigogo chaajulu chachiindi, nkaambo mulembo mupya uladonsa chigogo eecho mpawo aadelukide alakomena.
17 Alubo bantu tababikki wayini mpya muzibikkilo zyawayini zyachikumba zyachiindi. Kuti bachita oobo, zibikkilo zilabbaluka mpawo wayini ilatika, alubo zibikkilo zilanyonyooka. Pesi bantu babikka wayini mpya muzibikkilo zipya mpawo zyoonse kazili zibili zilalondolwa.”
18 Naakachili kubabuzya zintu eezi, umwi mweendelezi, wakasikide, wakamufugamina kati: “Kweelede kuti lino mwanaangu musimbi wafwa, pesi kuza uzoomubikke kuboko, mpawo ulaba muumi.”
19 Mpawo Jesu abasikwiiya bakwe bakanyampuka, bamutobela.
20 Pesi umwi mwanakazi wakali waba aaminyaka iili 12 kachiswa bulwazi bwakuzwa ganzi,* wakamuzida kusule, mpawo wakajata mupeto wachigogo chakwe chaajulu,
21 nkaambo wakaliswini kulibuzya kuti: “Kuti ndajata biyo chigogo chakwe chaajulu, ndilapona.”
22 Jesu wakachengunuka, alubo naakamubona, wakati: “Utayoowi pe mwanaangu! Lusyomo lwako lwakuponia.” Kuzwa ku-awa njiyeeyo, mwanakazi ooyo wakapona.
23 Jesu naakanjila mung’anda yamweendelezi, wakabona basikusiba nyeele ankamu yabantu bakali kulila loko.
24 Mpawo wakati: “Amuzwe, nkaambo mwana tafwide pe, pesi ulikoona.” Mpawo bakasaanguna kumuseka kabali kumufubaazya.
25 Bantu mbubakazwa biyo aanze, Jesu wakanjila mpawo wakajata kuboko kwakasimbi mpawo kakabuka.
26 Makani aaya akazula muchilawu choonse eecho.
27 Jesu naakali kuzwa nkukooko, baalumi babili boofu bakamutobela kabalikoompolola kabati: “Tufwide luzyalo, Mwana waDavida.”
28 Naakanjila mung’anda, baalumi boofu bakasika kulinguwe, mpawo Jesu wakababuzya kuti: “Muli aalusyomo na lwakuti ndilakonzya kuchita zintu eezi?” Bakamusandula kuti: “Iiyi Mwaami.”
29 Mpawo wakaguma meso aabo, kati: “Azichitike kulindinywe, kweendelana alusyomo lwanu.”
30 Mpawo meso aabo akabona. Mukuyungizya, Jesu wakabachenjezya kuti: “Amube aachoonzyo chakuti kutabi muntu uziziba pe eezi.”
31 Pesi nibakazwa aanze, bakabuzya bantu boonse bamuchilawu eecho atala anguwe.
32 Nibakali kuzwa, bantu bakamweetela mwaalumi chimuumu wakali aadimoni,
33 mpawo dimoni eelyo nilyakatandwa, mwaalumi ooyo wakaambuula. Makamu aabantu akagamba mpawo akati: “Tatunabona zintu zili boobu pe mu-Israyeli.”
34 Pesi baFarisi bakali kwaamba kuti: “Muntu ooyu utanda madimoni kabelesya mweendelezi wamadimoni.”
35 Mpawo Jesu wakasaanguna kweenda mumyuunzi yoonse amutuunzi, kayabuyiisya muzikombelo zyabo, kalikukambawuka makani mabotu aaBwaami akuponia malwazi aamisyobo yoonse amachise aamisyobo yoonse.
36 Naakabona makamu aabantu, wakabeetelela nkaambo bakali kupenzegwa alubo bakalimwayikide mbuli mbelele zitakwe mweembeli.
37 Mpawo wakati kuli basikwiiya bakwe: “Kwaamba choonzyo, mulimu wakutebula mupati, pesi babelesi mbache.
38 Nkinkaako, amukombelezye Simalelo wakutebula kuti atume babelesi mumulimu wakwe wakutebula.”
Makani Aamunsi
^ Naakuti, “wakakkede aatebbulu.”
^ Naakuti, “bakkala aanguwe aatebbulu.”
^ Naakuti, “bwakalobola.”
