Makani mabotu aakalembwa aaMateyo 26:1-75
-
Bapayizi bayanduula nzila yakujaya Jesu (1-5)
-
Jesu watilwa mafuta aanunkilila (6-13)
-
Pasika yamamanino akuuzigwa (14-25)
-
Kutalika Chilalilo chaMwaami (26-30)
-
Petro wabuzigwa kuti uzookaka Jesu (31-35)
-
Jesu ulikukomba muGesemani (36-46)
-
Jesu wasungwa (47-56)
-
Kubetekwa muNkuta Mpati yamaJuda (57-68)
-
Petro wakaka Jesu (69-75)
26 Jesu naakamaninsya kwaambuula zintu zyoonse eezi, wakati kuli basikwiiya bakwe:
2 “Mulizi kuti kwasyaala mazuba aabili kuti kuchitwe Pasika alubo Mwanaamuntu uzootolwa kukujayigwa aachisamu.”
3 Mpawo bapati babapayizi abaalu babantu bakabungana mulubuwa lwamupayizi mupati wakali kutegwa Kkayafasi,
4 alubo bakazwa aamuzeezo wakuti bajate* Jesu munzila yabuchenjezu akuti bamujaye.
5 Nikuba oobo, bakali kwaamba kuti: “Eezi tutazichiti aachiindi chapobwe, kuchitila kuti bantu batabusyi lupyopyongano.”
6 Jesu naakali kuBbetaniya mung’anda yaSimoni sichipele,
7 umwi mwanakazi wakali aakabbodela ka-alabbasta, kakali aamafuta aanunkilila alubo aadula, wakasika kulinguwe, mpawo wakasaanguna kwaatila mumutwe wakwe naakali kulya.*
8 Basikwiiya nibakabona zintu eezi bakanyema loko, mpawo bakati: “Nkamboonzi mafuta aaya nalikusaanisigwa?
9 Nkaambo alikunoowuzigwa aamali nyingi mpawo mali eeyo ipegwe bafwaba.”
10 Jesu naakaziba eezi, wakati kulimbabo: “Ani mumukataazizyaanzi mwanakazi ooyu? Wandichitila chintu chibotu.
11 Nkaambo bafwaba munoolaabo chiindi choonse, pesi tamunooli aandime pe chiindi choonse.
12 Naatila mafuta aaya aanunkilila aamubili wangu, wachita oobo kuti andibambile kuzikkwa.
13 Kwaamba choonzyo, ndimubuzya kuti, kufumbwa nkwaatanookambawukwe makani mabotu aaya munyika yoonse, anzyaachita mwanakazi ooyu zinoowambuulwa kuti ayeeyegwe.”
14 Mpawo umwi wabali Kkumi Ababili, ooyo uutegwa Judasi Isikkariyoti, wakayinka kubapati babapayizi
15 mpawo wakati: “Mulandipaanzi kuti ndamuuzya kulindinywe?” Mpawo bakasyomezya kumupa masiliva aali 30.
16 Nkinkaako, kuzwa kuchiindi eecho kaziya kunembo, wakali kuyanduula mweenya uuli kabotu wakuti amuuzye.
17 Mubuzuba bwakusaanguna bwaPobwe lyaZinkwa Zitakwe Bumena, basikwiiya bakasika kuli Jesu, kabati: “Nkuukuli nkuyanda kuti tukakubambile kuti ukaakulide nkuko Pasika?”
18 Wakati: “Amwiinke mumuunzi kuli Ndaba, mukamubuzye kuti, ‘Muyiisi wati: “Chiindi changu chibikkidwe chaswena. Ndilasekelela Pasika abasikwiiya bangu aamuunzi wako.”’”
19 Nkinkaako, basikwiiya bakachita mbuli mbubakabuzigwa aaJesu alubo bakalibambila Pasika.
20 Nilyakaba goko, Jesu wakalikkede aatebbulu abasikwiiya bakwe bali 12.
21 Nibakali kulya, wakati: “Kwaamba choonzyo, ndimubuzya kuti, umwi wanu uzoonduuzya.”
22 Kabawuside loko akaambo kazeezi, umwi awumwi wabo wakasaanguna kumubuzya kuti: “Mwaami, ndime na?”
23 Mpawo wakabasandula kuti: “Ooyo uusunsa aandime mundido, nguwe uutazoonduuzye.
24 Kwaamba choonzyo, Mwanaamuntu ulikwiinka mbuli mbukulembedwe atala anguwe, pesi ulaapenzi muntu ooyo uulikuuzya Mwanaamuntu! Zyali kunoobota loko, kaansinga muntu ooyo taakazyalwa pe.”
25 Judasi, ooyo wakali waba aafwiifwi kuti amuuzye, wakati: “Rabbi, ndime na?” Jesu wakati: “Iwe nduwe waamba oobo.”
26 Nibakachili kulya, Jesu wakabweza chinkwa mpawo naakalumba, wakachikwamuna wachipa basikwiiya bakwe, mpawo wakati: “Amubweze mulye. Eechi chiiminina mubili wangu.”
27 Alubo wakabweza nkomeki, walumba mpawo wakabapa kati: “Amunywe moonse,
28 nkaambo yiiminina ‘ganzi lyachizuminano,’ litazootilwe akaambo kabantu biingi kuchitila kuti balekelelwe zibi.
29 Nkaambo ndimubuzya kuti: Tandichizooyinywi lubo pe wayini yamasaansa, kusikila mubuzuba oobo mbunditazooyinywe aandinywe kayili yaba mpya muBwaami bwaTaata.”
30 Kumamanino, nibakamaninsya kwiimba nyimbo zyakutembawula, bakazwa baya kuChilundu chama-Olifa.
31 Mpawo Jesu wakati kulimbabo: “Mansiku aano moonse mulalebwa akaambo kangu nkaambo kulilembedwe kuti: ‘Ndizoowuma mweembeli mpawo mbelele zyabutanga zizoomwayika.’
32 Pesi ndaakubusigwa, ndizoomusaangunina kusika kuGalili.”
33 Pesi Petro wakamusandula kuti: “Nikuba kuti boonse aaba balebwa akaambo kako, ime tandikoolebwa pe!”
34 Jesu wakati kulinguwe: “Kwaamba choonzyo, ndikubuzya kuti, mansiku aano, mukombwe kawutanakokolika, ulandikaka tutatu.”
35 Petro wakati kulinguwe: “Kuti nkufwa, tuzoofwaamwi. Ziyume zitete, tandizookukaki pe.” Abasikwiiya boonse bakaamba zikozyenie.
36 Mpawo Jesu wakasika abasikwiiya bakwe aandawu iitegwa Gesemani mpawo wakati kulimbabo: “Amukkale aawa, nindichiya aalya kuti ndikakombe.”
37 Jesu wakayinka aaPetro abana babili baZebbediya mpawo wakasaanguna kupengaana mumoyo akukataazikana loko.
38 Mpawo wakati kulimbabo: “Ndapengaana mumoyo zyakuti ndaamba kufwa. Amukkale aawa, mulindile andime.”
39 Alubo naakayinka aanembo-nembo, wakafugama walanga aansi mpawo wakakomba kati: “Taata, kuti kazichita, nkomeki eeyi ayindiinde. Nikuba oobo, kutabi kuyanda kwangu pe, pesi akube kuyanda kwako.”
40 Wakabweeda kuli basikwiiya, mpawo wakabajana kabalikoona, mpawo wakati kuli Petro: “Mwakachilwa kulindila aandime nikuba kwa-awa iimwi biyo?
41 Amukkale kamulindide alubo amwiinkilile kunembo kukomba, kuchitila kuti mutanjili mumasunko. Kwaamba choonzyo, moyo* ulayanda,* pesi mubili tawukwe manguzu pe.”
42 Alubo wakayinka kachibili mpawo wakakomba kati: “Taata, kuti kazitachiti kuti yiinde, kunze kwakuti ndiinywe, kuyanda kwako akuchitike.”
43 Naakabweeda lubo wakabajana kabalikoona nkaambo meso aabo akali kulema.
44 Wakabasiya, mpawo wakayinka kuti akakombe kachitatu, kalikwaamba chintu chikozyenie.
45 Mpawo wakabweeda kuli basikwiiya, wababuzya kuti: “Aachiindi chiliboobu mulikoona, kamulikupumuna! Amubone! Awa yakuti Mwanaamuntu awuzigwe mumaboko aabasizibi yaswena.
46 Amubuke tweende. Amubone! Sikunduuzya waba aafwiifwi.”
47 Kachaambuula, lino bona! Judasi, umwi wabali Kkumi Ababili wakasika ankamu mpati yabantu yakali aamapanga ankoli yakatumidwe aabapati babapayizi abaalu babantu.
48 Sikumuuzya wakali wabapa chitondeezyo chakuti: “Ooyo ngunditamyonte, ngunguwe. Amumujate mumusunge.”
49 Nkinkaako, wakalulama Jesu mpawo wakati: “Mbiyeni Rabbi,” mpawo wakamumyonta.
50 Pesi Jesu wakati kulinguwe: “Mweenzuma, wazidaanzi ookuno?” Mpawo bantu bakasika bajata Jesu, bamusunga.
51 Lino bona, umwi wabaabo bakali aaJesu wakajata panga lyakwe, walisomona mpawo wakakwapula kutwi kwamuzike wamupayizi mupati.
52 Mpawo Jesu wakati kulinguwe: “Bweedezya panga lyako aandawu yalyo, nkaambo muntu woonse uubelesya panga, uzoojayigwa aapanga.
53 Ubonaanga tandikonzyi na kukumbila Taata kuti lino andipe makamu aangilozi aayinda ku 12?
54 Kuti kwaba oobo, alazuzikizigwa biyeni Magwalo aamba kuti zyeelede kuchitika mbuboobo?”
55 Ku-awa njiyeeyo Jesu wakabuzya makamu aabantu kuti: “Mwaza kuzoondisunga kamujisi mapanga ankoli mbuli kuti mwazida chigwebenga na? Buzuba abuzuba ndakalikunoonga ndakkala aandinywe mutempele kandilikuyiisya, pesi teemwakandisunga pe.
56 Nikuba oobo, zintu zyoonse eezi zyachitika, kuchitila kuti malembe* aabapolofita azuzikizigwe.” Mpawo basikwiiya boonse bakamusiya bachija.
57 Bantu bakali bajata Jesu, bakamutola kuli Kkayafasi mupayizi mupati, ooko nkubakabungene balembi abaalu.
58 Pesi, Petro wakali kumutobela kali kule-kule, kusikila naakaakusika aalubuwa lwamupayizi mupati. Naakanjila, wakakkala aababelesi bamung’anda, kuti abone zyakali kuzoochitika.
59 Bapati babapayizi abantu boonse bamuNkuta Mpati yamaJuda, bakali kuyanduula bukamboni bwakubeja bwakuti bamupe mulandu, kuchitila kuti bamujaye.
60 Pesi taakwe mbubakajana pe nikuba kuti kwakasika bakamboni bakubeja biingi. Mpawo bakamboni babili bakazoosika,
61 mpawo bakati: “Mwaalumi ooyu wakaamba kuti, ‘Ime ndilakonzya kumwaya tempele lyaLeza mpawo ndiliyakulule mumazuba aatatu.’”
62 Mupayizi mupati naakamvwa oobo, wakanyampuka mpawo wakati kulinguwe: “Ani tusanduli na? Niinzi eezi nzibalikukwaamba baalumi aaba?”
63 Pesi Jesu wakaluumwide. Nkinkaako, mupayizi mupati wakati kulinguwe: “Ndikubuzya kuti ukonkezye aaLeza uupona kuti ulatubuzya simpe kuti nduwe Kkristu Mwana waLeza!”
64 Jesu wakati kulinguwe: “Iwe nduwe waamba oobo. Pesi ndimubuzya kuti: Kuzwa lino kaziya kunembo, muzoobona Mwanaamuntu kakkede kukuboko kwachilisyo kuli aamanguzu alubo kaza aamayoba aakujulu.”
65 Mpawo mupayizi mupati wakadelula zigogo zyakwe zyaajulu kati: “Muntu ooyu wasampula! Tuchiyanda bamwi bakamboni na? Mwalimvwida amulikke kuti wasampula.
66 Mutyeni?” Mpawo bakati: “Weelede kujayigwa.”
67 Mpawo bakamuswida kumeso akumuuma mfayindi. Bamwi bakali kumuuma mabayi,
68 kabati: “Iwe Kkristu, polofita. Ngwani wakuuma?”
69 Petro wakalikkede aanze mulubuwa, mpawo umwi musimbi mubelesi wakasika kulinguwe mpawo wakati: “Anduwe wakalaamwi aJesu wakuGalili!”
70 Pesi wakakaka kunembo lyabo boonse kati: “Tandizizi pe me nzulikwaamba.”
71 Naakaya kukaanda kajisini aamulyango, umwi musimbi wakamuziba mpawo wakabuzya bantu bakali mpawaawo kuti: “Mwaalumi ooyu wakalaamwi aJesu wakuNazareta.”
72 Pesi wakakaka lubo, akukonka kati: “Tandimuzi pe me muntu ooyo!”
73 Nikwakayinda chiindi chifwiifwi, aabo bakayimvwi aafwiifwi bakasika kuli Petro mpawo bakamubuzya kuti: “Iwe biya uli umwi wabo, nkaambo kwaamba choonzyo, ulamvwikka mbuwambuula.”
74 Mpawo wakasaanguna kutuka akukonka kati: “Tandimuzi pe me muntu ooyo!” Aachiindi nchicheecho, mukombwe wakakokolika.
75 Mpawo Petro wakayeeya majwi Jesu ngaakaambide aakuti: “Mukombwe kawutanakokolika, ulandikaka tutatu.” Mpawo wakazwa aanze, waakulila loko.
Makani Aamunsi
^ Naakuti, “basunge.”
^ Naakuti, “naakakkede aatebbulu.”
^ MuchiGrikki, “muuya.” Langa Bupanduluzi Bwamabala.
^ Naakuti, “ulapya.”
^ Naakuti, “magwalo.”
