Makani mabotu aakalembwa aaMateyo 23:1-39
23 Mpawo Jesu wakaambuula aamakamu aabantu abasikwiiya bakwe kati:
2 “Balembi abaFarisi balikkazika aachuuno chaMozesi.
3 Nkinkaako, zintu zyoonse nzibamubuzya, amuzichite akuzitobelezya pesi mutachiti kweendelana amichito yabo, nkaambo balaamba pesi tabazichiti pe nzibaamba.
4 Baanga zibbudu zilema akuzibikka aamakwiko aabantu pesi bo tabayandi pe kuziguma nikuba akanwe.
5 Milimu yoonse njibachita, bayichitila kuti babonwe aabantu, nkaambo bakomezya tubbokesi tuli aamagwalo ntubazwaata mbuli tulikwabilizyo, alubo balampya mipeto yazigogo zyabo.
6 Bayandisya ndawu zilemekwa* loko kuchilalilo azyuuno zili kunembo muzikombelo,
7 akujuzigwa kumisika akwiitwa kuti Rabbi* abantu.
8 Pesi inywe, mutayitwi kuti Rabbi, nkaambo Muyiisi wanu ngumwi biyo alubo inywe moonse muli bantu bamwi.
9 Mukuyungizya, mutayiti muntu naaba uumwi aanyika kuti taata, nkaambo Wuso ngumwi, Ooyo uuli kujulu.
10 Alubo mutayitwi kuti bazulwidi, nkaambo Muzulwidi wanu ngumwi, nguKkristu.
11 Pesi mupati kwiinda boonse aakati kanu, weelede kuba mubelesi wanu.
12 Kufumbwa muntu uulisumpula, uzoofwiinsigwa alubo kufumbwa muntu uulibombya, uzoosumpulwa.
13 “Muli aapenzi inywe nibalembi andinywe nibaFarisi, nibasikuupa-wupa, nkaambo mulikusinkila bantu bayanda kunjila muBwaami bwakujulu, nkaambo inywe tamunjili pe alubo tamubazumizyi pe aabo bali munzila kuya mulimbubo kuti bakanjile.
14 *——
15 “Muli aapenzi inywe nibalembi andinywe nibaFarisi, nibasikuupa-wupa, nkaambo muzubuka lwizi akweenda aanyika njumu kuti mukasandule muntu uumwi biyo alubo kuti wasanduka, mupa kuti ayelele kuwaalilwa muGehena* kwaziindi zyiindulwidwe tubili kwiinda ndinywe.
16 “Muli aapenzi inywe nibazulwidi boofu, nimwaamba kuti: ‘Kuti muntu wakonka aatempele, tazikwe ndaba pe, pesi kuti wakonka aangolida yatempele, weelede kuzuzikizya chikonke chakwe.’
17 Nibafuba-fuba aniboofu! Nchiichili chipati, ningolida na, naakuti nditempele lisalazya ngolida?
18 Mukuyungizya, mwaamba kuti: ‘Kuti muntu wakonka aachipayililo, tazikwe ndaba pe, pesi kuti wakonka aachipo chili aachipayililo, weelede kuzuzikizya chikonke chakwe.’
19 Niboofu! Nchiichili chipati, nchipo na naakuti nchipayililo chisalazya chipo?
20 Nkinkaako, kufumbwa muntu uukonka aachipayililo, ukonka aanchicho, kuswaanizya azintu zyoonse zili aali nchicho,
21 alubo kufumbwa muntu uukonka aatempele, ukonka aandilyo, kuswaanizya aYooyo uukkala mulindilyo,
22 alubo kufumbwa muntu uukonka aajulu, ukonka aachuuno chabwaami chaLeza, kuswaanizya aYooyo uukkede aalinchicho.
23 “Muli aapenzi inywe nibalembi andinywe nibaFarisi, nibasikuupa-wupa, nkaambo mupa chakkumi chaminti, adili akkumini,* pesi tamukwe ndaba pe amakani mapati aaMulawu, nkukwaamba, kubamba bululami, luzyalo akusyomeka. Nikuba kuti mweelede kuchita zintu eezi, pesi tazyaambi kuti mweelede kuubaansya zimwi zintu.
24 Nibazulwidi boofu, muminununa kansenya pesi kamumena nkamela!
25 “Muli aapenzi inywe nibalembi andinywe nibaFarisi, nibasikuupa-wupa, nkaambo musanzya aanze aankomeki andido, pesi mukati kazizwide butangazu akutalijata kabotu.
26 NibaFarisi boofu, amusaangune kusanzya mukati kankomeki andido, kuchitila kuti zisalale nikuba aanze.
27 “Muli aapenzi inywe nibalembi andinywe nibaFarisi, nibasikuupa-wupa, nkaambo muli mbuli tubanda tuzilulwidwe aabulongo butuba, ooto tuboneka katuli tubotu aanze pesi mukati katuzwide mafuwa aabantu bafwide abubi bwamisyobo yoonse.
28 Munzila iikozyenie, aanze muboneka kamuli bantu baluleme kubantu pesi mukati muzwide kuupa-wupa abubi.
29 “Muli aapenzi inywe nibalembi andinywe nibaFarisi, nibasikuupa-wupa, nkaambo muyaka tubanda twabapolofita akubotya-botya tubanda* twabantu baluleme,
30 alubo mwaamba kuti, ‘Kaansinga twakapona kuchiindi chamasianene, nikuli teetwakaliswaanizya pe ambabo mukutila ganzi lyabapolofita.’
31 Nkinkaako, mulikupa bukamboni bwakuti inywe muli bana babantu bakajaya bapolofita.
32 Akaambo kaako, amwiimaninsizye milimu yakasaangunwa aamasianyookulu.
33 “Nonzoka, nibana babachipile, muzooluchija biyeni lubeta lwamuGehena?*
34 Akaambo kakaambo aaka, ndilikumutumina bapolofita abaalumi basongo abayiisi. Bamwi muzoobajaya akubagankamina aazisamu, alubo bamwi muzoobakwibbuula muzikombelo zyanu akubapenzya kuzwa kuli umwi muunzi kuya kuli umwi muunzi,
35 kuchitila kuti ganzi lyabantu boonse baluleme lyakatilwa aanyika, lize aalindinywe kuzwa kuganzi lya-Abbelo mululami, kusikila kuganzi lyaZakkariya mwana waBbarakkiya, ooyo ngumwakajaya aakati kandawu iisalala achipayililo.
36 Kwaamba choonzyo, ndimubuzya kuti, zintu zyoonse eezi zizoosikila zyalani eeli.
37 “Jerusalema, Jerusalema, numujayi wabapolofita asikubatulula mabwe aabo bakatumwa kulinduwe. Kwaziindi zyiingi, ndakali kuyanda kubabunganizyaamwi bana bako, mbuli nkuku mbiifukatila twana twayo mumababa! Pesi mwakakaka.
38 Amubone! Mwatakatilwa ng’anda.
39 Nkaambo ndimubuzya kuti, tamuchizoondiboni lubo pe kusikila muzoowambe kuti, ‘Ulilongezedwe ooyo uuza muzina lyaJehova!’”*
Makani Aamunsi
^ Naakuti, “zibotu.”
^ Naakuti, “Muyiisi.”
^ Vesi eeyi tayijaniki pe mulaamwi malembe aachiindi alubo kuyeeyelwa kuti tayili chipanzi chaMagwalo aakazulwidwa aamuuya.
^ Langa Bupanduluzi Bwamabala.
^ Minti, dili, akkumini, ntununkilizyo tubikkwa muli chakulya.
^ Naakuti, “tubanda twakuyeezya.”
^ Langa Bupanduluzi Bwamabala.
^ Langa Bupanduluzi Bwamabala.
