Makani mabotu aakalembwa aaMateyo 13:1-58
-
ZIKOZYANISYO ZYABWAAMI (1-52)
-
Sikubyala (1-9)
-
Zyakapa kuti Jesu abelesye zikozyanisyo (10-17)
-
Chikozyanisyo chasikubyala chapandululwa (18-23)
-
Wiiti amasokwe (24-30)
-
Nseke yamasitadi abumena (31-33)
-
Kubelesya zikozyanisyo kuzuzikizya bupolofita (34, 35)
-
Chikozyanisyo chawiiti amasokwe chapandululwa (36-43)
-
Bunoti busisidwe aparela bbotu (44-46)
-
Kansabwe (47-50)
-
Bunoti bupya abwachiindi (51, 52)
-
-
Jesu wakakwa muchilawu chakulimbabo (53-58)
13 Mubuzuba oobo, Jesu wakazwa aang’anda eeyo alubo wakalikkede kumbali aalwizi.
2 Mpawo makamu aabantu akabungana kulinguwe zyakuti wakanjila mubwaato wakkala mpawo nkamu yoonse yabantu yakaliimvwi kumbali aalwizi.
3 Mpawo wakababuzya zintu zyiingi kabelesya zikozyanisyo. Wakati: “Sikubyala wakaya kukubyala.
4 Naakali kubyala, imwi mbuto yakawida kumbali aanzila mpawo bayuni bakasika bayilya.
5 Imwi yakawida aandawu yakali aamabwe, yakatalikwe seele* jingi, alubo yakafwambaana kumena nkaambo teekwakalikwe seele jingi pe.
6 Pesi zuba nilyakabala, yakapya mpawo yakapusama nkaambo teeyakalikwe miyanda pe.
7 Imwi yakawida mumaamvwa mpawo maamvwa akakomena ayisyanikizya.
8 Alubo imwi yakawida aanyika mbotu mpawo yakasaanguna kuzyala michelo, eeyi kwaziindi zyiindulwidwe tuli 100, iilya tuli 60, mpawo imwi tuli 30.
9 Ooyo uuli aamatwi, amvwe.”
10 Nkinkaako, basikwiiya bakasika mpawo bakamubuzya kuti: “Nkamboonzi nulikwaambuula aambabo kubelesya zikozyanisyo?”
11 Wakasandula kuti: “Inywe mwakapegwa kumvwisisisya nsiswa zisalala zyaBwaami bwakujulu, pesi bo tabapedwe pe.
12 Nkaambo kufumbwa ulaazyo, uzoopegwa zyiingi alubo uzooba azyiingi loko, pesi ooyo uutakwe chintu, uzoonyangwa nichiba eecho nchalaacho.
13 Aaka nkikaambo kapa kuti ndaambuule aambabo kandibelesya zikozyanisyo, nkaambo kulanga balalanga, pesi tababoni pe alubo kumvwa balamvwa, pesi tabamvwi pe nikuba kuzimvwisisisya zyaambwa.
14 Alubo bupolofita bwa-Isaya bulikuzuzikizigwa kulimbabo. Bwaamba kuti: ‘Kumvwa muzoomvwa, pesi tamuzoomvwisisisyi pe zyaambwa, alubo kulanga muzoolanga, pesi tamuzooboni pe.
15 Nkaambo myoyo yabantu aaba yatindibala alubo bamvwa amatwi aabo pesi taakwe nchibachita pe alubo bafwinya meso aabo kuchitila kuti bataboni ameso aabo akuti batamvwi amatwi aabo akuti batazimvwisisisyi pe zyaambwa amyoyo yabo, kuti basanduke mpawo ndibaponie.’
16 “Nikuba oobo, inywe mulabotelwa nkaambo meso aanu alabona alubo matwi aanu alamvwa.
17 Nkaambo kwaamba choonzyo, ndimubuzya kuti, bapolofita biingi abantu baluleme, bakali aachiyandisyo chakubona zintu nzimulikubona pesi teebakazibona pe, akumvwa zintu nzimulikumvwa pesi teebakazimvwa pe.
18 “Lino amuswiilile chikozyanisyo chasikubyala.
19 Mbuto yakabyalwa kumbali aanzila, yiiminina muntu uumvwa jwi lyaBwaami pesi katazimvwisisisyi pe zyaambwa, mpawo mubi ulasika, abweze eezyo zyakabyalwa mumoyo wakwe.
20 Eeyo yakabyalwa aandawu iilaamabwe, ngooyo umvwa jwi akufwambaana kulitambula kakondwa.
21 Nikuba oobo, takwe muyanda pe, pesi ulayinkilila kunembo kwachiindi chifwiifwi, mpawo nikwasika mapenzi akupenzegwa akaambo kajwi, ulalebwa mpawaawo.
22 Eeyo yakabyalwa mumaamvwa, ngooyo uumvwa jwi, pesi makataazyo aabwiime bwazintu oobuno* amanguzu aabunoti aayena, nga zyasyanikizya jwi akupa kuti litazyali michelo.
23 Eeyo yakabyalwa aanyika mbotu, ngooyo uumvwa jwi akumvwisisisya nzilyaamba akuzyala michelo. Ooyu uzyala michelo kwaziindi zyiindulwidwe tuli 100, uulya tuli 60, umwi tuli 30.”
24 Alubo wakababuzya chimwi chikozyanisyo. Wakati: “Bwaami bwakujulu bulakonzya kukozyanisigwa aamuntu wakabyala mbuto mbotu mumuunda wakwe.
25 Bantu nibakali koona, sinkondonyina wakasika, wabyala masokwe mwakali wiiti mpawo wakeenda.
26 Wiiti niyakakomena akuzyala bana, angawo masokwe akaboneka.
27 Nkinkaako, bazike bamwining’anda bakasika mpawo bakati kulinguwe: ‘Simalelo, ani teewakabyala mbuto mbotu na mumuunda wako? Ani mpo nkamboonzi nimuli masokwe?’
28 Wakati kulimbabo: ‘Umwi muntu, sinkondoma nguwe wakachita zintu eezi.’ Mpawo bazike bakati kulinguwe, ‘Uyanda kuti twiinke na tukaanonkole?’
29 Wakati: ‘Peepe, nkaambo ndiyoowela kuti mwanoononkola masokwe, mulakonzya kunonkokezya aawiiti.
30 Amuzileke zikomenaamwi kusikila kuchiindi chakutebula. Kuchiindi chakutebula, ndizoobuzya basikutebula kuti: Amusaangune kubunganizya masokwe, mwaasunge abe misunta kuti atentwe, mpawo nimwamana, mubikke wiiti mubutala bwangu.’”
31 Alubo wakababuzya chimwi chikozyanisyo. Wakati: “Bwaami bwakujulu buli mbuli nseke yamasitadi, muntu njaakabweza mpawo wayibyala mumuunda wakwe.
32 Kwaamba choonzyo, nseke eeyi niniini loko kunseke zyoonse, pesi kuti yakomena, nchilimwa chipati kwiinda zyoonse alubo nga yaba munsamu, zyakuti bayuni bakujulu nga basika mpawo bajana aakukkala aamitabi yawo.”
33 Wakababuzya chimwi chikozyanisyo. Wakati: “Bwaami bwakujulu buli mbuli bumena, mbwaakabweza mwanakazi akubukanda mufulawa iizuzya zisuwo zipati zitatu,* kusikila yoonse yafufumuka.”
34 Jesu wakaamba zintu zyoonse eezi kumakamu aabantu kabelesya zikozyanisyo. Kwaamba choonzyo, taakali kwaambuulaabo katabelesezye chikozyanisyo pe,
35 kuchitila kuti kuzuzikizigwe eezyo zyakaambwa kwiinda mumupolofita, ooyo wakati: “Ndizoojula mulomo wangu kandibelesya zikozyanisyo, ndizoowambilizya zintu zisisidwe kuzwa kumatalikilo.”*
36 Mpawo naakamaninsya kubuzya makamu aabantu kuti amwayike, wakanjila mung’anda. Basikwiiya bakwe bakasika kulinguwe mpawo bakamubuzya kuti: “Tupandulwide chikozyanisyo chamasokwe aali mumuunda.”
37 Mpawo wakasandula kuti: “Sikubyala mbuto mbotu, Mwanaamuntu,
38 muunda, ninyika. Mbuto mbotu, mbana baBwaami, pesi masokwe, mbana bamubi,
39 sinkondonyina wakababyala, nguDyabbulosi. Kutebula, mamanino aabwiime bwazintu* alubo basikutebula ningilozi.
40 Nkinkaako, mbuli masokwe mbaabunganizigwa akutentwa mumulilo, mbukuzooba akumamanino aabwiime bwazintu.*
41 Mwanaamuntu uzootuma ngilozi zyakwe mpawo zizoogwisya zintu zyoonse zilebya abantu batatobeli mulawu muBwaami bwakwe,
42 mpawo zizoobawaalila mubbibi lyamulilo. Ooko nkuko nkubatazoolilile akulumina ntwinyo.
43 Aachiindi eecho, baluleme bazoomweka loko mbuli zuba muBwaami bwaWisi. Ooyo uuli aamatwi, amvwe.
44 “Bwaami bwakujulu buli mbuli bunoti busisidwe mulusaka, muntu mbwaakajana akubusisa. Akaambo kakukondwa, ulayinka kuti akawuzye zintu zyoonse nzyalaazyo mpawo awule lusaka oolo.
45 “Alubo Bwaami bwakujulu buli mbuli sikuuzya weendeenda uuyanduula maparela mabotu.
46 Naakajana parela limwi liyandikana loko, wakayinka mpawo waakuuzya zintu zyoonse nzyaakalaazyo mpawaawo, mpawo wakalyuula.
47 “Alubo Bwaami bwakujulu buli mbuli kansabwe kakawaalwa mulwizi kuti kajate baswi bamisyobo yoonse.
48 Nikakazula, bakakadonsela kumbali aalwizi mpawo bakakkala aansi kuti basale baswi. Babotu bakababikka muzibikkilo, pesi babi bakabasowa.
49 Mbukuzooba akumamanino aabwiime bwazintu.* Ngilozi zizoozwa kuti zikapambule babi kuzwa kubaluleme,
50 alubo zizoobawaalila mubbibi lyamulilo. Ooko nkuko nkubatazoolilile akulumina ntwinyo.
51 “Mwazimvwisisisya na zintu zyoonse eezi?” Mpawo bakamusandula kuti: “Iiyi.”
52 Mpawo wakati kulimbabo: “Kuti kakuli oobo, muyiisi woonse wakayiisigwa atala aBwaami bwakujulu, uli mbuli muntu, mwining’anda uugwisya zintu zipya azyachiindi mung’anda njabikkila bunoti bwakwe.”
53 Jesu naakamaninsya kwaambuula zikozyanisyo eezi, wakazwa nkukooko.
54 Naakasika muchilawu chakulimbabo, wakasaanguna kubayiisya muchikombelo chabo, zyakuti bakagamba loko mpawo bakati: “Muntu ooyu wakabujana kuli busongo oobu amanguzu aakuchita milimu eeyi iigambya?
55 Ani ooyu teemwana wamubezi na? Banyina teeMariya na alubo banike bakwe teeJakkobo, aJosefa, aSimoni aJudasi na?
56 Bachizi bakwe tabalaamwi na andiswe? Ani mpo wakazijana kuli zintu zyoonse eezi?”
57 Nkinkaako, teebakamusyoma pe, pesi Jesu wakati kulimbabo: “Mupolofita ulalemekwa koonse-koonse kunze kwamuchilawu chakulimbabo, akuli bamung’anda yakwe.”
58 Nkinkaako, taakachita milimu myiingi iigambya nkukooko akaambo kakubula lusyomo kwabo.
Makani Aamunsi
^ Bamwi baamba kuti, “suko.”
^ Naakuti, “aachiindi eechino.” Langa Bupanduluzi Bwamabala.
^ Chisuwo chimwi chakeelene amalita aali 7,33.
^ Amwi malembe ati, “kumatalikilo aanyika.”
^ Naakuti, “aachiindi.” Langa Bupanduluzi Bwamabala.
^ Naakuti, “aachiindi.” Langa Bupanduluzi Bwamabala.
^ Naakuti, “aachiindi.” Langa Bupanduluzi Bwamabala.
