Makani aakalembwa aaMakko 3:1-35
3 Wakanjila lubo muchikombelo mwakali mwaalumi wakakokonyene kuboko.*
2 Nkinkaako, bakali kumulangisisya kabayanda kubona kuti ulamusilika na mwaalumi ooyo muSabata, kuchitila kuti bamujanine mulandu.
3 Jesu wakabuzya mwaalumi wakakokonyene kuboko* kuti: “Nyampuka, uze aakati.”
4 Mpawo wakati kulimbabo: “Zilazumizigwa na amulawu kuchita chintu chibotu naakuti chibi muSabata, kufutula buumi naakuti kujaya?” Pesi bakawumuna.
5 Naakabalanga kanyemede alubo kawuside loko akaambo kakutindibala kwamyoyo yabo, wakati kumwaalumi ooyo: “Tandabika kuboko kwako.” Mpawo wakakutandabika alubo kwakaba kabotu.
6 Mpawo baFarisi bakazwa aanze alubo bakachita muswaangano chakufwambaana abatobeli baHerodi, kuchitila kuti bamujaye.
7 Pesi Jesu wakazwa waya kulwizi, aamwi abasikwiiya bakwe alubo nkamu mpati loko yabantu bazwa kuGalili akuJudiya yakamutobela.
8 Nikuba kuzwa kuJerusalema, ku-Idumiya, mutaleeliya aaJodani, amundawu zyakali aafwiifwi aTire aSidoni, nkamu mpati loko yabantu yakasika kulinguwe niyakamvwa atala azintu zyiingi nzyaakali kuchita.
9 Mpawo wakabuzya basikwiiya bakwe kuti bamweetele kaato, kuchitila kuti bantu batamusyanikizyi.
10 Akaambo kakuti wakasilika bantu biingi, aabo boonse bakali aamalwazi malemu, bakali kumubunganina kabayanda kumujata.
11 Niiba myuuya mibi, kufumbwa niyakali kumubona, yakali kuliwaala kunembo lyakwe akoompolola kayiti: “Iwe uli Mwana waLeza.”
12 Pesi chiindi chiingi wakali kwiichenjezya kuti itamuzibyi kubantu.
13 Wakatanta chilundu, mpawo wakayita aabo mbaakali kuyanda mpawo bakasika kulinguwe.
14 Mpawo wakapanga* kabunga kabantu bali 12, mbaakayita kuti baapostoli, aabo bakali kuzooyenda aanguwe alubo mbaakali kuzootuma kuti bakakambawuke,
15 akuti babe aamanguzu aakutanda madimoni.
16 Mukabunga aaka kabantu bali 12 nkaakapanga,* kwakali Simoni, ooyo ngwaakawuzika limwi zina lyakuti Petro,
17 Jakkobo mwana waZebbediya amwanikaakwe Johane, (abaaba wakabawuzika zina lyakuti Bbowanege, lyaamba kuti “Bana Bakudilima”),
18 Andreya, Filipi, Bbatolomeyo, Mateyo, Tomasi, Jakkobo mwana wa-Alifasi, Tediyasi, Simoni wakuKkenani,*
19 aJudasi Isikkariyoti, ooyo wakazoomuuzya.
Mpawo Jesu wakanjila mung’anda
20 alubo nkamu yabantu yakabungana lubo zyakuti teebakachili kukonzya pe nikuba kulya.
21 Pesi babbululu bakwe nibakamvwa atala azintu eezi, bakayinka kuti bakamujate nkaambo bakali kwaamba kuti: “Wapenga.”
22 Alubo balembi bakakunukide kuzwa kuJerusalema, bakali kwaamba kuti: “Unjidwe Bbeluzabbele,* alubo utanda madimoni kabelesya mweendelezi wamadimoni.”
23 Nkinkaako, naakabayita kuti baze kulinguwe, wakaambuulaabo kabelesya zikozyanisyo kati: “Saatani kujana wamutanda biyeni Saatani?
24 Kuti bwaami bwaanzaana tabukonzyi pe kwiimikila,
25 alubo kuti ng’anda yaanzaana tayikonzyi pe kwiimikila.
26 Alubo kuti Saatani walilwana mpawo waanzaana, takonzyi pe kwiimikila pesi ulamana.
27 Kwaamba choonzyo, taakwe muntu uunjila mung’anda yamuntu uuli aamanguzu uukonzya kubba zintu zyakwe, kunze kwakuti wasaanguna kumusunga. Kuti wamusunga mpimpawo mpakonzya kubweza zintu zili mung’anda yakwe.
28 Kwaamba choonzyo, ndimubuzya kuti, bana babantu bazoolekelelwa zintu zyoonse, kufumbwa zibi nzibachita naakuti majwi aakusampula ngibaambuula.
29 Pesi kufumbwa muntu uusampula muuya uusalala, tazoolekelelwi pe kusikila kukabe kutamani, pesi ulaamulandu wachibi chitamani.”
30 Wakaamba zintu eezi nkaambo bantu bakali kuti: “Unjidwe muuya mubi.”
31 Mpawo banyina abanike bakwe bakasika bayimikila aanze mpawo bakatuma muntu kuti akamwiite.
32 Mbukunga kwakali nkamu yabantu yakakkede kayimuzyungulukide, bakati kulinguwe: “Bona! Banyoko abanike bako balaanze balikukwiita.”
33 Pesi wakabasandula kuti: “Baama mbaani alubo banike bangu mbaani?”
34 Mpawo wakalanga aabo bakakkede kabamuzyungulukide mpawo wakati: “Amubone, aaba mbiibaama abanike bangu!
35 Kufumbwa muntu uuchita kuyanda kwaLeza, nguumwanike wangu, mbiibachizi alubo mbiibaama.”
Makani Aamunsi
^ Naakuti, “wakayumide kuboko.”
^ Naakuti, “wakayumide kuboko.”
^ Naakuti, “wakasala.”
^ Naakuti, “nkaakasala.”
^ Naakuti, “musungu.”
^ Eeli ndizina lyaamba Saatani.
