KuMahebberu 2:1-18
2 Nchikuyandikana kuti tuziswiilisisye loko zintu nzitwakamvwa kwiinda mbutuchita, kuchitila kuti tutakukulwi.
2 Nkaambo kuti kakuli kuti jwi lyakaambwa kwiinda mungilozi lyakabonwa kuba lyachoonzyo, akuti aabo bakasotoka mulawu abakataswiilila bakapegwa chisubulo kweendelana abululami,
3 tuzoofutuka biyeni kuti twalekelezya lufutuko lupati oobu? Nkaambo lwakasaanguna kwaambuulwa kwiinda muMwaami wesu alubo lwakabonwa kuba lwachoonzyo kulindiswe kwiinda muli baabo bakamumvwa,
4 kakuli Leza wakanjilila mukupa bukamboni kabelesya zitondeezyo, azigambyo, amilimu iisiyene-siyene iigambya, amuuya uusalala ngwaakapa kweendelana akuyanda kwakwe.
5 Nkaambo nyika iiza njitulikwaambuula atala anjiyo, taakayibombya kungilozi pe.
6 Pesi muli lumwi lugwalo, umwi kamboni wakati: “Muntu niinzi kuti ukkale kumuyeeya, naakuti mwanaamuntu, kuti ube aandaba anguwe?
7 Wakamuchesya aaniini biyo kungilozi, wakamuzwaatika bulemu akulemekwa, alubo wakamusala kuti ayendelezye milimu yamaboko aako.
8 Zintu zyoonse wakazibombya kunsi aamawulu aakwe.” Kwiinda mukubombya zintu zyoonse kulinguwe, Leza taakwe nchaakasiya kachitalibombyi pe kulinguwe. Nikuba oobo, tatunabona zintu zyoonse kazilibombya kulinguwe.
9 Pesi tubwene Jesu, ooyo wakachesegwa aaniini kungilozi, kazwaatikidwe bulemu akulemekwa nkaambo wakapenzegwa kusikila kulufu, kuchitila kuti kwiinda muluzyalo lupati lwaLeza alabile lufu akaambo kabantu boonse.
10 Nkaambo kwakali kweelela kuti ooyo wakapa kuti zintu zyoonse zibewo akaambo kanguwe mukweeta bana biingi kubulemu, ape kuti Muzulwidi Mupati walufutuko lwabo amaninine kwiinda mumapenzi.
11 Nkaambo ooyo uusalazya abaabo balikusalazigwa, bazwa kuchisiko chimwi, alubo akaambo kakaambo aaka, takwe bweeme pe kubayita kuti bakombima,
12 naamba kuti: “Ndizoowambilizya zina lyako kubakombima, aakati kambungano ndizookutembawula anyimbo.”
13 Akuti: “Ndizoomusyoma.” Akuti: “Bona! Ime abana mbaakandipa Jehova.”*
14 Nkinkaako, mbukunga “bana” mbanyama aganzi, anguwe wakaba wanyama aganzi, kuchitila kuti kwiinda mulufu lwakwe, anyonyoone ooyo uuli aamanguzu aakweeta lufu, nkukwaamba, Dyabbulosi,
15 akuti abaangunune boonse aabo bakali mubuzike kwabuumi bwabo boonse akaambo kakuyoowa lufu.
16 Nkaambo teengilozi pe nzyalikugwasya, pesi ulikugwasya bana ba-Abbrahamu.
17 Nkinkaako, wakeelede kuba mbuli “bakombinyina” muzintu zyoonse, kuchitila kuti abe mupayizi mupati uuli aalweetelelo alubo uusyomeka muzintu zili atala aLeza, kuchitila kuti ape chipayizyo chakumvwanana chazibi zyabantu.*
18 Mbukunga wakaswaana mapenzi naakali kusunkwa, ulakonzya kubagwasya aabo balikusunkwa.
Makani Aamunsi
^ Langa Bupanduluzi Bwamabala.
^ Naakuti, “chipayizyo chakumaninsya milandu yabantu.”
