Makani Aakalembwa aaLukka 21:1-38
21 Naakalanga, wakabona bantu banotede kabalikuwaala zipo zyabo muzibikkilo zyamali.
2 Mpawo wakabona mukamufu uufwaba kalikuwaala tumali tubili* tutakwe ambutubede mumoomo,
3 mpawo wakati: “Kwaamba choonzyo, ndimubuzya kuti, mukamufu ooyu uufwaba, wabikka mali nyingi loko kwiinda bamwi boonse.
4 Nkaambo boonse aaba babikka zipo kabazubula kuzwa kuzintu zyiingi nzibalaazyo pesi mukamufu ooyu, nikuba kuti ulafwaba, wabikka zyoonse nzyaakali kuponaazyo.”
5 Nikwakayinda chiindi, bamwi nibakali kwaambuula atala atempele, mbulyakabotesedwe amabwe mabotu azintu zyakapedwe kuli Leza,
6 wakati: “Zintu eezi nzimubwene, azoosika mazuba aawo bbwe nilitazoosiigwi aajulu aabbwenyina kalitakolomwedwe pe.”
7 Mpawo bakamubuzya kuti: “Muyiisi, zintu eezi zizoochitika lili loko alubo niinzi chitazoobe chitondeezyo chakuti zintu eezi zyaamba kuchitika?”
8 Wakati: “Amuchenjelele kuti muteenwi pe, nkaambo bantu biingi bazoosika muzina lyangu kabati, ‘Ndime nguwe,’ akuti, ‘Chiindi chibikkidwe chaba aafwiifwi.’ Mutabatobeli pe.
9 Mukuyungizya, mwazoomvwa atala ankondo alupyopyongano,* mutazooyoowi pe nkaambo zintu eezi zyeelede kuchitika saansi, pesi mamanino taazoosiki mpawaawo.”
10 Mpawo wakati kulimbabo: “Chisi chizoobukila chimwi chisi alubo bwaami buzoobukila bumwi bwaami.
11 Kuzooba mizuzumo yanyika mipati alubo mundawu zisiyene-siyene kuzooba nzala amalwazi mabi. Bantu bazoobona zintu ziyoosya azitondeezyo zipati kuzwa kujulu.
12 “Pesi zintu zyoonse eezi kazitanachitika, bantu bazoomujata alubo bazoomupenzya kabamutola kuzikombelo akumajele. Muzootolwa kunembo lyabaami akubeendelezi akaambo kazina lyangu.
13 Eezi zizoopa kuti mupe bukamboni.
14 Nkinkaako, mutalikataazyi pe mumyoyo yanu kamulibambila kuti muzoosandula biyeni kuti mulyiiminine,
15 nkaambo ndizoomupa majwi abusongo, zyakuti bantu boonse bamukazya bazookachilwa kuzikaka naakuti kuzikazya.
16 Mukuyungizya, nibaba bazyali banu, bakulana abanike banu, babbululu banu abeenzinyokwe, bazoomutola kunembo lyababetesi* alubo bazoojaya bamwi banu
17 alubo muzoozondwa aabantu boonse akaambo kazina lyangu.
18 Pesi taakwe kasusu nikaba kamwi kali mumitwe yanu katazoonyonyooke.
19 Kwiinda mukulisimya kwanu, muzoofutula buumi bwanu.
20 “Nikuba oobo, mwaakubona muunzi waJerusalema kawuzyungulukidwe aamasoja, amuzibe kuti waba aafwiifwi kunyonyoonwa.
21 Mpawo aabo bali muJudiya abasaangune kuchijila kuzilundu, aabo bali mumuunzi waJerusalema abazwe alubo aabo bali mumyuunzi iili mumbali aanguwo, batanjili pe mulinguwo,
22 nkaambo aaya mazuba aakutondeezya bululami* kuchitila kuti zintu zyoonse zyakalembwa zizuzikizigwe.
23 Bali aapenzi banakazi banooli aamada abanoonyonsya mumazuba aayo! Nkaambo aanyika kuzooba mapenzi mapati alubo bukali buzoobasikila bantu aaba.
24 Alubo bazoojayigwa apanga akutolwa kubuzike kuzisi zyoonse. Jerusalema unoolyatuukwa aazisi* kusikila ziindi zibikkidwe zyazisi* zizuzikizigwe.
25 “Alubo kuzooba zitondeezyo kuzuba, kumweezi akunyenyeezi alubo aanyika zisi zizoowomba kazitazi pe kuti zichite biyeni akaambo kakuvuuma kwalwizi akunyema kwalo.
26 Bantu bazoomana manguzu akaambo kakuyoowa akulangilila zintu zilikuza aanyika, nkaambo manguzu aakujulu azoozungaanisigwa.
27 Mpawo bazoobona Mwanaamuntu kaza mujoba kali aamanguzu abulemu bupati.
28 Pesi zyaakusaanguna kuchitika zintu eezi, amukayimikile nji mulange kujulu, nkaambo kufutulwa kwanu kunooli kwaba aafwiifwi.”
29 Mpawo wakababuzya chikozyanisyo, wakati: “Amulange mukuyu ayimwi minsamu yoonse.
30 Chiindi niisyuuka, ngamwalibonena amulikke akuziba kuti mayinza abaafwiifwi.
31 Munzila iikozyenie, andinywe kuti mwazoobona zintu eezi kazilikuchitika, amuzibe kuti Bwaami bwaLeza bwaba aafwiifwi.
32 Kwaamba choonzyo, ndimubuzya kuti, zyalani eeli talizooyindi pe kusikila zintu zyoonse zichitike.
33 Julu anyika zizooyinda pesi majwi aangu taazooyindi pe.
34 “Pesi amulichenjelele kuti myoyo yanu italemenwi akaambo kakulya zyiindilide, akunywa zyiindilide, amakataazyo aabuumi, mpawo buzuba oobo bubukaakumusikila kamulyiibide
35 mbuli kakole. Nkaambo buzoosikila bantu boonse bakkala aanyika yoonse.
36 Nkinkaako, amukkale kamulangide chiindi choonse, kamulikukomba nkombyo zyakukombelezya, kuchitila kuti muzookonzye kufutuka kuzintu zyoonse eezi zyeelede kuchitika akwiimikila kunembo lyaMwanaamuntu.”
37 Nkinkaako, sikati wakali kuyiisya mutempele pesi mansiku wakali kuzwa kuti akakkale kuchilundu chitegwa Chilundu chama-Olifa.
38 Alubo bantu boonse bakalikwiinka kulinguwe kuseeni loko kuti bakamuswiilile mutempele.
Makani Aamunsi
^ MuchiGrikki, “tulepita tubili, tweelene akkwadirani limwi.”
^ Naakuti, “akubukilana.”
^ Naakuti, “muzoowuzigwa.”
^ Naakuti, “aakubweedezya.”
^ Naakuti, “aabantu bazisi.”
^ Naakuti, “zyabantu bazisi.”
