Makani Aakalembwa aaLukka 2:1-52
2 Mumazuba aayo, kwakazwa mulawu kuli Kkesari Agasto wakuti bantu bamunyika yoonse bakalilembye.
2 (Kulilembya ooku kwakusaanguna kwakachitika chiindi Kkwiriniya naakali mweendelezi waSiriya.)
3 Nkinkaako, bantu boonse bakayinka kuti bakalilembye. Umwi awumwi wakayinka kumuunzi wakulimbabo.
4 Anguwe Josefa wakazwa kuNazareta iili muGalili mpawo wakatanta kaya kuBbetelehema iili muJudiya mumuunzi waDavida, nkaambo wakali wamung’anda awamumpuli yaDavida.
5 Josefa wakayinka kuti akalilembye aMariya, ooyo wakali waba mwanakazi wakwe mbuli mbubakasyomezyenie alubo wakali waba aafwiifwi kutumbuka.
6 Nibakali nkukooko, chakasika chiindi chakuti atumbuke.
7 Mpawo wakatumbuka mwana mulombe wakali wakusaanguna alubo wakamuputila aamalembo mpawo wakamulazika muchilido chabanyama nkaambo teekwakachilikwe ndawu yakuti bakkale mung’anda yabeenzu.
8 Mundawu eeyo, kwakali beembeli bakali kukkala mulusaka, kabali kulanga matanga aabo mansiku.
9 Aachiindi nchicheecho, ngilozi yaJehova* yakayimikila kunembo lyabo alubo bulemu bwaJehova* bwakamweka mpubakabede mpawo bakayoowa loko.
10 Pesi ngilozi yakati kulimbabo: “Mutayoowi pe. Nkaambo amubone, ndilikwaambilizya makani mabotu kulindinywe aali atala akubotelwa kupati bantu nkubatazoobaako.
11 Nkaambo sunu mumuunzi waDavida mwazyalwa mufutuli, uuli nguKkristu Mwaami.
12 Nchechi chitondeezyo: Muyoojana mwana uuputilidwe aamalembo kalazikidwe muchilido chabanyama.”
13 Aachiindi nchicheecho, kwakaboneka nkamu mpati yangilozi zyakujulu kazilaamwi angilozi eeyo kazilikutembawula Leza kaziti:
14 “Alemekwe Leza uuli kujulu lyamajulu alubo aanyika akube luumuno kubantu mbayanda Leza.”
15 Ngilozi nizyakazwa mpubakabede akubweeda kujulu, beembeli bakasaanguna kubuzyania kuti: “Atwiinke kuBbetelehema tukabone zyachitika, nzitwabuzigwa aaJehova.”*
16 Nkinkaako, bakayinka chakufwambaana mpawo bakajana Mariya aJosefa amwana kalazikidwe muchilido chabanyama.
17 Nibakabona zintu eezi, bakababuzya nzibakali babuzigwa atala amwana ooyo.
18 Alubo bantu boonse nibakamvwa zintu nzibakabuzigwa aabeembeli, bakagamba loko,
19 pesi Mariya wakasaanguna kubamba makani aaya woonse mumoyo wakwe, kalikuyeeyesesya kuti aambaanzi.
20 Mpawo beembeli bakabweeda kabalikulumbayizya akutembawula Leza nkaambo zintu zyoonse nzibakali bamvwa akubona zyakachitika mbuli mbubakabuzidwe.
21 Mubuzuba bwamusanu atutatu, nichakasika chiindi chakuti mwana apalulwe, bakamuuzika zina lyakuti Jesu, nkaambo ndiizina ndyaakapedwe aangilozi, banyina kabatanaba aada.
22 Alubo, nichakasika chiindi chakuti bazoosalazigwe kweendelana aMulawu waMozesi, bakayinkaawe kuJerusalema kuti bakamupe kuli Jehova,*
23 mbuli mbukulembedwe muMulawu waJehova* kuti: “Mwana mulombe wakusaanguna kuzyalwa, weelede kupegwa kuli Jehova.”*
24 Mpawo bakapa chipayizyo kweendelana azyaambwa muMulawu waJehova* kuti: “nziba zibili naakuti bana bankwilimba babili.”
25 Lino bona, kwakali umwi mwaalumi kuJerusalema uutegwa Simiyoni. Mwaalumi ooyu wakaliluleme, wakali kuyoowa Leza alubo wakali kulindila kuumbulizigwa kwama-Israyeli alubo muuya uusalala wakali aalinguwe.
26 Mukuyungizya, Leza wakamuyubunwida kwiinda mumuuya uusalala kuti taakali kuzoofwa pe katanabona Kkristu waJehova.*
27 Kazulwidwa aamuuya uusalala, Simiyoni wakanjila mutempele alubo bazyali baJesu nibakalikweeta mwana kuti bazoomuchitile eezyo zyakali kwaambwa muMulawu,
28 wakabweza mwana wamubukata mpawo wakatembawula Leza kati:
29 “Mwaami Singuzuzyoonse, lino muzike wako ulakonzya kweenda muluumuno kweendelana amakani ngwaakaamba,
30 nkaambo meso aangu abona nzila yako yalufutuko,
31 njwaakabamba kuti ibonwe abantu boonse,
32 mumuni uugwisya chintu chivumbide bantu bazisi kuti bataboni alubo mbulemu bwabantu bako ma-Israyeli.”
33 Wisi abanyina aamwana bakali kugamba akaambo kamakani aakali kwaambwa atala amwana.
34 Alubo Simiyoni wakabalongezya mpawo wakati kuli Mariya banyina aamwana: “Mwana ooyu uzoopa kuti bantu biingi bawe akuti babuke lubo mu-Israyeli alubo uzooba chitondeezyo chakwaambilwa majwi mabi,
35 (kwaamba choonzyo, iwe uzooyaswa aapanga damfu), kuchitila kuti zintu zili mumyoyo yabantu biingi ziyubununwe.”
36 Kwakali umwi mupolofita wachanakazi uutegwa Ana, mwana waFanuweli wamusyobo wa-Asha. Mwanakazi ooyu wakali wachembaala alubo wakali wakkala aamulumaakwe kwaminyaka iili musanu ayibili kuzwa naakakwatwa,*
37 pesi aachiindi eechi, wakali waba mukamufu alubo wakali waba aaminyaka iili 84. Nikuba oobo, taakali kubulika pe kutempele alubo wakali kubeleka mulimu uusalala sikati amansiku, kalyiimya kulya akukomba nkombyo zyakukombelezya.
38 Aachiindi eecho, wakaswena aafwiifwi mpawo wakasaanguna kulumba Leza, kalikwaambuula atala amwana ooyo kubantu boonse bakali kulindila kwaangununwa kwaJerusalema.
39 Nibakamaninsya kuchita zintu zyoonse kweendelana aMulawu waJehova,* bakabweeda kumuunzi wakulimbabo kuNazareta iili muGalili.
40 Mwana wakali kukomena akusima, akuzuzigwa busongo alubo wakayinkilila kunembo kuyandwa aaLeza.
41 Munyaka amunyaka, bazyali bakwe bakazibide kuya kuJerusalema kupobwe lyaPasika.
42 Naakaba aaminyaka iili 12, bakatanta kabaya kuJerusalema kweendelana ambukwakali kuchitwa muchiindi chapobwe.
43 Naakamana mazuba aapobwe, alubo kabalikubweeda kulimbabo, Jesu wakasyaala kuJerusalema pesi bazyali bakwe teebakazibona pe.
44 Kabayeeya kuti ulimubantu mbibakali kweendaabo, bakeenda musinzo wabuzuba bumwi mpawo bakasaanguna kumuyanduula mubabbululu amubeenzinyina.
45 Pesi nibakamubula, bakabweeda kuJerusalema mpawo bakamuyanduula koonse-koonse.
46 Nikwakayinda mazuba aatatu, bakamujana mutempele kakkede aakati kabayiisi, kalikuswiilila akubabuzya mibuzyo.
47 Pesi bantu boonse bakali kumuswiilila, bakali kugamba akaambo kakumvwisisisya kwakwe ansandulo zyakwe.
48 Bazyali bakwe nibakamubona, bakagamba loko, mpawo banyina bakati kulinguwe: “Mwanaangu, nkamboonzi nwaachita oobu? Ime awuso toomba kukuyanduula.”
49 Pesi wakabasandula kuti: “Ani mwalikundiyandwiidaanzi? Tamuzi na kuti ndeelede kuba mung’anda yaTaata?”
50 Nikuba oobo, teebakazimvwisisisya pe nzyaakali kwaamba.
51 Mpawo wakakunuka ambabo, wabweeda kuNazareta alubo wakayinkilila kunembo kulibombya kulimbabo.* Banyina bakaabamba mumoyo wabo makani aaya woonse.
52 Jesu wakali kuya bukomena akuba aabusongo bwiingi alubo wakali kuyandwa aaLeza abantu.
Makani Aamunsi
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala. MuchiGrikki, “kwaambwa kuti ulasalala kuli Jehova.”
^ Langa Bupanduluzi Bwamabala.
^ Langa Bupanduluzi Bwamabala.
^ MuchiGrikki, “kubusimbi bwakwe; kali nakalindu.”
^ Langa Bupanduluzi Bwamabala.
^ Naakuti, “kubaswiilila.”
