Kulonga 9:1-35
9 Nkinkaako, Jehova wakati kuli Mozesi: “Yinka kuli Faro ukamubuzye kuti, ‘Jehova Leza wamaHebberu waamba kuti: “Leka bantu bangu beende, kuchitila kuti bakandibelekele.
2 Pesi kuti uleke kubazumizya alubo wiinkilile kunembo kubakasya kuti beende,
3 kuboko kwaJehova kuzoowuma zivuubwa zyako zili kumachezezyo. Kuzooba bulwazi bubi loko kumabbiza, kumadonki, kunkamela, kung’ombe akumbelele.
4 Jehova uzoopa kuti kube musiyano aakati kazivuubwa zyama-Israyeli azivuubwa zyama-Ijipita, taakwe chivuubwa chama-Israyeli chitazoofwe pe.”’”
5 Jehova wakabikka chiindi naakali kuzoozichita, wakati: “Ime ndiJehova ndizoochita zintu eezi juunza.”
6 Jehova wakachita zintu eezi mubuzuba bwakatobela mpawo misyobo yoonse yazivuubwa zyama-Ijipita yakasaanguna kufwa. Pesi, taakwe chivuubwa chama-Israyeli nichiba chimwi chakafwa.
7 Faro naakabuzya, wakajana kuti taakwe chivuubwa chama-Israyeli nichiba chimwi chakali chafwa. Nikuba oobo, Faro wakayinkilila kunembo kuyumya moyo alubo taakabaleka pe bantu kuti beende.
8 Mpawo Jehova wakati kuli Mozesi a-Aroni: “Amuzuzye maboko aanu amuye wamuhondo mpawo Mozesi weelede kuuwaala mujulu kunembo lyaFaro.
9 Mpawo ulaba lusuko munyika yoonse ya-Ijipita akuba matumba kubantu akubanyama munyika yoonse ya-Ijipita.
10 Nkinkaako, bakabweza muye kuzwa muhondo baakwiimikila kunembo lyaFaro alubo Mozesi wakawuwaala mujulu mpawo bantu abanyama bakaba aamatumba aayawuka.
11 Bapayizi basimasalamusi teebakakonzya pe kwiimikila kunembo lyaMozesi akaambo kamatumba, nkaambo akali aba aalimbabo akuma-Ijipita boonse.
12 Pesi Jehova wakamuleka Faro kuti ayumye moyo, taakabaswiilila pe mbuli mbaakaambide Jehova kuli Mozesi.
13 Jehova wakati kuli Mozesi: “Ubuke kuseeni, ukayimikile kunembo lyaFaro umubuzye kuti, ‘Nzezi nzyaamba Jehova Leza wamaHebberu: “Leka bantu bangu beende, kuchitila kuti bakandibelekele.
14 Nkaambo lino ndilalanzya zipenzyo zyangu zyoonse kuti zyuume moyo wako, babelesi bako abantu bako, kuchitila kuti uzibe kuti taakwe uuli mbuli ndime munyika yoonse.
15 Nkaambo nikuli ndakatandabika kale kuboko kwangu kuti ndikuume abulwazi bubi, iwe abantu bako alubo nikuli tuchiwo pe* aanyika.
16 Pesi ndakusiya kuli muumi akaambo kakaambo aaka: kuti ndikutondeezye manguzu aangu akuti zina lyangu lyaambilizigwe munyika yoonse.
17 Uchilisumpula na kwiinda mukukasya bantu bangu kuti beende?
18 Juunza aachiindi nchicheechi, ndilapa kuti kuwe chivulamabwe chipati chitanaba abuzuba chaba kuzwa niyakaba Ijipita kusikila sunu.
19 Nkinkaako, tuma jwi lyakuti zivuubwa zyako zyoonse azintu zyako zyoonse zili musokwe zyeetwe aandawu iikwabilidwe. Muntu woonse naakuti munyama uutazoojanike musokwe katali mung’anda, uzoofwa chazoowa chivulamabwe.”’”
20 Kufumbwa babelesi baFaro bakayoowa jwi lyaJehova bakafwambaana kweeta babelesi babo azivuubwa zyabo mumaanda.
21 Pesi aabo bakayumya myoyo yabo kuti bataswiilili jwi lyaJehova, bakaleka babelesi babo azivuubwa zyabo musokwe.
22 Jehova wakati kuli Mozesi: “Tambika kuboko kwako kujulu, kuchitila kuti chivulamabwe chiwe aanyika yoonse ya-Ijipita, chiwide bantu abanyama azintu zyoonse zimena aanyika ya-Ijipita.”
23 Nkinkaako, Mozesi wakatambika mufunko wakwe kujulu mpawo Jehova wakapa kuti kube kudilima achivulamabwe alubo mulilo* wakawa aanyika. Jehova wakapa kuti chivulamabwe chiinkilile kunembo kuwa aanyika ya-Ijipita.
24 Kwakaba chivulamabwe alubo mulilo wakali kumweka muchivulamabwe. Chakali chipati loko; taakwe nikwakawide chivulamabwe chipati oobo pe kuzwa niyakabawo nyika ya-Ijipita.
25 Chivulamabwe chakajaya zintu zyoonse zyakali musokwe munyika ya-Ijipita kuzwa kumuntu kusikila kumunyama. Chakawuma zimena zyoonse alubo chakanyonyoona minsamu yoonse yamusokwe.
26 Pesi nyika yaGosheni, ooko kwakali kukkala ma-Israyeli teekwakali chivulamabwe pe.
27 Nkinkaako, Faro wakayita Mozesi a-Aroni mpawo wakati kulimbabo: “Lino ndazumina kuti ndabisya. Jehova uliluleme, pesi ime abantu bangu ndiswe twabisya.
28 Amukombelezye Jehova, kuchitila kuti kudilima achivulamabwe zimane. Mpawo ndilamuzumizya kuti mweende, tamukookkala pe.”
29 Mozesi wakati kulinguwe: “Kandilikuzwa kupela mumuunzi, ndilatambika maboko aangu kuli Jehova. Kudilima kulayimikila alubo chivulamabwe tachikooyinkilila kunembo pe, kuchitila kuti uzibe kuti nyika njiyaJehova.
30 Nikuba kuti ndachita oobo, ndilizi kuti iwe ababelesi bako tamukoomuyoowa pe Jehova Leza.”
31 Fulakisi* abbali zyakali zyanyonyooka nkaambo bbali yakali yaba aafwiifwi kubizwa alubo fulakisi yakali yafulula.
32 Pesi wiiti asipeleti* teezyakanyonyoonwa pe nkaambo teezyakalinabizwa pe.
33 Mozesi wakazwa mumuunzi mwakali Faro, waakutambika maboko aakwe kunembo lyaJehova, mpawo kudilima achivulamabwe zyakayimikila alubo mvula yakaleka kuwa aanyika.
34 Faro naakabona kuti mvula, chivulamabwe akudilima zyayimikila, wakabisya lubo alubo wakayumya moyo. Babelesi bakwe ambabo bakayumya myoyo yabo.
35 Faro wakayinkilila kunembo kuyumya moyo alubo taakabaleka pe ma-Israyeli kuti beende, mbuli mbaakaambide Jehova kabelesya Mozesi.
Makani Aamunsi
^ Naakuti, “wakaloba.”
^ Zilakonzya kwaamba tulabi tuyoosya.
^ Eechi nchilimwa chakali kulimwa kuzwa chiindi alubo chibelesegwa kupanga milembo mibotu.
^ Sipeleti nguumwi musyobo wawiiti iilangilwa aansi yakali kulimwa ku-Ijipita.
