Kulonga 6:1-30
6 Jehova wakati kuli Mozesi: “Ulabona nzinditamuchite Faro. Kuboko kuli aamanguzu kulapa kuti abaleke kuti beende alubo kulapa kuti abatande munyika yakwe.”
2 Mpawo Leza wakati kuli Mozesi: “Ndime Jehova.
3 Ndakali kulibonia kuli Abbrahamu, Izakka aJakkobo kandili Leza Singuzuzyoonse, pesi teendakabazibya pe zina lyangu lyakuti Jehova.
4 Alubo ndakapanga chizuminano ambabo chakuti ndibape nyika yaKkenani eeyo njibakali kukkala kabali beenzu.
5 Lino ime lwangu, ndakumvwa kulila kwama-Israyeli bajiswi buzike ama-Ijipita alubo ndachiyeeya chizuminano changu.
6 “Nkinkaako, buzya ma-Israyeli kuti: ‘Ndime Jehova, ndizoomugwisya kumilimu iiminia yama-Ijipita alubo ndizoomuvuna mubuzike akuboko kwangu kutandabikidwe* achisubulo chipati.*
7 Ndizoomubweza kuti mube bantu bangu mpawo ndizooba Leza wanu. Choonzyo, muzooziba kuti ndime Jehova Leza wanu uulikumugwisya kumilimu iiminia yama-Ijipita.
8 Ndizoomutola kunyika njindakakonkezya muchikonke* kuti ndilayipa Abbrahamu, Izakka aJakkobo alubo ndizoomupa njiyo kuti ibe yanu. Ndime Jehova.’”
9 Mozesi wakazoobuzya ma-Israyeli mulumbe ooyu, pesi akaambo kakumana manguzu akujatwa chalunya mubuzike, teebakamuswiilila pe.
10 Mpawo Jehova wakabuzya Mozesi kuti:
11 “Yinka kuli Faro mwaami wa-Ijipita, ukamubuzye kuti agwisye ma-Israyeli munyika yakwe.”
12 Pesi Mozesi wakasandula Jehova kuti: “Bona, ma-Israyeli teebandiswiilila pe, Faro nga ulandiswiilila na, mbukunga tandikonzyi pe kwaambuula kabotu?”*
13 Pesi Jehova wakabuzya Mozesi a-Aroni malayilile ngibakeelede kubuzya ma-Israyeli aFaro mwaami wa-Ijipita, kuchitila kuti ma-Israyeli bagwisigwe munyika ya-Ijipita.
14 Aaba mbiibasilutwe bamaanda aamawisi: Bana baRubbeni, mwana wa-Israyeli wakusaanguna, bakali Hanokki, Palu, Hezironi aKkami. Eezi niimpuli zyaRubbeni.
15 Bana baSimiyoni bakali Jemuyele, Jamini, Ohadi, Jakkini, Zohari aShawulu mwana wamwanakazi muKkenani. Eezi niimpuli zyaSimiyoni.
16 Aaya ngiimazina aabana baLevi, kweendelana ampuli zyabo: Geshoni, Kkohati aMerari. Levi wakapona minyaka iili 137.
17 Bana baGeshoni bakali Libbini aShimeyi kweendelana ampuli zyabo.
18 Bana baKkohati bakali Amuramu, Izare, Hebburoni a-Uziyele. Kkohati wakapona minyaka iili 133.
19 Bana baMerari bakali Mali aMushi.
Eezi nziizyakali mpuli zyaLevi kweendelana ampuli zyabo.
20 Amuramu wakakwata Jokkebbedi muchizi wawisi mpawo wakamuzyalila Aroni aMozesi. Amuramu wakapona minyaka iili 137.
21 Bana ba-Izare bakali Kkora, Nefegi aZikkiri.
22 Bana ba-Uziyele bakali Mishayeli, Elizafani aSitiri.
23 Aroni wakakwata Elishebba mwana musimbi wa-Aminadabbu muchizi waNasoni mpawo wakamuzyalila Nadabbu, Abbihu, Eliyezari a-Itamara
24 Bana baKkora bakali Asire, Elikkana a-Abbiyasafu. Eezi nziizyakali mpuli zyaKkora.
25 Eliyezari mwana wa-Aroni wakakwata umwi wabana basimbi baPutiyeli mpawo wakamuzyalila Finiyasi.
Aaba mbiibakali basilutwe bamaLevi kweendelana ampuli zyabo.
26 Ooyu nguu-Aroni aMozesi, Jehova mbaakabuzya kuti: “Amugwisye ma-Israyeli munyika ya-Ijipita kabali makamu-makamu.”
27 Mozesi a-Aroni mbabo bakaambuula aaFaro mwaami wa-Ijipita kuti ma-Israyeli bagwisigwe mu-Ijipita.
28 Mubuzuba oobo, Jehova naakaambuula aaMozesi munyika ya-Ijipita,
29 Jehova wakabuzya Mozesi kuti: “Ndime Jehova. Buzya Faro mwaami wa-Ijipita majwi woonse ngindakubuzya.”
30 Mpawo Mozesi wakasandula Jehova kuti: “Faro nga ulandiswiilila na, mbukunga tandikonzyi pe kwaambuula kabotu?”*
Makani Aamunsi
^ Naakuti, “akuboko kuli aamanguzu.”
^ MuchiHebberu, “ambeta mpati.”
^ Naakuti, “mukutambika kuboko.”
^ MuchiHebberu, “milomo yangu tayipalwidwe pe.”
^ MuchiHebberu, “milomo yangu tayipalwidwe pe.”
