Joshuwa 5:1-15
5 Baami boonse bama-Amori ibakali kububbila* kwaJodani abaami boonse bamaKkenani bakali kumbali aalwizi, nibakamvwa kuti Jehova wayuminizya maanzi aamuli Jodani kunembo lyama-Israyeli kusikila nibakazubuka, bakazwa moyo* alubo bakamana manguzu akaambo kama-Israyeli.
2 Aachiindi eecho, Jehova wakabuzya Joshuwa kuti: “Panga tufulo twabbwe jumu upalule* ma-Israyeli.”
3 Joshuwa wakapanga tufulo twabbwe jumu wapalula baalumi bachi-Israyeli kuGibbeyati-haaraloti.*
4 Chakapa kuti Joshuwa abapalule nchakuti: Baalumi boonse ibakazwa mu-Ijipita, baalumi boonse bankondo,* bakali bafwa munkanda nibakali mulweendo kuzwa ku-Ijipita.
5 Bantu boonse ibakazwa ku-Ijipita bakalipalwidwe. Pesi bantu boonse bakazyalilwa munkanda nibakali munzila kuzwa ku-Ijipita teebakapalwidwe pe.
6 Ma-Israyeli bakeenda munkanda kwaminyaka iili 40 kusikila chafwa chisi choonse, nkukwaamba baalumi bankondo bakazwa mu-Ijipita bakataswiilila jwi lyaJehova. Jehova wakakonka kulimbabo kuti tazoobazumizyi pe kuti babone nyika Jehova njaakakonkezya kumasianyinakulu kuti uzootupa, nyika iikunka malili abuchi.
7 Nkinkaako, wakabusya bana babo mundawu yabo. Bana aaba bakapalulwa aaJoshuwa; teebakapalwidwe pe nkaambo teebakabapalula pe mulweendo.
8 Nibakamaninsya kupalula chisi choonse, bakakkala nkubakabede mukkeempu kusikila nibakapona.
9 Mpawo Jehova wakati kuli Joshuwa: “Sunu ndaagwisya masampu aamu-Ijipita aakali aalindinywe.” Nkinkaako, ndawu eeyo yakawuzikwa kuti Giligali* kusika sunu.
10 Ma-Israyeli bakalikkempede kuGiligali mpawo bakasekelela Pasika goko mubuzuba bwachi 14 bwamweezi ooyo munkanda yakuJerikko.
11 Bakasaanguna kulya michelo yanyika nilyakayinda Pasika. Mubuzuba oobo, bakalya chinkwa chitakwe bumena azilyo ziyokedwe.
12 Mana yakaleka kuba mubuzuba bwakatobela nibakalya michelo yanyika; ma-Israyeli teebakachili kujana mana pe, pesi mumunyaka nguyooyo, bakasaanguna kulya michelo yanyika yaKkenani.
13 Joshuwa naakaba aafwiifwi aJerikko, wakalanga mpawo wakabona mwaalumi wakayimvwi kunembo lyakwe kajisi panga lisomwedwe. Joshuwa wakayinka kulinguwe mpawo wakati: “Ulikubbazu lyesu na, naakuti ulikubbazu lyabasinkondoma?”
14 Wakasandula kuti: “Peepe, ndaza kandili silutwe* wamakamu aaJehova.” Mpawo Joshuwa wakaliwaala aansi wavuntama, mpawo wakati kulinguwe: “Mwaami wangu uyanda kumubuzyaanzi mubelesi wakwe?”
15 Silutwe wamakamu aaJehova wakasandula Joshuwa kati: “Gwisya manyatela aako, nkaambo aandawu mpuyimvwi alasalala.” Joshuwa wakachita mbuboobo mpawaawo.
Makani Aamunsi
^ MuchiHebberu, “kubbazu lyakulwizi.”
^ MuchiHebberu, “myoyo yabo yakayaaya.”
^ MuchiHebberu, “ubapalule kachibili.”
^ Nkukwaamba chilundu chazikanda.
^ Naakuti, “bakali kweelela kuya kunkondo.”
^ Nkukwaamba kuti, “Kukunkulisya.”
^ Naakuti, “mwaami.”
