Joshuwa 15:1-63
15 Nyika yakapegwa musyobo* waJuda ampuli zyawo yakali kusika kumugaano wa-Edomu, nkanda yaZini kuyoosika kuNegebbu kumagolelo aayo nkwiili kumusanza.
2 Mugaano wabo wakumusanza wakali kusaangunina kumagolelo aaLwizi lwaMunyo,* kumusundila uuli kumusanza.
3 Wakayinda kawutozya kumusanza kumatantilo aa-Akkirabbimu. Kuzwa ooko, wakayinda muZini mpawo watanta kawutozya kubbazu lyakumusanza kuKkadeshi-bbaneya wayinda muHezironi kuyoosika ku-Adari mpawo wakali kuzyunguluka kawuya kuKkakka.
4 Mpawo wakali kwiinda mu-Azimoni kuyoosika kuMulonga* wa-Ijipita alubo mugaano ooyo wakali kugolela kuLwizi.* Ooyu nguwo wakali mugaano wabo wakumusanza.
5 Mugaano wakubuzwezuba wakali Lwizi lwaMunyo* kuyoosika kumagolelo aaJodani, alubo mugaano wakunyika wakali kunyonena kumulomo walwizi, kumagolelo aaJodani.
6 Mugaano wakali kutanta kawuya kuBbeti-hogila kuuyinda kuBbeti-arabba nkwiili kunyika, alubo wakali kutanta kuyoosika kubbwe lyaBbohani mwana waRubbeni.
7 Mugaano wakali kutanta kawuya kuDebbiri muKkuti* lya-Akkori mpawo wanyona waya kubbazu lyakunyika kwaGiligali, iilangene aamatantilo aa-Adumimu, nkukwaamba kumusanza kwamulonga, alubo wakali kwiinda kumaanzi aaku-Eni-shemeshi kawugolela ku-Eni-rogeli.
8 Mugaano ooyo wakali kutanta kawuya kuKkuti* lyaMwana waHinomu kusika kumunkunu wamaJebbusi uuli kumusanza, nkukwaamba Jerusalema, alubo wakali kwiinda muchilundu chilangene aaKkuti* lyaHinomu kububbila, chili kumagolelo aaKkuti* lyaRefayimu kubbazu lyakunyika.
9 Alubo mugaano wakali kusaangunina aajulu aachilundu kuyoosika kutusawu twamaanzi aakuNefitowa alubo wakali kusika kumyuunzi yaChilundu cha-Efroni; mugaano wakali kusika kuBbaala, nkukwaamba Kkiriyati-jeyarimu.
10 Mugaano wakali kuzyunguluka kuzwa kuBbaala nkwiili kububbila kuyoosika kuChilundu chaSeyiri alubo wakali kwiinda kumunkunu waChilundu chaJeyarimu nkuchili kunyika, nkukwaamba Kkasaloni mpawo wakali kukunuka kawuya kuBbeti-shemeshi wayinda kawuya kuTimina.
11 Alubo mugaano wakali kusika kumunkunu wa-Ekkironi nkwiili kunyika mpawo wakali kusika kuShikkeroni. Kuzwa ooko, wakali kwiinda muChilundu chaBbaala kawusika kuJabbineli kawugolela kulwizi.
12 Mugaano wakububbila wakali kuLwizi Lupati* ankomwe yalo. Ooyu ngwaakali mugaano wabana baJuda ampuli zyabo mumabazu woonse.
13 Kkalebbu mwana waJefune wakapegwa chaabilo aakati kabana baJuda kweendelana amalayilile Jehova ngaakapa Joshuwa, wakamupa Kkiriyati-abba (Abba wakali wisi wa-Anakki), nkukwaamba Hebburoni.
14 Kkalebbu wakatanda bana ba-Anakki batatu: Sheshayi, Ahimani aTalimayi, bana ba-Anakki.
15 Naakazwa nkukooko, wakatanta waakulwana bantu bakali kukkala muDebbiri. (Chiindi Debbiri yakali kwiitwa kuti Kkiriyati-seferi.)
16 Mpawo Kkalebbu wakati: “Muntu uutalwane muunzi waKkiriyati-seferi akuuzunda, ndilamupa mwanaangu musimbi Akkisa kuti abe mwanakazi wakwe.”
17 Mpawo Otiniyeli mwana waKkenazi mwanike waKkalebbu wakawubweza. Nkinkaako, wakamupa mwanaakwe Akkisa kuti abe mwanakazi wakwe.
18 Akkisa naakali kuya kung’anda, wakakombelezya mulumaakwe kuti akumbile muunda kuli wisi. Akkisa wakaseluka aadonki lyakwe.* Mpawo Kkalebbu wakamubuzya kuti: “Uyandaanzi?”
19 Akkisa wakasandula kuti: “Inche kaka ndilongezye, nkaambo wakandipa nyika iili kumusanza;* ndipe lubo aGuloti-mayimu.”* Nkinkaako, wakamupa Guloti Yaatala aGuloti Yamunsi.
20 Oolu ndulo lwakali lukono lwamusyobo waJuda kweendelana ampuli zyawo.
21 Myuunzi yakali kumagolelo yamusyobo waJuda kuya kumugaano wa-Edomu nkuuli kumusanza yakali: Kabbuzeeli, Ederi, Jaguri,
22 Kkina, Dimona, Adada,
23 Kkedeshi, Hazori, Itanani,
24 Zifi, Telemu, Bbeyaloti,
25 Hazori-hadata, aKkeriyoti-hezironi, nkukwaamba Hazori,
26 Amamu, Shema, Molada,
27 Hazari-gada, Heshimoni, Bbeti-peleti,
28 Hazari-shuwali, Bberi-shebba, Bbiziyotiya,
29 Bbaala, Ayimu, Ezemu,
30 Elitoladi, Kkesili, Homa,
31 Zikkilagi, Madimana, Sanasana,
32 Lebbayoti, Shilihimu, Ayini, aRimoni—myuunzi yoonse yakali 29 kuswaanizya atuunzi twayo.
33 MuShefela mwakali: Eshitayoli, Zora, Ashina,
34 Zanowa, Eni-ganimu, Tapuwa, Enamu,
35 Jamuti, Adulamu, Sokko, Azekka,
36 Shaarayimu, Aditayimu, aGedera aGederotayimu*—myuunzi iili 14 atuunzi twayo.
37 Zenani, Hadasha, Migidali-gadi,
38 Dileyani, Mizipe, Jokkiteli,
39 Lakkishi, Bbozikkati, Egiloni,
40 Kkabboni, Lahimamu, Kkitilishi,
41 Gederoti, Bbeti-dagoni, Naama, aMakkeda—myuunzi iili 16 atuunzi twayo.
42 Libbina, Eteri, Ashani,
43 Ifata, Ashina, Nezibbi,
44 Kkeyila, Akkizibbu, aMaresha—myuunzi iili musanu ayine atuunzi twayo.
45 Ekkironi amyuunzi yayo miniini* atuunzi twayo tuuzyungulukide;
46 kuzwa ku-Ekkironi kuya kububbila andawu zyoonse zibambene aa-Ashidodi atuunzi twayo.
47 Ashidodi, myuunzi yayo miniini* atuunzi twayo; Gaza amyuunzi yayo miniini atuunzi twayo kuyoosika kuMulonga wa-Ijipita aLwizi Lupati* achilawu chili munsi aalo.
48 Mpawo muchilawu chili aazilundu kwakali: Shamiri, Jatiri, Sokko,
49 Dana, Kkiriyati-sana, nkukwaamba Debbiri,
50 Anabbu, Eshitemo, Animu,
51 Gosheni, Holoni, aGilo—myuunzi iili 11 atuunzi twayo.
52 Arabbu, Duma, Eshani,
53 Janimu, Bbeti-tapuwa, Afekka,
54 Humuta, Kkiriyati-abba, nkukwaamba Hebburoni, aZiyori—myuunzi iili musanu ayine atuunzi twayo.
55 Mayoni, Kkameli, Zifi, Juta,
56 Jezriyeli, Jokkideyamu, Zanowa,
57 Kkayini, Gibbeya, aTimina—myuunzi iili kkumi atuunzi twayo.
58 Halihuli, Bbeti-zuri, Gedori,
59 Maarati, Bbeti-anoti, a-Elitekkoni—myuunzi iili musanu awumwi atuunzi twayo.
60 Kkiriyati-bbaala, nkukwaamba Kkiriyati-jeyarimu, aRabba—myuunzi iibili atuunzi twayo.
61 Mpawo munkanda mwakali: Bbeti-arabba, Midini, Sekkakka,
62 Nibbishani, Muunzi waMunyo, a-Eni-gedi—myuunzi iili musanu awumwi atuunzi twayo.
63 Pesi baalumi baJuda bakakachilwa kutanda maJebbusi bakali kukkala muJerusalema. Nkinkaako, maJebbusi bachikkala aamaJuda muJerusalema kusika sunu.
Makani Aamunsi
^ Naakuti, “kwiinda mukuuma chisale kumusyobo.”
^ Nkukwaamba Lwizi Lufwide.
^ Langa Bupanduluzi Bwamabala.
^ Nkukwaamba Lwizi Lupati, lwaMediterranean.
^ Nkukwaamba Lwizi Lufwide.
^ Bamwi bati “Musena.”
^ Bamwi bati “Musena.”
^ Bamwi bati “Musena.”
^ Bamwi bati “Musena.”
^ Nkukwaamba Lwizi lwaMediterranean.
^ Amwi malembe ati, “Wakoombela naakakkede aadonki.”
^ Naakuti, “Negebbu.”
^ Nkukwaamba kuti, “Ndido Zyamaanzi.”
^ Amwi malembe ati, “Gedera amabondo aayo aambelele.”
^ Naakuti, “iizyungulukide.”
^ Naakuti, “iizyungulukide.”
^ Nkukwaamba Lwizi lwaMediterranean.
