Joshuwa 1:1-18
1 Naakafwa Mozesi mubelesi waJehova, Jehova wakati kuli Joshuwa* mwana waNuni, mubelesi waMozesi:
2 “Mozesi mubelesi wangu wafwa. Nyampuka uzubuke Jodani abantu boonse aaba unjile munyika njindilikubapa ma-Israyeli.
3 Kufumbwa ndawu njimutazoolyate ndizoomupa njiyo, mbuli mbundakasyomezya Mozesi.
4 Chilawu chanu chilatalikila kunkanda kusika kuLebbanoni akumulonga mupati waYufurati anyika yoonse yamaHeti akuLwizi Lupati* luli kububbila.
5 Taakwe uutazookonzye kulwana aanduwe kufumbwa kawuchili muumi. Ndinooli aanduwe mbuli mbundakali aaMozesi. Tandizookulekelezyi pe nikuba kukusiya.
6 Sima ube aachibindi, nkaambo nduwe utazoope kuti bantu aaba bakone nyika njindakakonkezya kumasianyinakulu kuti ndizoobapa.
7 “Sima ube aachibindi, ubambe Mulawu woonse ngwaakakulayilila Mozesi mubelesi wangu. Utazwi pe mulinguwo kuya kuchilisyo naakuti kuchimweensi, kuchitila kuti uchite chabusongo koonse nkuya.
8 Bbuku eeli lyaMulawu talyeelede kuzwa pe aamulomo wako. Weelede kulibala ajwi lili aansaansi* sikati amansiku, kuchitila kuti ubambe majwi woonse aali mulindilyo. Mpawo uzoozwidilila munzila zyako alubo unoochita chabusongo.
9 Teendakulayilila na? Sima ube aachibindi. Utazazami nikuba kuyoowa, nkaambo ime ndiJehova Leza wako ndinooli aanduwe kufumbwa nkuya.”
10 Mpawo Joshuwa wakalayilila basilutwe babantu kuti:
11 “Amunjile mukkeempu mulayilile bantu kuti, ‘Amulibambile chakulya chamulweendo, nkaambo mubuzuba bwachitatu muzoozubuka Jodani kuti munjile mubweze nyika Jehova Leza wanu njalikumupa kuti kuti ibe yanu.’”
12 Mpawo Joshuwa wakabuzya musyobo waRubbeni, waGadi ahafu yamusyobo waManase kuti:
13 “Amuyeeye nzyaakamulayilila Mozesi mubelesi waJehova naakati: ‘Jehova Leza wanu ulikumupa kulyookezya alubo wamupa nyika eeyi.
14 Banakazi banu, bana banu azivuubwa zyanu zizookkala munyika Mozesi njaakamupa mutala eelino* lyaJodani, pesi inywe nibasilumamba moonse muli aamanguzu, mweelede kuzubuka kunembo lyabananyokwe kamulibambilide nkondo. Mweelede kubagwasya
15 kusikila Jehova abape kulyookezya mbuli mbaakamupa. Beelede kubweza nyika Jehova Leza wanu njalikubapa. Mpawo muboole munyika njimwakapegwa kuti mukkale mulinjiyo mwiibweze ibe yanu, nyika Mozesi mubelesi waJehova njaakamupa kubuzwezuba kwaJodani.’”
16 Mpawo bakasandula Joshuwa kabati: “Tulazichita zyoonse nzwaatulayilila, alubo tulayinka kufumbwa nkutatutume.
17 Tunookuswiilila mbuli mbutwakali kuswiilila Mozesi muzintu zyoonse nzyaakali kwaamba. Jehova Leza wako abe aanduwe mbuli mbaakali aaMozesi.
18 Kufumbwa muntu uukupapila awutaswiilili majwi aako woonse ulajayigwa. Iwe sima biyo ube aachibindi.”
Makani Aamunsi
^ Naakuti, “Jehoshuwa,” nkukwaamba kuti, “Jehova Ndufutuko.”
^ Nkukwaamba Lwizi lwaMediterranean.
^ Naakuti, “uyeeyesesye atala andilyo.”
^ Nkukwaamba kubuzwezuba.
