Makani Aakalembwa aaJohane 21:1-25
21 Nizyakayinda zintu eezi, Jesu wakalitondeezya lubo kuli basikwiiya kuLwizi lwaTibberiya. Wakalitondeezya munzila eeyi:
2 Simoni Petro, aTomasi (ooyo wakali kutegwa Mumbile), aNataniyeli wakuKkana yakuGalili, abana baZebbediya abamwi basikwiiya bakwe babili, bakalaamwi.
3 Simoni Petro wakati kulimbabo: “Ndiya kukuteya baswi.” Mpawo bakati kulinguwe: “Tulayinkaamwi.” Mpawo bakazwa baakutanta bwaato, pesi taakwe nchibakacha pe mubusiku mbuboobo.
4 Nikuba oobo, kubuchedo, Jesu wakayimikila kunkomwe yalwizi, pesi basikwiiya teebakamuziba pe kuti wakali nguwe.
5 Mpawo Jesu wakababuzya kuti: “Bana bangu, mulaachakulya na?”* Bakati: “Peepe!”
6 Mpawo wakati kulimbabo: “Amuwaale kanyandi kubbazu lyachilisyo chabwaato mpawo mulacha baswi.” Bakachita oobo, pesi bakakachilwa kukakwela nkaambo bakacha baswi biingi.
7 Mpawo sikwiiya wakali kuyandwa aaJesu, wakati kuli Petro: “NguMwaami.” Mpawo Simoni Petro naakamvwa kuti nguMwaami, wakazwaata chigogo chakwe chaajulu nkaambo wakali mudundulu,* mpawo wakaliwaalila mulwizi.
8 Pesi bamwi basikwiiya bakatobela abwaato buniini, kabalikukwela kanyandi kakazwide baswi, nkaambo teebakali kule pe anyika njumu, wakali musinzo wamamita aakasisike ku 100.*
9 Nibakasika kumbali aalwizi, bakabona mulilo wamakala alubo aamulilo ooyu, kwakali baswi achinkwa.
10 Mpawo Jesu wakati: “Amweete bamwi baswi mbimwajata lino.”
11 Nkinkaako, Simoni Petro wakanjila mubwaato mpawo wakakakwelela kunkomwe yalwizi kanyandi kakazwide baswi bapati bali 153. Nikuba kuti baswi bakali biingi oobu pesi teekakadeluka pe.
12 Mpawo Jesu wakati kulimbabo: “Amuze muzoolye.” Nikuba oobo, taakwe naaba uumwi wabasikwiiya wakaba aachibindi chakumubuzya kuti: “Nduweni?” nkaambo bakalizi kuti nguMwaami.
13 Jesu wakasika mpawo wakabweza chinkwa wabapa. Alubo wakachita zikozyenie akubaswi.
14 Aaka kakali kachitatu, Jesu kalitondeezya kuli basikwiiya bakwe, kuzwa naakabusigwa kuzwa kubafu.
15 Nibakamaninsya kulya, Jesu wakati kuli Simoni Petro: “Simoni, mwana waJohane, ulandiyanda na kwiinda eezi?” Mpawo wakasandula kuti: “Iiyi Mwaami, ulizizi kuti ndikuyanda loko.” Mpawo wakati: “Sanina tubelele twangu.”
16 Mpawo Jesu wakamubuzya lubo kachibili kuti: “Simoni, mwana waJohane, ulandiyanda na?” Mpawo wakasandula kuti: “Iiyi Mwaami, ulizizi kuti ndikuyanda loko.” Mpawo wakati: “Yembela tubelele twangu.”
17 Mpawo Jesu wakamubuzya lubo kachitatu kuti: “Simoni, mwana waJohane, ulandiyanda na choonzyo?” Petro wakawusa Jesu naakamubuzya kachitatu kuti: “Ulandiyanda na choonzyo?” Nkinkaako, Petro wakati kulinguwe: “Mwaami, ulizizi zintu zyoonse alubo ulizizi kuti ndikuyanda loko.” Jesu wakati kulinguwe: “Sanina tubelele twangu.
18 Kwaamba choonzyo, ndikubuzya simpe kuti, kuchili mwana wakali kulizwaatika alubo wakali kweendeenda kufumbwa nkuyanda. Pesi waakuchembaala, uzootalamuna maboko kuti umwi muntu akuzwaatike alubo uzookutola nkutayandi pe.”
19 Jesu wakaamba zintu eezi kuti atondeezye kuti Petro wakali kuzoofwa biyeni kuti Leza alemekwe. Jesu naakazwa kwaamba oobo, wakati kulinguwe: “Yinkilila kunembo kunditobela.”
20 Petro naakachengunuka, wakabona sikwiiya wakali kuyandwa aaJesu, kalikumutobela. Sikwiiya ooyo nguwe wakaseyeme aakaango kakwe mubuzuba nibakalya chilalilo alubo ngunguwe wakali wabuzya kuti: “Mwaami, ngwani uuyanda kukuuzya?”
21 Petro naakamubona, wakati kuli Jesu: “Mwaami, ani ooyu ke?”
22 Mpawo Jesu wakati kulinguwe: “Kuti kakuli kuyanda kwangu kuti ooyu kanooliwo kusikila ndizooboole, iwe uleenzi anzizyo? Iwe yinkilila kunembo kunditobela.”
23 Nkinkaako, makani aakuti sikwiiya ooyu taakali kuzoofwa pe akazula kuli basikwiiya, pesi Jesu taakaambide kuti tazoofwi pe, pesi wakaambide kuti: “Kuti kakuli kuyanda kwangu kuti ooyu kanooliwo kusikila ndizooboole, iwe uleenzi anzizyo?”
24 Ooyu ngunguwe sikwiiya uulikupa bukamboni oobu buli atala azintu eezi alubo nguwe wakalemba zintu eezi alubo tulizi kuti bukamboni bwakwe, mbwachoonzyo.
25 Kwaamba choonzyo, kuli zimwi zintu zyiingi Jesu nzyaakachita, zyakuti kaansinga zyoonse zyakalembwa, ndibonaanga mabbuku aakupeta aalembedwe zintu eezyo taali kunookkwana pe munyika.
Makani Aamunsi
^ Naakuti, “mulaabaswi na?”
^ MuchiGrikki, “taakazweete pe.”
^ MuchiGrikki, “makkiyubbiti aali 200.” Kkiyubbiti iimwi yeelene aamasentimita aali 44.5.
