Detoronomi 30:1-20
30 “Majwi woonse aaya naazoozuzikizigwa kulindinywe, nkukwaamba chilongezyo alutuko nzindabikka kunembo lyanu, animwazoowayeeya kamuli kuzisi zyoonse nkwatazoomumwayile Jehova Leza wanu,
2 mpawo inywe abana banu muboole kuli Jehova Leza wanu amoyo wanu woonse abuumi bwanu boonse, alubo muswiilile jwi lyakwe kweendelana azintu zyoonse nzindili kumulayilila sunu,
3 mpawo Jehova Leza wanu uzooboozya bantu banu bakali batolwa mubuzike. Uzoomufwida luzyalo alubo uzoomubunganizya lubo kuzwa kubantu boonse ooko Jehova Leza wanu nkwaakamumwayilide.
4 Nikuba kuti mwamwayilwa kumagolelo aamajulu, Jehova Leza wanu uzoomubunganizya akumuboozya kuzwa nkukooko.
5 Jehova Leza wanu uzoomutola kunyika njibakakona mawuso alubo muzooyikona, alubo uzoopa kuti muzwidilile akuti muvule kwiinda mawuso.
6 Jehova Leza wanu uzoosalazya* myoyo yanu amyoyo yabana banu, kuchitila kuti muyande Jehova Leza wanu amoyo wanu woonse abuumi bwanu boonse kuchitila kuti mupone.
7 Mpawo Jehova Leza wanu uzooyeta lutuko loonse oolu aali basinkondonyokwe ibakali kumuzonda akumupenzya.
8 “Muzooboola muswiilile jwi lyaJehova mpawo mubambe milawu yakwe yoonse njindili kumulayilila sunu.
9 Jehova Leza wanu uzoopa kuti muzwidilile loko mumilimu yoonse yamaanza aanu, uzoovuzya bana banu, zivuubwa zyanu azilyo zyamumyuunda yanu, nkaambo Jehova uzoobotelwa lubo kupa kuti muzwidilile, mbuli mbaakabotelwa amasianyookulu.
10 Nkaambo muzooswiilila jwi lyaJehova Leza wanu akubamba milawu yakwe amalayilile aakwe, zilembedwe mubbuku eeli lyaMulawu, alubo muzoobweeda kuli Jehova Leza wanu amoyo wanu woonse abuumi bwanu boonse.
11 “Mulawu ooyu ngundili kumulayilila sunu, teemuyumu pe kuti muutobele alubo tawuli kule pe.
12 Tawuli kujulu pe zyakuti nga mulaamba kuti, ‘Ngwani uutatante kujulu kuti akatweetele, kuchitila kuti tuumvwe akuubamba?’
13 Alubo tawuli mutala aalwizi pe zyakuti nga mulaamba kuti, ‘Ngwani uutazubuke mutala aalwizi kuti akatweetele, kuchitila kuti tuumvwe akuubamba?’
14 Nkaambo ijwi eelyo lili aafwiifwi loko andinywe, lili munkanwa lyanu amumyoyo yanu, kuchitila kuti mulibambe.
15 “Amubone, sunu ndili kubikka buumi abubotu, lufu abubi kunembo lyanu.
16 Kuti mwaswiilila milawu yaJehova Leza wanu njindili kumulayilila sunu kwiinda mukuyanda Jehova Leza wanu, akweenda munzila zyakwe, akubamba milawu yakwe, malayilile aakwe anzila zyakwe zyakubeteka, muzoopona akuvula alubo Jehova Leza wanu uzoomulongezya munyika njimutazookone.
17 “Pesi kuti myoyo yanu yaleya mpawo mwaleka kuswiilila akoongelezegwa akukotamina bamwi baleza akubabelekela,
18 kwaamba choonzyo sunu ndimubuzya kuti muzoomana. Tamuzooponi mazuba miingi pe munyika njimutazookone nimwazubuka Jodani.
19 Ndiita julu anyika kuti zibe bakamboni bamupa mulandu kuti sunu ndabikka buumi alufu kunembo lyanu, chilongezyo alutuko; amusale buumi kuti mupone inywe abana banu,
20 kwiinda mukuyanda Jehova Leza wanu, akuswiilila jwi lyakwe akukakatila kulinguwe nkaambo we nguubuumi bwanu alubo kwiinda mulinguwe muzoopona kwachiindi chilamfu munyika Jehova njaakakonkezya kupa masianyookulu, Abbrahamu, Izakka, aJakkobo.”
Makani Aamunsi
^ MuchiHebberu, “uzoopalula.”
