KuBaroma 4:1-25
4 Kuti kakuli oobo, nga tulati sianene Abbrahamu wakajanaanzi kumubili?
2 Muchikozyano, kaansinga Abbrahamu wakaambwa kuti uliluleme akaambo kamilimu, wakali kunooba aakaambo kamupa kulidunda pesi kutali kunembo lyaLeza pe.
3 Nkaambo lugwalo lutyeni? Luti: “Abbrahamu wakaba aalusyomo muli Jehova,* alubo wakabonwa kuti uliluleme.”
4 Kumuntu uubeleka, chintu nchafozegwa teeluzyalo lupati pe, pesi nchintu nchayelede kupegwa.*
5 Kuli lumwi lubazu, muntu uutabeleki pesi ulaalusyomo kuli Yooyo waamba bantu batayoowi Leza kuti baliluleme, uzoobonwa kuti uliluleme.
6 Mbuli mbaamba Davida atala akubotelwa kwamuntu ooyo Leza ngwabona kuti uliluleme kutali aakaambo kamilimu, kati:
7 “Balabotelwa aabo bali aamilandu yalekelelwa alubo bali aazibi zyavumbwa.*
8 Ulabotelwa muntu uuli aazibi Jehova* nzyatazooyeeyi lubo pe.”
9 Kubotelwa ooku kujanwa aabantu bapalwidwe kupela na, naakuti ambabo batapalwidwe balakujana? Nkaambo twaamba kuti: “Abbrahamu wakabonwa kuti uliluleme akaambo kalusyomo.”
10 Ndiilili naakabonwa kuti uliluleme? Kali wapalulwa na, naakuti katanapalulwa? Taakalinapalulwa pe.
11 Alubo wakatambula chitondeezyo, nkukwaamba kupalulwa, kachili chitondeezyo chakuti wakaliluleme kwiinda mulusyomo ndwaakalaalo katanapalulwa pe, kuchitila kuti abe wisi wabantu boonse bali aalusyomo nikuba kabatapalwidwe pe, kuchitila kuti babonwe kuti baliluleme,
12 akuti abe wisi wabaabo bakapalulwa, awabaabo bakakatila kukupalulwa, kuswaanizya abaabo boonse batobelezya lusyomo ndwaakalaalo taateesu Abbrahamu katanapalulwa.
13 Nkaambo Abbrahamu naakuti bana bakwe, teebakajana chisyomezyo chakukona nyika akaambo kamulawu, pesi akaambo kakuti bakaliluleme kwiinda mulusyomo.
14 Nkaambo kuti aabo bakakatila kumulawu mbiibasikukona, nkukwaamba kuti, lusyomo taluchigwasyi pe alubo chisyomezyo chamwayigwa.
15 Kwaamba choonzyo, Mulawu weeta bukali, pesi aatakwe mulawu taakwe kusotoka mulawu pe.
16 Nzizyo zyakapa kuti chisyomezyo chibewo kwiinda mulusyomo kweendelana aluzyalo lupati, kuchitila kuti bana ba-Abbrahamu boonse bajane chisyomezyo eechi, kutali aabo bakakatila kuMulawu kupela, pesi abaabo boonse bakakatila kulusyomo lwa-Abbrahamu mbukunga ngutaateesu toonse.
17 (Mbuli mbukulembedwe kuti: “Ndakusala kuti ube wisi wazisi zyiingi.”) Eezi zyakachitika mumeso aaLeza, ooyo ngwaakali kusyoma, uupa kuti bafwide babe bawumi alubo waamba zintu zitanachitika mbuli kuti zyachitika kale.*
18 Nikuba kuti teekwakachilikwe bulangilizi, pesi akaambo kabulangilizi, wakali aalusyomo lwakuti uzooba wisi wazisi zyiingi mbuli mbukwakaambwa kuti: “Ambabo bana bako mbubazooba.”
19 Nikuba kuti lusyomo lwakwe teelwakacheya pe, wakabona mubili wakwe mbuli kuti ulifwide (mbukunga wakali waamba kusisya minyaka iili 100) akuti Sara taakachili kukonzya pe kuba aabana.
20 Pesi akaambo kachisyomezyo chaLeza, lusyomo lwakwe teelwakazungaana pe, pesi wakaba aamanguzu akaambo kalusyomo lwakwe mpawo wakapa Leza bulemu.
21 Alubo wakali aachoonzyo chimaninide chakuti, eezyo Leza nzyaakasyomezya, wakali kuzoozichita.
22 Nkinkaako, “wakabonwa kuti uliluleme.”
23 Nikuba oobo, majwi aakuti “wakabonwa kuti,” taakalembelwa nguwe kupela,
24 pesi alatuswaanizya andiswe nituzoobonwa kuti tuliluleme nkaambo tulamusyoma Ooyo wakabusya Jesu Mwaami wesu kuzwa kubafu.
25 Wakatolwa kukujayigwa akaambo kamilandu yesu alubo wakabusigwa kuti twaambwe kuti tuliluleme.
Makani Aamunsi
^ Langa Bupanduluzi Bwamabala.
^ Naakuti, “nchikwelete.”
^ Naakuti, “zyalekelelwa.”
^ Langa Bupanduluzi Bwamabala.
^ Amwi malembe ati, “ooyo waamba zintu zitawo mbuli kuti mpuzili kale.”
