Lugwalo Luya kuBakkolose 4:1-18
4 Inywe nibasimalelo, amubajate munzila iiluleme alubo iilikabotu bazike banu, nkaambo mulizi kuti andinywe muli aaSimalelo kujulu.
2 Amukakatile kukukomba, mutooni pe kumakani aakukomba alubo kamulumba.
3 Aachiindi nchicheecho, amutukombele andiswe, kuti Leza alijulile mulyango jwi, kuchitila kuti twaambilizye nsiswa iisalala iili atala aKkristu, iipede kuti ndibe aazyaanzyo eezi zyamujele,
4 akuti nsiswa eeyo ndiiwambilizye munzila iimvwisisika mbuli mbundeelede kuchita.
5 Amwiinkilile kunembo kweenda mubusongo nimuli aabantu bakunze, kamuchibelesya kabotu chiindi chanu.*
6 Chiindi choonse, majwi aanu aabe aaluzyalo, kaalungidwe munyo, kuchitila kuti muzibe mbumweelede kusandula muntu umwi awumwi.
7 Tikkikko mukombima uuyandwa, mubelesi uusyomeka alubo muzikema muMwaami, uzoomubuzya makani woonse aali atala andime.
8 Ndilikumutuma kulindinywe, kuchitila kuti muzibe mbutulikupona ookuno akuti awumbulizye myoyo yanu.
9 Ulazaamwi a-Onesimo, mukombima uusyomeka alubo uuyandwa, uuzwa aakati kanu. Bazoomubuzya zintu zyoonse zilikuchitika ookuno.
10 Aristakko ngundisungidwaawe ulikumujuzya, kuswaanizya aMakko, mujwa waBbanabbasi (ooyo ngumwakabuzigwa kuti mumutambule kabotu naasika kulindinywe),
11 alubo Jesu ooyo uutegwa Justo, ulikumujuzya, aaba mbaamwi babaabo bapalwidwe. Aaba mbabo abalikke babelesima mumulimu waBwaami bwaLeza alubo mbabo balikunduumbulizya loko.*
12 Epafra, muzike waKkristu Jesu, uuzwa aakati kanu, ulikumujuzya. Ukkala kamukombela amoyo woonse, kuchitila kuti kumamanino mwiime nji mbuli bantu bakomena, kamuli aachoonzyo chikkwene atala akuyanda kwaLeza koonse.
13 Nkaambo ime ndipa bukamboni bwakuti ulikubeleka changuzu akaambo kandinywe, kuswaanizya abaabo bali kuLawodekkiya abali kuHirapolisi.
14 Musilisi uuyandwa Lukka, ulikumujuzya, kuswaanizya aDemasi.
15 Amundijuzizye bakombima bali kuLawodekkiya kuswaanizya amuchizi Nimfa ambungano iinjilila aang’anda yakwe.
16 Lugwalo oolu nilwabalwa aakati kanu, amuchite mabambe aakuti lukabalwe kumbungano yabantu bakuLawodekkiya, mpawo andinywe mubale luzwa kuLawodekkiya.
17 Alubo amubuzye Akkipasi kuti: “Ubeleke changuzu mulimu ngwaakatambula muMwaami kuchitila kuti uuzuzikizye.”
18 Nkoku kujuzya kwangu nkundalemba akuboko kwangu, ime ndiPawulu. Amukkale kamuyeeya zyaanzyo zyangu zyamujele. Luzyalo lupati alube aandinywe.
