Samiyele Wachibili 17:1-29
17 Ahitofeli wakati kuli Abbisalomu: “Ndikumbila kusala baalumi bali 12 000 mpawo ndiinke ndikaandilile Davida sunu mansiku.
2 Ndilamusikila kakatede, kamanide manguzu* alubo ndilapa kuti ayoowe. Bantu boonse mbalaabo bazoochija mpawo ime ndilajaya mwaami alikke.
3 Mpawo ndizooboozya bantu boonse kulinduwe. Kuti mwaalumi ngulikuyanduula wafwa, bantu boonse bazooboola kulinduwe mpawo bantu boonse bazooba aaluumuno.”
4 Nzyaakaamba zyakabotezya Abbisalomu abaalu boonse ba-Israyeli.
5 Nikuba oobo, Abbisalomu wakati: “Amwiite Hushayi mu-Akkiti tumvwe nzyataambe anguwe.”
6 Nkinkaako, Hushayi wakanjila mwaakabede Abbisalomu. Mpawo Abbisalomu wakati: “Ooyu nguumuzeezo wa-Ahitofeli. Tuchite nzyaamba na? Kuti kazitachiti, tubuzye nzitweelede kuchita.”
7 Hushayi wakati kuli Abbisalomu: “Lulayo lwa-Ahitofeli talubeleki pe aachiindi eechino!”
8 Hushayi wakayinkilila kunembo kwaamba kuti: “Uzizi kabotu kuti wuso abaalumi mbalaabo mbaasinguzu alubo bali aabukali mbuli munyama uutegwa bbeya wasowa bana bakwe musokwe. Mukuyungizya, wuso ngusilumamba alubo takoonga uloona aakati kabantu pe.
9 Aachiindi eechino, uliyubide mumpako* naakuti muliimwi ndawu alubo kuti kwasaanguna nguwe kulwana, bantu batazoozimvwe bazoowamba kuti, ‘Bantu batobela Abbisalomu bazundwa!’
10 Kwaamba choonzyo, naba mwaalumi uuli aachibindi alubo uuli aamoyo uuli mbuli wamulavu uzooyoowa, nkaambo ma-Israyeli boonse balizi kuti wuso mwaalumi uulaanguzu akuti baalumi mbalaabo bali aachibindi.
11 Nzezi nzindikonzya kukulayilila: Bunganizya ma-Israyeli boonse kuzwa kuDani kusika kuBberi-shebba, kabali biingi mbuli museele wamulwizi mpawo ubazulwide kunkondo.
12 Tuyoomulwana kufumbwa nkutuyoomujana alubo tuyoomusikila mbuli lume* mbululoka aanyika, taakwe muntu uumwi uutakafutuke, abe nguwe naakuti umwi wabaalumi mbalaabo.
13 Kuti wachijila mumuunzi, ma-Israyeli boonse bazooyinka aantambo kumuunzi ooyo mpawo tuzoowudilizya, tuukwelele mukalonga kusikila kakutachikwe nikaba kabwe kamwi kasyaala.”
14 Abbisalomu abaalumi boonse ba-Israyeli bakati: “Nzyaalayilila Hushayi mu-Akkiti zilikabotu kwiinda nzyaalayilila Ahitofeli!” Nkaambo Jehova wakali wakanza* kuti lulayo lwa-Ahitofeli lulikabotu lutabeleki, kuchitila kuti Jehova ayetele Abbisalomu mapenzi.
15 Nikwakayinda chiindi, Hushayi wakabuzya Zadokki a-Abbiyata, aabo bakali bapayizi kuti: “Ahitofeli walayilila Abbisalomu abaalu ba-Israyeli eezi mpawo ime ndazoobalayilila eezi.
16 Lino amufwambaane mutume bantu bakabuzye Davida makani aaya, bakamuchenjezye kabati: ‘Mutakkali aandawu zyakuzubukila zyamunkanda* sunu mansiku, pesi amube aachoonzyo chakuti mwazubuka. Kuti teemwachita oobo, mwaami abantu boonse mbalaabo balanyonyoonwa.’”*
17 Jonatani a-Ahimazi bakali kukkala ku-Eni-rogeli, nkaambo teebakali kuyanda pe kubonwa kabanjila mumuunzi. Nkinkaako, mubelesi wachisimbi wakayinka waakubabuzya mpawo bakayinka kuti bakaakubuzye Mwaami Davida.
18 Nikuba oobo, umwi mulombe wakababona mpawo wakaakubuzya Abbisalomu. Nkinkaako, kabali babili bakeenda mpawaawo baakusika kung’anda yawumwi mwaalumi wakuBbahurimu. Mwaalumi ooyo wakali aachikala mulubuwa lwakwe. Bakanjila muchikala eecho
19 mpawo mwanakazi wamwaalumi ooyo wakavumba chikala eecho achimwi chintu mpawo wakamwaya mayila aatwidwe aajulu. Taakwe muntu wakaziziba pe eezi.
20 Babelesi ba-Abbisalomu bakasika kumwanakazi ooyo aang’anda yakwe mpawo bakamubuzya kuti: “Ahimazi aJonatani balikuli?” Mwanakazi ooyo wakabasandula kati: “Bayindaano kabatozya kumulonga.” Baalumi aabo bakabayanduula, pesi teebakabajana pe, nkinkaako, bakabweeda kuJerusalema.
21 Baalumi aabo nibakayinka, bakazwa muchikala mpawo bakayinka baakubuzya Davida kuti: “Nyampuka alubo fwambaana uzubuke mulonga, nkaambo Ahitofeli walayilila kuti bachite eezi atala anduwe.”
22 Chakufwambaana, Davida abantu boonse mbaakalaabo bakanyampuka bazubuka Jodani. Nibwakacha, bantu boonse bakali bazubuka Jodani.
23 Ahitofeli naakabona kuti lulayo lwakwe teebakaluswiilila pe, wakatanta donki wiinka kung’anda yakwe kulimbabo. Naakamana kupa bamung’anda yakwe malayilile, wakalyaangilila.* Nkinkaako, wakafwa mpawo wakazikkwa kundawu yakuzikkila yamasianyinakulu.
24 Aachiindi eecho, Davida wakayinka kuMahanayimu mpawo Abbisalomu wakazubuka Jodani kalaamwi abaalumi boonse ba-Israyeli.
25 Abbisalomu wakabikka Amasa kuti azulwide masooja mundawu yaJowabbu. Amasa wakali mwana wamwaalumi mu-Israyeli wakali kutegwa Itira, nkukwaamba Itira ooyo wakoona aa-Abbigeli mwana musimbi waNahashi mwanike waZeruya, banyina baJowabbu.
26 Ma-Israyeli a-Abbisalomu bakakkempa munyika yaGiliyadi.
27 Davida naakasika kuMahanayimu, Shobbi mwana waNahashi wakuRabba yama-Amoni, Makkiri mwana wa-Amiyeli wakuLo-debbari aBbazilayi wakuGiliyadi kuRogelimu,
28 bakeeta malo, tudishi, tulongo, wiiti, bbali, fulawa, zilyo zikangidwe, misyobo iibili yanyangu, zilyo ziyokedwe,
29 buchi, mafuta, mbelele achiizi.* Bakeetela Davida abantu mbaakalaabo zintu zyoonse eezi kuti balye, nkaambo bakati: “Bantu balaanzala, bakatala alubo balaanyota munkanda.”
Makani Aamunsi
^ Naakuti, “maboko woonse kaatakwe manguzu.”
^ Naakuti, “mukkomba, mugoloonga.”
^ Bamwi bati “gweeda.”
^ Naakuti, “walayilila.”
^ Amwi malembe ati, “mumabuwa aamunkanda.”
^ MuchiHebberu, “balamenwa.”
^ Naakuti, “wakalisina.”
^ MuchiHebberu, “amalili.”
