Petro Wachibili 3:1-18
3 Nibayandwa, oolu ndugwalo lwachibili ndundilikumulembela, kandimusungwaazya kuti muyeeye kabotu mbuli mbundakachita mulugwalo lwakusaanguna kandilikumuyeezya,
2 kuti mweelede kuyeeya makani aakaambwa chiindi abapolofita basalala, amulawu waMwaami aMufutuli ngwaakaamba kabelesya bapolofita.
3 Chakusaanguna amuzibe eezi, kumazuba aakumamanino, basikuseka bazoosika akuseka kwabo kabalikuchita nzibayanda,
4 kabati: “Kuli kuli kubawo kwakwe kwakasyomezegwa? Teekuzwa mubuzuba masianene naakoona mulufu, zintu zyoonse zilikwiinkilila kunembo mbuli mbuzyakabede kuzwa kumasaangunino aakulengwa kwazintu.”
5 Nkaambo bakaleka aachaali kuswiilila makani aaya aakuti, chiindi loko kwakali majulu anyika yakayimvwi nji aajulu aamaanzi alubo yakali aakati kamaanzi kwiinda mujwi lyaLeza,
6 akuti kwiinda muzintu eezyo, nyika yamuchiindi eecho yakanyonyoonwa niyakavumbwa aamaanzi aazambangulwe.
7 Pesi kwiinda mujwi ndileelyo, majulu anyika ziliwo lino zibambilidwe mulilo alubo zilibambidwe kusikila mubuzuba bwalubeta abwakunyonyoonwa kwabantu batayoowi Leza.
8 Nikuba oobo nibayandwa, mutalubi kuti buzuba bumwi kuli Jehova* buli mbuli minyaka iili chuulu akuti minyaka iili chuulu ili mbuli buzuba bumwi.
9 Jehova* talikunonoka pe kweendelana achisyomezyo chakwe, mbuli mbubayeeya bamwi kuti ulikunonoka, pesi ulikumutondeezya moyo mulamfu nkaambo taakwe ngwayanda kuti anyonyoonwe pe, pesi uyanda kuti boonse basanduke.
10 Pesi buzuba bwaJehova* buzoosika mbuli mubbi, aawo majulu naatazooyinde akudilima,* pesi zintu zipanga majulu anyika zitanoopye loko aachiindi eecho zizooyaaya alubo nyika amilimu yayo zizooyubununwa.
11 Mbukunga zintu zyoonse eezi zizooyaaya munzila iili boobu, amubone kuti mweelede kuba bantu bali biyeni mumilimu iisalala yakulijata amumichito yakulipeda kuli Leza,
12 nimulindila akuyeeyesesya* kubawo* kwabuzuba bwaJehova*, aawo majulu naatazoonyonyoonwe mumulilo, azintu zipanga majulu anyika nizitazooyaaye akaambo kakupya kupati.
13 Pesi kuli majulu mapya anyika mpya nzitulikulindila kweendelana achisyomezyo chakwe, oomo bululami mubutazookkale.
14 Nkinkaako nibayandwa, mbukunga mulikulindila zintu eezi, amuchite zyoonse nzimukonzya, kuchitila kuti kumamanino, azoomujane kamutakwe kabata abubi alubo kamuli aaluumuno.
15 Mukuyungizya, amubone moyo mulamfu waMwaami wesu mbuli lufutuko, mbuli mbaakamulembela anguwe mukombima uuyandwa Pawulu kweendelana abusongo mbwaakapegwa,
16 kalikwaambuula atala azintu eezi mbuli mbachita mumagwalo aakwe woonse. Nikuba oobo, zimwi zintu zili mulingawo nziyumu kuzimvwisisisya, alubo aabo batazi* abatakkalinkene balikuzipilingania, mbuli mbubachita kuMagwalo woonse kuti banyonyoonwe.
17 Nkinkaako, inywe nibayandwa, mbukunga muli aaluzibo oolu, amuchenjelele kuti batamupambuli pe, kwiinda mukubisya kwabantu bataswiilili mulawu, mpawo muwe akaambo kakukachilwa kwiima nji.
18 Peepe, pesi amwiinkilile kunembo kukomena muluzyalo lupati amuluzibo lwaMwaami wesu aMufutuli Jesu Kkristu. Kulinguwe akube bulemu lino kusikila mubuzuba butamani. Ameni.
Makani Aamunsi
^ Langa Bupanduluzi Bwamabala.
^ Langa Bupanduluzi Bwamabala.
^ Langa Bupanduluzi Bwamabala.
^ Naakuti, “amusindo mupati.”
^ MuchiGrikki, “akufwambaania.”
^ Naakuti, “kamuli aachiyandisyo chipati chakubawo.”
^ Langa Bupanduluzi Bwamabala.
^ Naakuti, “batayiisidwe.”
