Petro Wakusaanguna 4:1-19
4 Mbukunga Kkristu wakaswaana mapenzi munyama, andinywe amulibambile kamuli aamuzeezo* nguyooyu, nkaambo muntu waswaana mapenzi munyama wazileka zibi,
2 kuchitila kuti kuchiindi chakwe chasyaala nachili mumubili wanyama, aponene kuchita kuyanda kwaLeza, kutali kuchita ziyandwa aabantu.
3 Nkaambo chiindi nchimwakamaninsya kamulikuchita zintu ziyandwa aazisi chakakkwana, aawo nimwakali kuchita michito iitondwa,* kamuli aaziyandisyo zitanyoneki, kamuli kunywa zyiindilide, kamuli kuliswaanizya mumapobwe aatanyoneki, mumizundaano yakunywa makande amukukomba zibumbwa kutazumizigwi aamulawu pe.
4 Baligambide kuti nkamboonzi nimutayinkilili kunembo kuchijaana ambabo mukulijata kubi ooku, nkinkaako baambuula bubi atala andinywe.
5 Pesi bantu aaba bazoolyaambilila kuli yooyo uulibambilide kubeteka bawumi abafwide.
6 Kwaamba choonzyo, eezi nzizyo zyakapa kuti makani mabotu aambilizigwe akuli baabo bafwide, kuchitila kuti nikuba kuti babetekwa mumubili kwiinda mumaboneno aabantu, bapone kweendelana amuuya kwiinda mumaboneno aaLeza.
7 Pesi mamanino aazintu zyoonse aswena aafwiifwi. Nkinkaako, amube aamizeezo iilikabotu, alubo amukkale kamulibambilide kukomba.
8 Kwiinda zintu zyoonse, amuyandane loko, nkaambo luyando luvumba zibi zyiingi.
9 Amutambulane kabotu kamutang’ung’uni pe.
10 Kweendelana achipo nchaakapegwa umwi awumwi, amuchibelesezye kubelekela bamwi mbuli balangizi babotu baluzyalo lupati lwaLeza lutondeezegwa munzila zisiyene-siyene.
11 Kuti umwi muntu waambuula, achite oobo mbuli kuti waambuula makani aazwa kuli Leza, kuti umwi muntu wabeleka, achite oobo mbuli kuti ubelesya manguzu aazwa kuli Leza, kuchitila kuti Leza alumbayizigwe muzintu zyoonse kwiinda muli Jesu Kkristu. Bulemu amanguzu nzizyakwe kusikila kukabe kutamani. Ameni.
12 Nibayandwa, mutagambi pe akaambo kamasunko aali mbuli mulilo ngimulikuswaana, mbuli kuti nchintu chipya chilikuchitika kulindinywe.
13 Pesi amwiinkilile kunembo kubotelwa akaambo kakuti mulikutola lubazu mumapenzi aaKkristu, kuchitila kuti muzoobotelwe akuti muzookondwe loko muchiindi chakuyubununwa kwabulemu bwakwe.
14 Kuti kamulikusampawulwa* akaambo kazina lyaKkristu, mulabotelwa nkaambo muuya wabulemu, kwaamba choonzyo, muuya waLeza ulikkede aalindinywe.
15 Nikuba oobo, kutabi muntu naaba uumwi uukataazikana aakati kanu akaambo kakuba mujayi, naakuti sikubba, naakuti sikubisya, naakuti sikunjilila makani aabamwi bantu.
16 Pesi kuti muntu waswaana mapenzi akaambo kakuba muKkristu, atabi aabweeme pe, pesi ayinkilile kunembo kulumbayizya Leza, nayitwa aazina eeli.
17 Nkaambo eechi nchiindi chibikkidwe chakuti lubeta lusaangunine mung’anda yaLeza. Kuti lwasaanguna aandiswe, niinzi chitazoochitike kuli baabo bataswiilili makani mabotu aaLeza?
18 “Alubo, kuti kakuli kuyumu kuti muntu uululeme afutuke, niinzi chitazoochitike kumuntu uutayoowi Leza akuli sizibi?”
19 Nkinkaako, aabo balikuswaana mapenzi akaambo kakuchita kuyanda kwaLeza, abayinkilile kunembo kulibikka mumaboko aaMulengi uusyomeka chiindi nibachita zintu zibotu.
Makani Aamunsi
^ Naakuti, “kamuli aamakanze aakozyenie.”
^ Naakuti, “kubisya kamutakwe bweeme.” Majwi aaya azwa kubbala lyachiGrikki lyakuti a·sel′gei·a lili mubwiingi. Langa Bupanduluzi Bwamabala.
^ Naakuti, “kamulikutukilwa.”
