“Chivwanu ntchigomezgu chakusimikizika cha vinthu vo munthu walindizga, ukaboni wakuwoneke limu wa vinthu chayivu vo viwoneka cha.”—Aheberi 11:1, Bayibolu la Charu Chifya.

 “Sonu chivwanu ntchigomezgu cha vinthu vo munthu walindizga, ukaboni wakuwoneke limu wa vinthu vambula kuwoneka.”—Aheberi 11:1, King James Version.

 Lemba ili likonkhoska mwakudumuwa vo mazu ngakuti chivwanu ngang’anamuwa mu Malemba ndipu lilongo kuti chivwanu chisazgapu vinandi kuphara waka kugomezga vinthu.

 “Chivwanu ntchigomezgu chakusimikizika cha vinthu vo munthu walindizga.” Mu Chigiriki, mazu ngo akungafwatuliya kuti “chivwanu” ngo nge pa lemba la Aheberi 11:1, ngang’anamuwa kugomezga, kuthemba pamwenga kulindizga chinthu chinyaki mwanthazi. Chivwanu chenichi chithemba pa vo munthu wakhumba kuti vichitiki cha, kweni “ntchigomezgu chakusimikizika.” Mazu nga Chigiriki ngo akungafwatuliya kuti “ntchigomezgu chakusimikizika,” a ngangafwatulika so kuti “kalata ya ukaboni,” kung’anamuwa chinthu cho chitimupaska munthu chisimikizu pamwenga chigomezgu.

 ‘Chivwanu . . . mbukaboni wakuwoneke limu [pamwenga kuti, “ukaboni wakusimikizika,” mazu ngamumphata] wa vinthu chayivu vo viwoneka cha.’ Munthu waja ndi chivwanu asani wawona ukaboni. Ukaboni wenuwu uja wanthazi ukongwa ndipu uchitiska kuti munthu wagomezgengi kuti chinthu chinyaki ntchauneneska chinanga kuti wechendachiwoni.

 Buku la mu Bayibolu la Aheberi, likulembeka ndi wakutumika Paulo ndipu walembiyanga Akhristu akwambiriya wo ajanga ku Yerusalemu ndi vigaŵa vinyaki vapafupi. Mukalata iyi, Paulo wangukonkhoska kukhumbika kwakuja ndi chivwanu. Mwakuyeruzgiyapu, iyu wangulemba kuti: “Kwambula chivwanu vingachitika cha kukondwesa Chiuta, pakuti weyosi yo watuza kwaku Chiuta, watenere kugomezga kuti iyu waliku nadi ndipuso kuti wapereka mphotu ku ŵanthu wosi wo atimupenja ndi mtima wosi.” (Aheberi 11:6) Paulo wati wamaliza kukonkhoska vo mazu ngakuti chivwanu ngo nge pa Aheberi 11:1 ngang’anamuwa, wangukamba vakuyeruzgiyapu va anthulumi ndi anthukazi anandi wo azumbulika mu Bayibolu ŵeniwo angulongo chivwanu. Iyu wangukonkhoska so mo ŵanthu ŵenaŵa angolongore chivwanu chawu mwakuchita vinthu mwakukoliyana ndi khumbu laku Chiuta.—Aheberi 11:4-38.