“Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani goli langu ndipu sambirani kwaku ini chifukwa nde wakuzika kweniso wakujiyuyuwa, ndipu mwazamusisipulika. Chifukwa goli langu ndipusu kweniso katundu wangu ndimupepu.”—Mateyu 11:28-30, Bayibolu la Charu Chifya.

 “Zani kwaku ine, mose mwaŵakudinirwa ndi mwaŵakuzitiskika, ndipo ine ndikupumuzganinge; jitoleni pinu goŵa langu, ndi sambirani kwaku ine; pakuti ndine mpovu ndi wakujiyuyuwa mu mtima: ndipo musaniyenge chipumulu ku mizimu yinu. Chifukwa goŵa langu ndakoroŵa, ndi chifinga changu nchiyuyu.”—Mateyu 11:28-30, Mazu Ghaku Chiuta.

 Yesu waŵadananga ndi mtima wosi ŵanthu wo amuvwisiyanga kuti ŵazi kwaku iyu. Iyu waŵasimikiziyanga kuti asani asambirengi kwaku iyu, asisipulikengi ndipu apepukengi ku masuzgu ngo akumana nangu.

 “Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu.” Yesu wachikamba kuti “akufyoka ndi katundu muzitu” wang’anamuwanga ukongwa ŵanthu wo wakhumbisisanga kuti ŵazi kwaku iyu chifukwa chakuti achichizgikanga ndi alongozi achisopa kuti alondongi marangu kweniso midawuku yachisopa chawu. (Mateyu 23:4; Mariko 7:7) Pa nyengu iyi, ŵanthu anandi asuzgikanga maŵanaŵanu kweniso afyokanga ndi ntchitu kuti asaniliyengi mabanja ngawu vakukhumbika pa umoyu.

 “Ini ndazakukusisipuwani.” Yesu wangulayizga kuti wawovyengi kweniso wasisipuwengi ŵanthu wosi wo anguzomera kudanika mwachanju kuti ŵazi kwaku iyu. Iyu wanguchita venivi mwakuwovya ŵanthu kuti aziŵi vinthu vo Chiuta wakhumba kuti achitengi. (Mateyu 7:24, 25) Vo Yesu wanguchita vinguwovya ŵanthu kuti afwatuliki ku ukapolu wa visambizu vaboza kweniso kukandirizika ndi midawuku yachisopa chaboza. (Yohane 8:31, 32) Chinanga kuti kusambira kweniso kugwiriskiya ntchitu vo Yesu wasambizanga kwakhumbikanga kuti munthu wayesesi ukongwa kweni kwenga kwakusisipuwa ukongwa pa umoyu wawu.

 “Pingani goli langu ndipu sambirani kwaku ini.” Pa nyengu yo Bayibolu lalembekiyanga, ŵanthu agwiriskiyanga ntchitu goli lenili la chimiti asani akhumba kupinga katundu muzitu paphewa. Ndichu chifukwa chaki mazu ngakuti “goli” ngagwira so ntchitu ku munthu yo watende ulamuliru wa munyaki pamwenga yo walongozgeka ndi munthu munyaki. (Levitiko 26:13; Yesaya 14:25; Yeremiya 28:4) Mazu ngakuti “sambirani kwaku ini” ngangayanana waka ndi kukamba kuti “jani akusambira ŵangu.” Mwaviyo, yapa Yesu wachiskanga ŵanthu wo amuvwisiyanga kuti aje akusambira ŵaki kuti amulondongi ndi kuyezga chakuwoniyapu chaki.—Yohane 13:13-15; 1 Peturo 2:21.

 “Mwazamusisipulika.” Yesu wachikamba mazu yanga wang’anamuwanga kuti vinthu vosi vakukandirizga vo vachitikanga vimalengi nyengu yeniyo cha. Iyu wapembuzganga ŵanthu wo amuvwisiyanga ndi kuŵawovya kuti alindizgengi vinthu vamampha kunthazi. (Mateyu 6:25-32; 10:29-31) Ŵanthu wosi wo anguja akusambira ŵaki kweniso wo alondonga vo wasambizanga, anguwamu kuti kuteŵete Chiuta ndi mphingu cha, kweni kwaŵawovyanga kuti akondwengi pa umoyu.—1 Yohane 5:3.

 “Goli langu ndipusu kweniso katundu wangu ndimupepu.” Yesu wapambananga ukongwa ndi alongozgi achisopa a munyengu yaki, chifukwa iyu wenga wakujiyuyuwa ukongwa kweniso wenga wakuzika. (Yohane 7:47-49) Iyu waŵachitiyanga nkhaza cha ŵanthu kweniso waŵakandirizanga cha. Mumalu mwaki, Yesu wachitanga nawu vinthu mwachanju ŵanthu kweniso wenga wakufikirika nyengu zosi. Iyu waŵavwisanga ŵanthu wo amulondonga ndipu walindizanga cha kuti nyengu zosi achitengi vinthu ndendende nge mo iyu wakhumbiyanga. (Mateyu 7:12; Mariko 6:34; Luka 9:11) Iyu waŵalongonga so mo angayanduliya ndi lisungu laku Chiuta kweniso likondwa lo lituza chifukwa chakuja ndi njuŵi yamampha. (Mateyu 5:23, 24; 6:14) Mijalidu yamampha ukongwa yo Yesu wenga nayu yawovyanga ŵanthu kuti ŵazi waka kwaku iyu pe cha kweni yaŵawovyanga so kuti ajiperekengi ndi mtima wosi kunyamuwa goli laki la chanju ndi kuja akusambira ŵaki.

 Yesu wangukamba mazu ngo nge pa Mateyu 11:28-30 pa nyengu yo wapharazganga ku Galileya mu chaka cha 31 C.E. Wakutumika Mateyu ndiyu yija yo wakulemba Uthenga Wamampha waku Yesu wakudana ŵanthu kuti ŵazi kwaku Yesu. Nge munthu yo wenga wakusonkhesa msonkhu wachiyuda, Mateyu waziŵanga umampha mo ŵanthu akandirizikiyanga ndi msonkhu wo Aroma alondanga kweniso chifukwa cha vinthu vachinyengu vo alongozgi Achiyuda achitanga. Mwaviyo, tikayika cha kuti iyu wanguchiskika ukongwa wati wawona kuti Yesu wagwiriskiya ntchitu nthazi zo Awisi a Yehova a angumupaska kuti wadani wosi wo mbakujiyuyuwa kweniso akukandirizgika kuti ŵazi kwaku iyu.—Mateyu 11:25-27.

 Uthenga Wamampha wo Mateyu wakulemba, ukonkhoska mijalidu yamampha yaku Yesu yo wangulongo nge Mesiya wakulayizgika kweniso nge Fumu yo yazamulamuliya mu Ufumu waku Chiuta.—Mateyu 1:20-23; Yesaya 11:1-5.

 Woneriyani kavidiyo kafupi yaka kuti muvwi vo ve mubuku la Mateyu.