Mazu ngakuti “kubalika so,” ngakamba za ŵanthu wo ayamba ŵaka sonu kuja pa ubwezi ndi Chiuta. (Yohane 3:​3, 7) Ndipu ŵanthu ŵenaŵa, Chiuta watiŵasankha kuja ŵana ŵaki. (Aroma 8:​15, 16; Agalatiya 4:5; 1 Yohane 3:1) Munthu yo wazomerezgeka ndi apapi ŵaki kweniso boma kuti wajengi ndi munthu munyaki, wasintha umoyu waki. Mwakuyanana ŵaka, ŵanthu wo Chiuta watiŵasankha, asintha umoyu wawu ndipu aja m’banja laku Chiuta.​—2 Akorinto 6:​18.

Ntchifukwa wuli munthu wakhumbika kubalika so?

 Yesu wangukamba kuti: “Palivi munthu yo wangawona Ufumu waku Chiuta kwambula kuti wabalika so.” (Yohane 3:3) Mwaviyo, kubalika so ndiku kungachitiska munthu kuti wakalamuliyi limoza ndi Khristu mu Ufumu waku Chiuta. Ufumu uwu ulamuliya kutuliya kuchanya ndipu Bayibolu likamba kuti munthu wakhumbika “kubalika so” kuti wazilonde chihara cho ‘chikusungika kuchanya.’ (1 Peturo 1:​3, 4) Wosi wo abalika so apaskika chisimikizgu chakuti ‘azamuwusa nayu limoza nge mafumu.’​—2 Timote 2:​12; 2 Akorinto 1:​21, 22.

Kumbi munthu wabalika so munthowa wuli?

 Pa nyengu yo Yesu wakambanga nkhani iyi, wangukamba kuti wosi wo abalika so “azamubalika ndi maji kweniso mzimu.” (Yohane 3:5) Mazu nga pa lemba ili ngakamba za ubatizu wa mu maji kweniso ubatizu wa mzimu wakupaturika.​—Machitidu 1:5; 2:​1-4.

 Yesu ndiyu wenga wakwamba kubalika so. Iyu wangubatizika mu Msinji wa Yorodani, ndipu pa nyengu yeniyi Chiuta wangumusankha (pamwenga kuti kumubatiza) ndi mzimu wakupaturika. Mwaviyo, Yesu wangubalika so nge mwana wauzimu waku Chiuta ndipu wenga ndi chilindizga chakuti nyengu yinyaki waweriyengi so kuchanya. (Mariko 1:​9-​11) Chiuta wangufiska venivi pa nyengu yo wanguyuskiya Yesu nge chakulengeka chauzimu.​—Machitidu 13:33.

 Ŵanthu anyaki wo abalika so, nawu akhumbika kubatizika dankha ndi maji ŵechendalonde mzimu wakupaturika. a (Machitidu 2:38, 41) Ndipu pavuli paki, aja ndi chilindizga cha umoyu wambula kumala kuchanya, wo Chiuta watiŵapaska asani ayuskika ŵaka.​—1 Akorinto 15:42-​49.

Fundu zaboza zo ŵanthu agomezga pa nkhani ya kubalika so

 Fundu ya boza: Munthu wangasankha kuti wabaliki so.

 Fundu yauneneska: Weyosi we ndi mwaŵi wakuja pa ubwezi ndi Chiuta ndi kuzitaskika. (1 Timote 2:​3, 4; Yakobe 4:8) Chinanga kuti ve viyo, Chiuta ndiyu wasankha kuti munthu wabaliki so pamwenga kuti wasankhiki ndi mzimu wakupaturika. Mwakukoliyana ndi vo Bayibolu likamba, kuti munthu wabaliki so “vithemba kukhumba kwa munthu cha pamwenga phamphu laki, kweni Chiuta.” (Aroma 9:​16) Mazu ngakuti “kubaliso so,” ngangang’anamuwa so kuti ‘kubalika kutuliya kuchanya.’ Mazu ngenanga ngasimikiziya kuti ŵanthu wo abalika so asankhika “kutuliya kuchanya” pamwenga kuti ndi Chiuta.​—Yohane 3:3, mazu ngamumphata.