Kumbi Chiuta Wakuchita Kusambusa Vamoyu Vinyaki pa Kulenga Mitundu Yinyaki ya Vamoyu?
Vo Bayibolu Limuka
Awa. Bayibolu likamba mwakuvwika umampha kuti Chiuta wangulenga ŵanthu kweniso “mitundu” ya nyama ndipuso mbewu zakupambanapambana. a (Genezesi 1:12, 21, 25, 27; Chivumbuzi 4:11) Likamba so kuti ŵanthu wosi akutuliya kwa apapi ŵidu akwamba Adamu ndi Eva. (Genezesi 3:20; 4:1) Bayibolu likambapu cha kuti Chiuta wakugwiriskiya ntchitu vamoyu vinyaki pa kulenga mitundu yinyaki ya vamoyu. Kweni Bayibolu lisuska cha vo asayansi anyaki akusaniya kuti mitundu yinyaki ya vamoyu yituza mitundu yinyaki yakupambanaku ndi vamoyu vo.
Kumbi Chiuta wakulenga vamoyu kutuliya ku vamoyu vinyaki?
Ŵanthu wo agomezga kuti vamoyu vikuchita kusambuka kutuliya ku vamoyu vinyaki ŵe ndi maŵanaŵanu ngakupambanapambana pa nkhani yeniyi. Buku linyaki likamba kuti ŵanthu anyaki agomezga kuti “Chiuta ndiyu walongozga vamoyu vosi muchilengedu kuti visambukengi mwakukoliyana ndi malu ngo vili.” (Encyclopædia Britannica)
Vo ŵanthu anyaki aŵanaŵana visazgapu kuti:
Vamoyu vosi vikutuliya ku vamoyu vinyaki vakali ukongwa.
Mtundu wa chamoyu ungasambuka kuja mtundu unyaki wasonu.
Chiuta ndiyu wachitiska kuti vamoyu visambuki.
Kumbi nkhani yakuti vamoyu vikuchita kusambuka yikoliyana ndi vo Bayibolu likamba?
Ŵanthu wo agomezga kuti vinthu vikuchita kusambuka akamba kuti nkhani ya mu Bayibolu yo yisanirika mu buku la Genezesi yakuti vinthu vikuchita kulengeka, njauneneska cha. Kweni Yesu wangugwiriskiya ntchitu fundu ya mu buku lenili kulongo kuti njauneneska. (Genezesi 1:26, 27; 2:18-24; Mateyu 19:4-6) Bayibolu likamba kuti Yesu wechendazi pacharu chapasi wajanga kuchanya ndi Chiuta ndipu wawovyanga Chiuta kulenga “vinthu vosi.” (Yohane 1:3) Mwaviyo, fundu yakuti Chiuta wakusambusa vamoyu vinyaki pakulenga mitundu yinyaki ya vamoyu yikoliyana cha ndi vo Bayibolu lisambiza.
Kumbi asani vakume kweniso vinyama vasintha chifukwa chakuŵikika pamalu nganyaki ngasonu, ndikuti visambuka?
Bayibolu likambapu cha kuti mitundu yinyaki ya vamoyu yingasintha ukongwa pamwenga cha. Kweniso lisuska cha kuti vinyama ndi vakume vinyaki vo Chiuta wakulenga vingasintha kawonekeru po vibarana pamwenga chifukwa vaja pa malu nganyaki. Chinanga kuti ŵanthu anyaki awona kuti vamoyu visambuka chifukwa cha malu ngo vili kweni visintha mtundu cha ndipu mtundu wa vamoyu wasonu upangika cha.
a Bayibolu ligwiriskiya ntchitu mazu ngakuti “mtundu” pakukamba vinthu vinandi kuphara vo asayansi akamba. Nyengu zinandi asayansi akamba kuti vamoyu visambuka kuja mtundu unyaki wa vamoyu vasonu. Kweni buku la Genezesi lilongo kuti vamoyu ivi vo asayansi akamba kuti visambuka, vipambana waka kawonekeru kweni vosi ndi mtundu umoza.
Mungayanja Kuŵerenga so Nkhani Izi
FUNDU ZAKUKHUMBIKA UKONGWA ZO BAYIBOLU LISAMBIZA
Kumbi Vinthu va Muchilengedu Vikuchita Kulengeka?
Ŵanthu anandi avwisa cha vo Bayibolu likamba vakukwaskana ndi chilengedu ndipu anyaki akamba kuti ndi nthanu ŵaka. Kumbi vo Bayibolu likamba vauneneska nadi?
MAFUMBU NGO ŴANTHU AFUMBA KAŴIKAŴI
Kumbi Akaboni aku Yehova Agomezga Kuti Vinthu Vosi Vikulengeka M’mazuŵa 6 chayingu?
Kumbi muziŵa kuti vinthu vinyaki vo ŵanthu wo agomezga kuti vinthu vosi vikulengeka m’mazuŵa 6 chayingu akamba, visuskana ndi fundu za m’Bayibolo?
MABUKU NDIPUSO TIMABUKU
Kumbi Vamoyu Vikujaku Waka Vija?
Vo mugomezga pa nkhani ya mo umoyu ukwambiya vakukhumbika ukongwa.
VAKUKWASKANA NDI ISI
Pemphani Kuti Musambirengi Bayibolu
Kambiskanani fumbu la mu Bayibolu pamwenga ziŵani vinandi vakukwaskana ndi Akaboni aku Yehova.