Kumbi Mbayani wo Aluta Kuchanya?
Vo Bayibolu Limuka
Chiuta wasankha Akhristu akugomezgeka amanavi waka kuti asani ŵafwa aziyuskikiyi kuchanya kuti ndiku akaje ndi umoyu. (1 Peturo 1:3, 4) Kweni kuti Akhristu yaŵa azilonde mphotu yawu yakuchija ndi umoyu kuchanya, akhumbika kulutirizga kuja akugomezgeka kweniso kuja ndi mijalidu yamampha kutuliya po asankhikiya waka.—Aefeso 5:5; Afilipi 3:12-14.
Kumbi wo azamuluta kuchanya amugwira ntchitu wuli?
Amuteŵete limoza ndi Yesu nge mafumu kweniso asembi kwa vyaka 1,000. (Chivumbuzi 5:9, 10; 20:6) Yiwu ndiwu azamupanga “kuchanya kufya,” pamwenga kuti boma lakuchanya lo lazamulamuliya “charu chapasi chifya,” cho chimiya ŵanthu akuvwiya wo azamuja pacharu chapasi. Azamuwovya so kuti vinthu pacharu chapasi vizije nge mo Chiuta wakhumbiyanga pakwamba.—Yesaya 65:17; 2 Peturo 3:13.
Kumbi mbanthu alinga wo azamuluta kuchanya?
Bayibolu lilongo kuti ŵanthu 144,000 ndiwu azamuyuskika kuti akaje ndi umoyu kuchanya. (Chivumbuzi 7:4) Mu chiwona cho chikulembeka pa Chivumbuzi 14:1-3, wakutumika Yohane wanguwona “Mwanawambereri wama pa Phiri la Ziyoni, ndipu wenga limoza ndi ŵanthu 144,000.” Mu chiwona chenichi, “Mwanawambereri” wamiya Yesu. (Yohane 1:29; 1 Peturo 1:19) “Phiri la Ziyoni” limiya udindu wapachanya wo Yesu ndi ŵanthu 144,000 wo amulamuliya nayu limoza kuchanya azamupaskika.—Salimo 2:6; Aheberi 12:22.
Ŵanthu “wo akudanika ndi kusankhika” kuti akalamuliyi limoza ndi Khristu mu Ufumu waki adanika kuti “a kamskambu kamana.” (Chivumbuzi 17:14; Luka 12:32) Venivi vilongo kuti wo aluta kuchanya atenere kuja amanavi waka kuyeruzgiya ndi mbereri zosi zo Yesu wenazu.—Yohane 10:16.
Fundu zaboza zo ŵanthu aŵanaŵana zakukwaskana ndi ŵanthu wo azamuluta kuchanya
Fundu yaboza: Ŵanthu wosi amampha aluta kuchanya.
Fundu yauneneska: Chiuta wakulayizga kuti wazamupereka umoyu wamuyaya ku ŵanthu wosi amampha ndipu azamuja pacharu chapasi.—Salimo 37:11, 29, 34.
Yesu wangukamba kuti: “Palivi munthu yo wakukwerapu kuchanya.” (Yohane 3:13) Yapa wang’anamuwanga kuti ŵanthu wosi amampha wo anguŵaku iyu wechendazi pacharu chapasi, akuluta kuchanya cha. Ŵanthu nge Abrahamu, Mozesi, Yobu ndipuso Davidi. (Machitidu 2:29, 34) Mumalu mwaki ŵanthu ŵenaŵa ŵenga ndi chilindizga chakuti azamuyuskika ndi kuja ndi umoyu pacharu chapasi penipanu.—Yobu 14:13-15.
Bayibolu likamba kuti kuyuskikiya ku umoyu wakuchanya kudanika kuti “chiyuka chakwamba.” (Chivumbuzi 20:6) Venivi vilongo kuti pazamuja so chiyuka chinyaki, ndipu chiyuka ichi ntcha ŵanthu wo azamuja pacharu chapasi.
Bayibolu lisambiza kuti asani Ufumu waku Chiuta waziyamba kulamuliya, “nyifwa yazamuŵaku so cha.” (Chivumbuzi 21:3, 4) Layizgu ili lazamufiskika pacharu chapasi chifukwa kuchanya kulivi nyifwa.
Fundu yaboza: Munthu weyosi wasankha yija kuti waziluti kuchanya pamwenga wazije pacharu chapasi.
Fundu yauneneska: Chiuta ndiyu wasankha Akhristu wo mbakugomezgeka kuti akalonde “mphotu ya mdanu wakuchanya,” kung’anamuwa kuti akaje ndi umoyu kuchanya. (Afilipi 3:14) Mwaviyo, munthu wachita kusankha yija cha.—Mateyu 20:20-23.
Fundu yaboza: Ŵanthu wo azamuja ndi umoyu wamuyaya pacharu chapasi mbakusika ndipu mbakwenere cha kuluta kuchanya.
Fundu yauneneska: Ŵanthu wo azamuja ndi umoyu wamuyaya pacharu chapasi, Chiuta watiŵadana kuti “ŵanthu ŵangu,” “ŵanthu ŵangu akusankhika,” ndipuso “ŵanthu akutumbikika ndi Yehova.” (Yesaya 65:21-23) Yiwu azamuja ndi mwaŵi wakuzifiska khumbu lo Chiuta wenga nalu pakwamba. Khumbu laki lenga lakuti ŵanthu aje ndi umoyu wamuyaya kweniso wakufikapu mu paradayisu pacharu chapasi.—Genezesi 1:28; Salimo 115:16; Yesaya 45:18.
Fundu yaboza: Nambala ya 144,000 yo yizumbulika mu buku la Chivumbuzi yimiya unandi wa ŵanthu cha kweni yimiya vinthu vinyaki.
Fundu yauneneska: Mbuneneska kuti mu buku la Chivumbuzi mwe manambala ngo ngamiya vinthu vinyaki, kweni nganyaki mwa manambala yanga ngamiya unandi wa vinthu chayivu. Mwakuyeruzgiyapu, buku ili likamba va “mazina 12 nga akutumika 12 a Mwanawambereri.” (Chivumbuzi 21:14) Tiyeni tikambiskani ukaboni wo ulongo kuti nambala ya 144,000 yikamba va unandi chayiwu wa ŵanthu.
Pa lemba la Chivumbuzi 7:4 pakamba va “chiŵerengeru cha ŵanthu wo angudindika chidindu [pamwenga kuti wo akusimikizika kuti aluta kuchanya]. Ŵanthu wo, ŵengapu 144,000.” Ndipu mavesi ngapanthazi ngakamba va gulu lachiŵi la ŵanthu kuti: “mzinda ukulu wa ŵanthu wo pengavi munthu yo wangufiska kuwuŵerenga.” A “mzinda ukulu” ŵenaŵa, nawuso azamutaskika ndi Chiuta. (Chivumbuzi 7:9, 10) Kukaŵengi kuti nambala ya 144,000 yikamba va unandi chayiwu cha wa ŵanthu, patingi paŵengi pakusuzga kupambanisa magulu ngaŵi nga ŵanthu ngo ngazumbulika mu lemba ili. a
Kusazgiya pa fundu yeniyi, Bayibolu likamba so kuti ŵanthu 144,000 “akugulika kutuliya mu ŵanthu, nge vipasu vakwamba.” (Chivumbuzi 14:4) Mazu ngakuti “vipasu vakwamba” ngamiya chiŵerengeru chimanavi waka cha ŵanthu wo akuchita kusankhika. Mwaviyo, mazu yanga ngakamba va ŵanthu wo amuwusa limoza ndi Khristu kuchanya ndipu azamulamuliya ŵanthu wo azamuja pacharu chapasi kwamuyaya wo chiŵerengeru chawu chiziŵika cha.—Chivumbuzi 5:10.
a Venivi viyanana waka ndi vo Pulofesa munyaki zina laki Robert L. Thomas wangulemba vakukwaskana ndi nambala ya 144,000 yo yizumbulika pa Chivumbuzi 7:4. Iyu wangukamba kuti: “Nambala yo yizumbulika pa lemba ili yikamba va chiŵerengeru chayichu cha ŵanthu penipo unandi wa ŵanthu wo azumbulika pa Chivumbuzi 7:9 uziŵika cha. Nambala iyi yikaŵengi chiŵerengeru chayichu cha, ndikuti manambala ngosi ngo ngazumbulika mu buku la Chivumbuzi ngatingi ngang’anamuwengi vinthu vinyaki.”—Chivumbuzi 1-7: Buku lakuti An Exegetical Commentary, peji 474.
Mungayanja Kuŵerenga so Nkhani Izi
ESSENTIAL BIBLE TEACHINGS
Kumbi Ufumu Waku Chiuta Ntchinthu Wuli?
Pa nyengu ya uteŵeti waki Yesu wasambizanga ukongwa za Ufumu waku Chiuta kuluska nkhani yinyaki yeyosi. Kwa vyaka vinandi akusambira ŵaki nawu apempheranga ukongwa kuti Ufumu waku Chiuta uzi.
VO BAYIBOLU LISAMBIZA
Yesesani Kusambira Bayibolu
Sambirani Bayibolu kwawezi ndi munthu yo wakusambizeningi.