Pa 3 April 2021, Bayibolu la Charu Chifya la Malemba nga Chigiriki Ngachikhristu lakuŵerenge pa vipangizu va mazuŵa nganu likutuzgika mu Chimambwelungu. Mubali Albert Musonda, wa mu Komiti ya Nthambi ku Zambia ndiyu wangutuzga Bayibolu lenili. Apharazgi ku Zambia ndipuso ku Tanzania anguwonere pulogilamu yo yinguchita kujambulika. Chimambwelungu cho chiziŵika so kuti Fipa, chikambika ndi apharazgi 2,531 a ku Zambia ndipuso apharazgi 325 a ku Tanzania.

Abali atatu ndiwu angugwira ntchitu yakufwatuliya Bayibolu lenili kwa myezi 21. Yumoza wa abali yaŵa wangukamba kuti ŵanthu anyaki awona kuti Bayibolu lo lilipu kali la Chimambwelungu ndakusuzga kuŵerenga chifukwa le ndi mazu ngakusuzga. Pakukamba va Bayibolu la Charu Chifya lasonu, mubali munyaki so wangukamba kuti: “Bayibolu ili le ndi mazu ngo ŵanthu alongoro mazuŵa nganu.”

Tikayikiya cha kuti mphasu yamampha yeniyi yakutuliya kwaku Yehova yiwovyengi kuti ŵanthu wo alongoro Chimambwelungu achiskiki ndi Mazu ngaku Chiuta.—Salimo 1:2.