Mubali Rustam Seidkuliev wakutuzgika mujeri ku Russia pa 7 April 2023. Kweni pa 17 September 2023 ndipu angumutumiziya ku Turkmenistan, wati walindizga kwa myezi yinandiku kutuliya po khoti linguyeruzgiya kuti watuzgiki mujeri. Venivi venga viyo chifukwa boma la Russia lingumulonda makalata ngaki nga uzika. Muwolu waki Yuliya, walindizga mwakunweka kukumana so ndi mulumu waki.

Rustam wanguja myezi yakujumpha 7 mujeri la panyumba ndipuso myezi pafufupi 23 mujeri. Pa nyengu yosi yeniyi, iyu wangulutirizga kuwona vinthu mwakwenere kweniso kuja ndi chivwanu chakukho mwaku Yehova. Ndipu mukalata yo wangulemba we mujeri, Rustam wangukonkhoska mo vakuwoniyapu va ŵanthu wo azumbulika mu Bayibolu vingumuwovye kukunthiyapu. Iyu wangukamba kuti: “Ndinguchiskika ukongwa ndi chakuwoniyapu chaku Naboti ndipuso Mefiboseti. Yiwu anguŵayeruzga mwambula urunji kweni angulutirizga kuja akugomezgeka kwaku Yehova kweniso kuja ndi chivwanu. Venivi vingundiwovya kuti ndikunthiyepu mayeseru ngangu kweniso kuti ndiŵanaŵaniyengi ukongwa chilindizga cho ndenachu.”

Yuliya wazomerezekanga kuchiwona mulumu waki Rustam kujeri kamoza pa myezi yitatu yeyosi. Kweni zuŵa lelosi, alutirizganga kuchiskana pafoni ndipu akambiskananga Lemba la Zuŵa.

Kwati kwaja waka kanyengu kamanavi kuti waluti kujeri, Rustam wangukamba kuti: “Ndasambira kuti Yehova we ndi nthazi pa chechosi ndipu ngwakunozgeka kutiwovya pa nyengu yakwenere kweniso munthowa yakwenere. Mwaviyo, ndikhumbika waka kulutirizga kumuthemba ndi mtima wosi.”

Tigomezga kuti Yehova walutirizgengi kumuphwere Rustam ndi muwolu waki Yuliya po alutirizga kuwona Yehova nge malu ngawu ngakuthaŵiyaku ndipuso malu ngangu ngakuvikilirika.—Salimo 91:2.