Mu September 2024, Akaboni aku Yehova mu vyaru 240 angugwiraku ntchitu yapade yakwambisa masambiru nga Bayibolu. Abali ndi azichi pacharu chosi angugwiriskiya ntchitu mpata wewosi kuti alongo ŵanthu mo tisambiriya Bayibolu mwakugwiriskiya ntchitu buku lakuti Kondwani ndi Umoyu Kwamuyaya! Wonani vinyaki mwa vinthu vakukondwesa vo vinguchitika mu mwezi wenuwu.

Munthukazi munyaki wa vyaka 30 ku Chile we mu basi wanguwona kashelufu kidu ka mabuku pa malu nganyaki. Basi yo yati yama, munthukazi yo wangujambula kachidindu ko kenga pa chikwangwani cho chitovya ŵanthu kupempha sambiru la Bayibolu lawezi. Wati wajula webusayiti yidu ya jw.org pa foni yaki, wangusaniya nkhani ya mutu wakuti “Kumbi Mutenere Kuthemba Yani?—Kumbi Bayibolu Likambanji? Wati waŵerenga nkhani yeniyi, munthukazi yo wangupempha kuti Akaboni azi kunyumba kwaki. Pati pajumpha waka mazuŵa ngamanavi, banja linyaki linguluta kunyumba kwaki. Iyu wangukambiya banja ili kuti wapempheranga kwaku Chiuta kuti wamuwovyi kuziŵa mo wangamusope munthowa yakwenere. Banja ili lingumupempha kuti asambirengi nayu Bayibolu ndipu nayu wanguluta patali cha, mwakuti angwambapu kusambira nyengu yeniyo. Pa nyengu ya sambiru, munthukazi uyu wangukamba kuti watanja ukongwa kuwonere mavidiyo. Tikamba panu akumaliza kusambira mitu yitatu yakwambiriya mu buku la Kondwani ndi Umoyu Kwamuyaya! ndipu sambiru la Bayibolu leche kulutiriya.

Munthukazi munyaki ku Senegal wanguvwa kuziya pa windu fundu za mu Bayibolu zo azichi ŵaŵi akambiskananga ndi munthu kubwalu kwa nyumba yaki. Munthukazi uyu wangukhumbisiska kuvwa vinandi, mwaviyo wangutuliya kubwalu kuti wakakumani nawu ŵechendaluti. Ŵati akambiskana nkhani yakukwaskana ndi vinthu vambula urunji, azichi ŵaŵi ŵenaŵa angumuŵerenge lemba la Yesaya 32:16, 17 ndipu angumulongo malayizgu nga mu Bayibolu ngo ngasanirika mu sambiru 02 mu buku la Kondwani ndi Umoyu Kwamuyaya! Wachikonkhoska masuzgu nganandi ngo wakumanapu nangu pa umoyu waki, wangwamba kuliya ukongwa. Azichi yaŵa angumupembuzga mwakuŵerenga nayu lemba la 1 Peturo 5:7, ndipu ŵati amupempha kuti asambirengi nayu Bayibolu, iyu wanguzomera ndipu sambiru lingwamba nyengu yeniyo.

Wachipharazga kunyumba ndi nyumba, mubali munyaki ku Taiwan wangukambiskana ndi munyamata munyaki yo wafipanga mtima ndi vo vingazimuchitikiya kunthazi. Mubali yo wangumuŵerenge lemba la Yesaya 65:21, 22, ndipu wangufumba munyamata mwenuyu asani wangayanja kuzija ndi umoyu mucharu cho munthu weyosi wazamukondwanga ukongwa ndi ntchitu yo wazamugwiranga. Wati wamulongo fundu ya nambala 4 mu sambiru 02 la kabuku ka Kondwani ndi Umoyu Kwamuyaya!, mubali uyu wangumukonkhoske vinthu vakukondwesa vo Bayibolu likamba ndipu wangumulongo mo tisambiriya Bayibolu ndi ŵanthu. Munyamata mwenuyu wangukondwa ukongwa ndi vo angukambiskana ndipu wanguzomera kwamba kusambira Bayibolu. Pati pajumpha masabata ngamanavi, awisi amunyamata mwenuyu angukondwa ndi vo mwana wawu wasambiranga ndipu nawu angwamba kusanirikapu pa sambiru la Bayibolu. Pasonu panu, mwana mwenuyu limoza ndi awisi, wosi asambira Bayibolu nyengu zosi.

Achipharazga kunyumba ndi nyumba mumuzi unyaki ku Ukraine, abali ŵidu anguŵerenge munthu munyaki lemba la Daniyeli 2:44, ndipu angumukonkhoske kuti ndi Ufumu waku Chiuta wija wo wazamumalisa masuzgu nga ŵanthu. Munthu mwenuyu wangukondwa ukongwa ndipu wangukambiya Akaboni ŵenaŵa kuti waŵerenga Bayibolu ndipu we ndi mafunbu nganandi. Iyu wangukamba kuti waja wachilindizga kuti Akaboni aku Yehova amuyende kunyumba kwaki ndipu wakwesapu kufufuza ko kwe Nyumba ya Ufumu muchigaŵa cho waja. Abali ŵenaŵa angumukambiya kuti kusambira Bayibolu kungamuwovya ukongwa kuti wasaniyi kwamuka kwa mafumbu ngo wenangu, mwaviyo angumulongo mo sambiru la Bayibolu lichitikiya. Iyu wangukondwa ukongwa ndipu mo tikambiya panu, palivi zuŵa lo wakujombapu kusambira.

Tikondwa ukongwa kuvwa malipoti ngakukondwesa ngenanga nga ntchitu yapade pacharu chosi. Titimuwonga ukongwa Yehova chifukwa cha kutumbika abali ndi azichi pacharu chosi chifukwa cha phamphu lawu pakuwovya ŵanthu amtima wamampha kuti asambiri vinandi vaku Iyu kweniso Mazu ngaki.—1 Atesalonika 2:13.

Chithuzi cha abali ndi azichi ŵidu a muvyaru vakupambanapambana wo akondwa kugwiraku ntchitu yapade yakupharazga mu mwezi wa September 2024.