Pa 12 October, 2024, Akaboni aku Yehova ku Uganda anguchita unganu wakupatuliya malu ngatatu ngasonu Ngakuchitiyapu Maunganu. Malu ngatatu ngenanga ngakuzengeka mukati mwa misasa ya ŵanthu akuthaŵa kwawu yo ye muvigaŵa vakupambanapambana mucharu cho. Pulogilamu yakuzenga Malu nga Unganu Ngambula Kusuzga yeniyi, yingwamba muchaka cha 2018. Ndipu yitovya kuti Malu nga Unganu ngazengeki liŵi ndipuso yikhumba ndalama zinandi ukongwa cha. Kusazgiyapu yapa, malu ngenanga ngaja ngakwenere kuchitiyapu maunganu ngadera kweniso ngachigaŵa ku vigaŵa vakumizi. (2 Akorinto 8:13-15) Abali ndi azichi anandi ku Africa ayanduwa ndi pulogilamu yeniyi. Pe manozgeru ngakuti kufika kukumaliya kwa chaka cha 2024, Malu nga Unganu pafufupi 100 ngazengeki ndipu malu nganyaki 30 ngazengekengi mu chaka cha 2025.

Malu nga Unganu Ngambula Kusuzga Kuzenga nganozgeka munthowa yakuti ngangasuzganga cha kungasintha mwakukoliyana ndi vo vikhumbika ku malu ko. Mwakuyeruzgiyapu, malu nganyaki azenga waka tenti yo mungasere ŵanthu 650 penipo malu nganyaki azenga matenti ngo ngangakwana ŵanthu pafufupi 2,000. Matenti ngenanga ngatovya kuti ŵanthu ajengi mwakuvikilirika ku lumwi kweniso vuwa. Kusazgiyapu yapa, matenti ngenanga ngaja ndi malu ngasungiyaku vipangizu vakukuzgiya mazu, malu nga ubatizu ndipuso pulatifomu. Mubali munyaki ku Uganda wangukamba kuti: “Kali tajanga waka pabwalu ndipu asani kwayamba vuwa, tasoŵanga chakuchita. Nyengu zinyaki vuwa yanyanga yinandi ukongwa mwakuti tachichizgikanga kuthaŵa ndi kusaniya malu nganyaki ngakuti tikabisami. Venivi vachitiskanga kuti tileki kuvwisiya vigaŵa vinyaki va unganu. Kweni sonu, tivwisiyengi ndipuso kuyanduwa ndi pulogilamu yosi ya unganu. Titimuwonga ukongwa Yehova chifukwa chakutipasa Malu nga Unganu ngamampha ngenanga!”

Mubali munyaki ku Angola wangukamba so umampha unyaki wakuja ndi Malu nga Unganu Ngambula Kusuzga Kuzenga. Iyu wanguti: “Patonga mazuŵa nganandi kuti timalizi kuzenga malu ngakuchitiyapu unganu wadera wewosi kweniso wachigaŵa. Kanandi tavukanga ndipu asani pulogilamu ya unganu yayamba, tayanduwanga nayu ukongwa cha chifukwa cha kuvuka. Kweni sonu, ini ndi banja langu tiyanduwa ndi pulogilamu yosi kweniso tikondwa kucheza ndi abali ndi azichi.”

Tikhumbika malu nganandi ngakuchitiyapu maunganu, ndipu ku Africa pe kukhumbika malu ngakujumpha 100. Malu ngakuyanana ndi ngenanga ngakhumbika so muvigaŵa vinyaki va ku Central ndi South America. Mwaviyo, pakhumbika abali ndi azichi anandi akujipereka kuti asambiziki mo angazenge Malu nga Unganu Ngambula Kusuzga ngenanga. Mubali Ben Pritchard, wa mu Komiti ya Nthambi ku West Africa wangukamba kuti: “Abali ndi azichi ŵidu anandi akuziŵa cha kuzenga. Kweni mbakunozgeka kweniso kukhumbisiska kusambira malusu ngo ngakhumbika pakuzenga malu ngakhumbikiya ngenanga. Ndipu nge mo pakambiya pa Afilipi 4:13, Yehova watiŵapaska nthazi kuti afiski kugwira ntchitu yeniyi.”

Tikondwa ukongwa asani tiwona kuti ntchitu yakuzenga Malu nga Unganu Ngambula Kusuzga yamala. Tiziŵa kuti peche vyaru kweniso vigaŵa vinandi vo kukhumbika kuzengeka Malu nga Unganu Ngambula Kusuzga ngenanga, ndipu tigomezga kuti Yehova walutirizgengi ‘kuŵapaska nthazi’ abali ndi azichi ŵidu kuti afiski ntchitu yeniyi.—Afilipi 2:13.