Pa Chiŵi, 4 April 2023, Akaboni aku Yehova mamiliyoni nganandi limoza ndi ŵanthu wo anguŵadana, anguchita mwambu wa Chakurya Chamazulu cha Ambuya. Chinanga kuti venga vakusuzga ukongwa ku ŵanthu anandi, kweni angufiska kusanirika pa mwambu wapade wenuwu.

Mwakuyeruzgiyapu, ku Ukraine ŵanthu masawuzandi nganandi angusanirika pa Chikumbusu chinanga kuti muvigaŵa vinyaki nyengu yenga umampha cha kweniso kwe nkhondu. Chinanga kuti vinthu venga umampha cha mutawuni yo ye kuvuma kwa Ukraine, ŵara anguchipereka nkhani yakuchita kujambula ku mpingu wa kwenuku kwaja sabata yimoza kuti Chikumbusu chichitiki. Pavuli paki, pati pajumpha mazuŵa ngamanavi, kwenuku kunguchitika chimphepu chakofya ndipu chinguchitiska kuti kuchigaŵa chenichi kuŵevi Intaneti ndipuso magesi. Kweni weyosi mumpingu wenuwu wanguvwisiya nkhani ya Chikumbusu yakuchita kujambula chinanga kuti kwengavi magesi ndipuso kwe nkhondu.

Mzichi munyaki wa ku Kazakhstan zina laki Violetta wa vyaka 15, ŵanthu a mubanja laki amususkanga. Agogu ŵaki anthulumi wo waja nawu amususkanga ukongwa kwa vyaka pafufupi 20. Kanandi akanizanga banja lawu kuti lingalutanga cha ku maunganu ndipuso aŵakeluriyanga mabuku. Kweni chifukwa chakuti amuyanjanga ukongwa mzuku wawu, kamana ndi kamana angwamba kukambiskana nayu vo wagomezganga. Violetta wanguzizwa ukongwa kuwona kuti chaka chinu agogu ŵaki anguzomera kusambira Bayibolu ndipu anguluta ku Chikumbusu!

Anyaki vatingi viŵengi vakusuzga kusanirika pa Chikumbusu chifukwa chakuti aja kuvigaŵa vakutali ukongwa. Ku Timor-Leste, kanandi abali ndi azichi asambira Bayibolu ndi ŵanthu 55 wo aja mutawuni ya Same ndi Suai kuziya pafoni. Matawuni ngenanga nge kutali ndipu ŵanthu atenda maora nganandi pahonda kuti akafiki pa mpingu wapafupi wa Akaboni aku Yehova. Mwaviyo, abali angunozga kuti mutawuni yeyosi ŵanthu achitiyi Chikumbusu munyumba za abali. Mura munyaki wangwenda ulendu wa maora 4 kuluta mutawuni ya Same kuti wakakambi nkhani ya Chikumbusu ndipu pangusanirika ŵanthu 56. Ndipu mura munyaki wangwenda maora 7 kuluta mutawuni ya Suai ndipu ŵanthu akujumpha 50 angusanirika pa Chikumbusu.

Abali ŵidu mutawuni ya Hualpén ku Chile, nawu angusuzgika kuti asaniyi malu ngakuchitiyapu Chikumbusu. Yiwu angupempha munthu munyaki waudindu yo wawonere vakukwaskana ndi chisopa muchigaŵa chawu kuti waŵawovyi kusaniya malu ngamampha ngakuchitiyapu Chikumbusu. Kwati kwaja waka maora ngamanavi kuti Chikumbusu chiyambi, ŵara mumpingu angukondwa ukongwa iyu wati waŵambiya foni ndi kuŵakambiya kuti waŵasaniriya holu ya pasukulu kuti akachitiyemu mwambu wenuwu. Abali ŵidu anguchitapu kanthu mwaliŵi ndipu angunozga holu yeniyi kuti yiwoneki umampha nge malu chayingu ngakuchitiyamu unganu. Abali angudana munthu mwenuyu yo wawonere vakukwaskana ndi chisopa kweniso meya wa mutawuni yeniyi kuti azi ku Chikumbusu ndipu wosi ŵaŵi anguza nadi. Meya wangukamba kuti: “Nditiŵawonga ukongwa ŵanthu wo ŵenga pa mwambu wenuwu chifukwa anguchita vinthu mwachimangu kweniso mwaulemu, ndi ŵana anamana viyo. Tazakukuwovyani so kunthazi.”

Tingukondwa so ukongwa kuvwa kuti mu November 2022, abali ŵidu mutawuni ya Monaco akuzomerezeka ndi boma mwadangu. Ŵati achita Chikumbusu muholu yinyaki yo abali anguyitowesa ukongwa, munthu munyaki yo angumudaniya ku Chikumbusu chenichi wangukamba kuti: “Holu yatowa ukongwa, kweni ŵanthu wo ŵaza panu ndiwu achitiska kuti yitowi ukongwa.”

Vakuchiska ukongwa kuwona kuti abali ndi azichi ŵidu anandi angumalana ndi masuzgu ngenanga kweniso nganyaki kuti avwiyi dangu laku Khristu lakuti tiwunganengi pamoza kuti ‘tikumbukiyi’ nyifwa yaki!—Luka 22:19.