Pa 31 March 2024, Mzichi Hermine Schmidt wakufwa ndi vyaka 98. Iyu wenga yumoza mwa Akaboni aku Yehova yo wangujaku pa wo angusuzgika ukongwa mumajeri nga Nazi chifukwa cha chivwanu chaki.

Hermine wakuwa pa 13 November 1925, mutawuni ya Gdańsk, yo sonu ntchigaŵa cha Poland. Apapi ŵaki a Oskar ndi Frieda Koschmieder, ŵenga Akaboni aku Yehova. Yiwu ndiwu angumuwovya kuti waje ndi chivwanu chakukho kweniso kuti wamugomezgengi ukongwa Yehova. Mu 1939,Asilikali a boma la Nazi angulonda chigaŵa cha Gdańsk ndipu angwamba kutombozga Akaboni aku Yehova mwankhaza ukongwa. Panyengu iyi, Hermine wangujipereka kwaku Yehova ndipu wangubatizika pa 2 May 1942. Pa nyengu iyi wenga ndi vyaka 16.

Mu chaka chakulondopu mu June 1943, boma la Nazi lingumanga Hermine yo wenga ndi vyaka 17. Mu April 1944, iyu wangumangika so ndipu pa nyengu iyi angumutumiza ku jeri la ku Stutthof. Asani waŵanaŵaniya nyengu yakusuzga iyi, Hermine wangukamba kuti: “Chenga chipusu cha kuwona kuti venivi vachitikanga nadi. Tinguchita soni kweniso tinguguŵa ukongwa. Apolisi wo aziŵikanga kuti a Gestapo anguchita vosi vo angafiska kuti andibayi. Ndikuwa wachiganga cha. Ndenga waka msungwana nge po awiya anyangu wosi. Kweni palivi cho ndakayikiyanga pa vo ndakhumbanga kuchita. Ndakhumbikanga waka kuja wakugomezgeka kweniso kuchita vinthu mwakukoliyana ndi njuŵi yangu. Asani wamunthu uchita vinthu mwakukoliyana ndi vo njuŵi yaku yitikuzomereza kuchita, utumbikika ndipuso utuŵa ndi chimangu kweniso uja pa chimangu ndi Chiuta waku.”

Pati pajumpha chaka mu April 1945, asilikali a ku Russia anguza kufupi ndi jeli la Stutthof. Asilikali aku Germany wo adanikanga kuti SS angukweza boti akayidi anandi mwakuŵachichizga ndipu anguchiŵaleka pa nyanja mumalu mwakuŵazomerezga kuti afwatuliki ndi asilikali a Russia. Mu May 1945 Hermine ndi anyaki 370 angupona boti lawu lati lakwecheza pa chirwa cha Danish. Pati pajumpha nyengu yimanavi, Hermine wangukumana so ndi apapi ŵaki.

Mu 1947, Hermine wangutolana ndi Horst Schmidt. Horst wangukana kusere usilikali ndipu wangugwiraku so ntchitu yakugaŵiya mabuku ngakukonkhoska Bayibolu pa nyengu yo ntchitu ya Akaboni aku Yehova yenga yakukanizika. Iyu wanguyeseka, angumuyeruzga kuti wabayiki ndipu angumuŵika mujeri ku Brandenburg-Görden. Pa 27 April 1945, Horst angumutuza mujeri, yapa ndipu kwaja nyengu yimanavi kuti nyengu yaki yakumunyonge yikwani. Horst ndi Hermine anguja munthengwa pafufupi vyaka 63 mpaka po wangufwiya mu 2010.

Kwa vyaka vinandi Schmidts wakambiyangaku ŵanthu anyaki vo vamuchitikiya pa umoyu waki. Pa nyengu yo amufumbanga mafumbu mu 1998, Hermine wangukamba mo iyu wajaliya wakugomezgeka kwaku Chiuta kuti: “Umoyu wangu wenga upusu cha kweni wenga wakukondwesa. Palivi chechosi cho ndatingi ndisinthengi.”

Titimuwonga ukongwa mzichi Hermine chifukwa cha chakuwoniyapu chaki chamampha pankhani yakugomezgeka chinanga mphanyengu yakusuzga. Tiyeni tilutirizgi kuyezga chivwanu chaki mwakulutirizga kuja ndi chiganga kweniso kuja ndi chivwanu chakukho potigomezga kuti nyengu zosi Yehova wavikiriyengi ŵanthu ŵaki akugomezgeka.—Masalimo 31:23, 24.