Mu March 2022 Akaboni aku Yehova ku El Salvador akukwanisa vyaka 50 kutuliya po boma likuŵazomereze. Boma lati laŵazomereza mwadangu abali ŵidu pa 27 March, 1972, chiŵerengeru cha apharazgi ku El Salvador chingukwera mwaliŵi kutuwa pa 2,524 mu 1972 kufika pa 5,632 mu 1976. Mazuŵa nganu, kwe apharazgi akujumpha 38,000 wo ateŵete mu mipingu 662.

Amishonale angufika mucharu ichi mu 1945 ndipu angugwira mwaphamphu ntchitu yakupharazga. Pa nyengu yeniyi, venga vambula kusuzga kuti aje mucharu cho mwakukoliyana ndi marangu nga boma. Mipingu yingupangika ndipuso ofesi ya nthambi yinguzengeka mu May 1946.

Mu 1968, dangu lifya lakukwaskana ndi kwenda lingutondekeska amishonale kuti aje mucharu cho kwa vyaka vakujumpha vinkhondi. Abali anguziŵa kuti kwambula amishonale ntchitu yakupharazga yingayenda cha. Mwaviyo, abali wo alongozganga anguwona kuti alembesi ndi chilatu chakuti aje akuzomerezeka mwakukoliyana ndi marangu nga boma.

Kukumaliya kwa chaka cha 1971, ŵara pafufupi 30 akutuliya ku El Salvador anguŵadana ku ofesi ya nthambi kuti akakambiskani vakukwaskana ndikulembesa kuti aje ndi vimakalata kuzomerezeka ndi boma. Pa nyengu yo akambiskananga, Mubali Baltasar Perla, Sr., yo pavuli paki wanguzija wa mu Komiti ya Nthambi, wangupempha ŵara wosi wo ŵengapu kuti amupaski makadi ngawu nga uzika ngo boma linguŵapaska. Pavuli paki, wangukambiya ŵara kuti mazina ngawu kweniso maadiresi ngawu ngalembekengi mukalata yakupempha boma kuti liŵazomerezi mwakukoliyana ndi marangu.

Mubali Juan Antonio Flores, yumoza mwa ŵara wo ŵengapu pa nkhumanu yo, wangukamba kuti: “Mubali Perla, Sr., wangutikambiya kuti chifukwa chakuti mazina kweniso maadiresi ngidu ngaŵengi pa chikalata, ndikuti asani arara aboma akhumbengi kukaniza ntchitu yidu, isi ndisi tiŵengi akwamba kumangika kweniso kutijaliya mujeri.” Mubali Perla, Sr., wangukamba kuti wangaweza kadi la uzika kwaku weyosi yo we ndi mantha. Palivi yo wangupempha kuti amuweze kadi la uzika. Tiwonga ukongwa kuti boma lingususkapu cha ntchitu yidu ndipu palivi yo wanguŵikika mujeri.

Vo tingunozga vingufiskika ndipu Gulu la Akaboni aku Yehova linguziŵika mu chaka chakulondopu. Kutuwa pa nyengu yeniyi kuluta munthazi, amishonale afiskanga kuto chikalata chakuŵazomereza kuja mucharu cho kwa nyengu yitali. Kusazgiyapu yapa, venga vambula kusuzga kuti ofesi ya nthambi yidanisengi mabuku kutuliya kuvyaru vinyaki ndipuso kuti abali akonkhoskengi kusukulu kweniso kwa arara a boma chifukwa cho aleke kusereriyamu mundali.

Pa 26 April 1972, nyuzipepala ya boma ya ku El Salvador yingupharazga chilatu chikulu cha gulu lo lazomerezeka mwadangu, kuti: “[Nkhupharazga] vakukwaskana ndi vo Bayibolu lisambiza kweniso uthenga wamampha wa Ufumu waku Chiuta kuti upereki ukaboni ku zina laku Chiuta ndipuso kupharazga unkhankhu waku Yehova, Chiuta wanthazizosi.”

Pajumpha vyaka vinandi kutuliya po nyuzipepala yeniyi yingukambiya venivi, ndipu Akaboni aku Yehova ku El Salvador alutirizga kupharazga vakukwaskana ndi Yehova.—Yesaya 25:9.