Mu mwezi wa August ndi September 2024, Akaboni aku Yehova angugwiraku ntchitu yapade yakupharazga mu vigaŵa vinandi ku Canada. Pa ntchitu yapade yeniyi penga vinthu vinandi vakukondwesa vo vinguchitikiya abali ndi azichi ŵidu.

Akaboni aku Yehova akujumpha 800 angugwiraku ntchitu yapade yakupharazga kuvigaŵa vakutali ukongwa kunkhondi kwa charu cha Canada. Abali ndi azichi atenere kuti anguchifika ku Iqaluit, Nunavut; Yellowknife, Northwest Territories; pamwenga ku Whitehorse, Yukon. Ŵati afika ku vigaŵa venivi, angugaŵana magulumagulu ndipu anguluta mu matawuni 39 ngakutali ukongwa kweniso ku vigaŵa vakumizi ko ŵanthu alutaku waka pandegi pe. Ndipu abali ŵenaŵa nawu angwenda pa ndegi. Akaboni a ku Canada ndi ku United States wo ŵe ndi ndegi angujipereka kunyamuwa magulu ngenanga kuluta nangu ko alutanga kuchipharazga. Pa nyengu ya upharazgi wapade wenuwu, ŵanthu 275 anguzomera kwamba kusambira Bayibolu. Abali ndi azichi angusaniriya limu nthowa yakuti ŵanthu ŵenaŵa alutirizgi kusambira Bayibolu kuziya pa foni pamwenga pa vidiyokoniferensi.

Ku Yellowknife, mzichi munyaki wangwamba kucheza ndi munthukazi yo wagwira ntchitu ku hotelu yo kagulu kawu kangufikiya. Munthu uyu wangulongo kuti wachita chitima ukongwa ndi mo vinthu viliri pacharu. Mzichi widu wangwamba kukambiskana nayu mwakugwiriskiya ntchitu kabuku ka Kondwani ndi Umoyu Kwamuyaya! ndipu wangumulongo vo Bayibolu likamba vakukwaskana ndi chilindizga chamampha cha munthazi. Munthukazi uyu wangukhumbisiska kuziŵa vinandi vakukwaskana ndi malayizgu ngenanga, mwaviyo angupangana kuti alutirizgengi kusambira Bayibolu kuziya pa vidiyokoniferensi.

Mu matawuni ngatatu nga ku Canada, abali ndi azichi pafufupi 600 angugwiraku ntchitu yapade yakupharazga mu vineneru vinayi: Chiarabu ku Montreal, Chitchayinizi Mandarini ndi Chiperisiya ku Vancouver, ndipuso Chipunjabi ku Brampton, kufupi ndi Toronto. Ŵanthu akujumpha 100 anguzomera kwamba kusambira Bayibolu pa nyengu yeniyi.

Achipharazga kunyumba ndi nyumba ku Montreal, azichi ŵaŵi angufika panyumba ya munthukazi munyaki wa Chiarabu. Pa nyengu iyi munthukazi uyu ndipu wamaliza waka kupemphera kwaku Chiuta kuti wamuwovyi kuvwisa chifukwa cho umoyu ngwakusuzga. Ŵati aŵerenga nayu lemba la Chivumbuzi 21:4 ndi kumukonkhoske layizgu laku Chiuta lakuti wazamutuzgapu urwirwi kweniso masuzgu ngosi, munthukazi uyu wanguliya. Mwaviyo wanguzomera kwamba kusambira Bayibolu mwakugwiriskiya ntchitu kabuku ka Kondwani ndi Umoyu Kwamuyaya!

Ŵe mu basi ku Vancouver, azichi ŵaŵi angukumana ndi munthukukazi munyaki wa ku Iran. Munthukazi uyu wangukondwa ukongwa azichi yaŵa ati amutawuzga mu Chiperisiya. Iyu wangukamba kuti pajumpha vyaka 15 kutuliya po wakwambiya kuŵerenga Bayibolu, kweni watilivwisa mbwenu cha. Azichi yaŵa angumukonkhoske mo kusambira Bayibolu kungamuwovye kuziŵa vinandi vakukwaskana ndi Mazu Ngaku Chiuta. Munthukazi uyu wanguzomera kuti zuŵa lakulondopu akumani ndipu wangwamba kusambira Bayibolu.

Tikondwa ukongwa kuvwa vinthu vakukondwesa venivi ndipu tigomezga kuti Yehova wawonga ukongwa mtima wakujipereka, wo abali ndi azichi ŵidu wo angugwiraku ntchitu yapade yakupharazga ŵenga nawu.—Salimo 110:3.