Mu Lipoti la Nambala 6 la Wupu Wakulongozga la 2020, Mubali Geoffrey Jackson wangukamba mazu ngakuchiska ngakuti: “Ndikali viŵi cha kutuwa po tikwambiya kulonde chakurya chauzimu kuziya pa vipangizu va mazuŵa nganu.” Kumbi namwi mukuŵanaŵaniyapu viyo? Iyu wangukamba so kuti: “Ndipu panu tiziŵa cha vo tatingi tichitengi kuti timalani ndi mulili kwambula vidya nge JW Library. Yehova waja wachitinozgekeresa tosi kwa vyaka vinandi pa vinthu nge venivi.”

 Kumbi Yehova waja wachitinozgekeresa wuli? Kumbi ntchinthu wuli cho chakhumbikanga pakupanga app ya JW Library ndipuso cho chikhumbika kuti app yeniyi yilutirizgi kugwira ntchitu umampha?

 Mu May 2013, Wupu Wakulongozga ungupempha abali a mu dipatimenti yakupanga mapulogilamu nga MEPS, yo ye ku likulu lidu la pacharu chosi kuti yipangi app yo yiŵengi ndi Bayibolu la Charu Chifya lakunozgeka so. Paul Willies yo we mu dipatimenti yakupanga mapulogilamu nga MEPS, wangukamba kuti: “Mpaka pa nyengu iyi, tenga techendatuzgepu app ya mufoni pa app store yeyosi. Kweni tingujalikiska matimu, tingumika dankha ntchitu zinyaki ndipuso tingwamba kugwira ntchitu ndi madipatimenti nganyaki kuti tinozgi kweniso kupanga app ndi vo viŵengi mu app yo. Tapempheranga kananandi waka ndipu ndi chovyu chaku Yehova tingutuzga app yeniyi pa unganu wa pa chaka pati pajumpha waka myezi pafufupi yinkhondi!”

 Suzgu yinyaki yo tingukumana nayu yenga kupanga app iyi, kuti yije ndi malu ngakuŵikapu mabuku ndi mavidiyo ndipuso vineneru vinandi. Pakufika mu January 2015, pafufupi mabuku ngidu ngasonu nga Chingelezi ngangwamba kusanirika mu app yeniyi ndipu pati pajumpha myezi pafufupi 6, ŵanthu angwamba kupanga dawunilodi mabuku ngenanga mu vineneru vinyaki.

 Kutuwa pa nyengu yo, abali ndi azichi ŵidu aja achinozga app yeniyi munthowa zakupambanapambana, aŵika mavidiyo, mabuku ngosi ndi mavidiyo nga pa maunganu nga mpingu mu tab yimoza kweniso ŵanthu angasaniya malifarensi nga mu Kabuku Kakufufuziya Nkhani kutuliya mu mavesi nga mu Bayibolu.

 App ya JW Library yijulika pa vipangizu va mazuŵa nganu vakujumpha 8 miliyoni zuŵa lelosi ndipuso pa vipangizu vakujumpha 15 miliyoni mwezi wewosi! Kumbi ntchinthu wuli cho chikhumbika kuti app yeniyi yigwirengi umampha ntchitu pa vipangizu venivi? Mubali Willies wangukamba kuti: “App ya pafoni yituŵa kuti yilutirizga kunozgeka. Nyengu zosi tigwira ntchitu yakuŵikamu vinthu vinyaki ndipuso kupanga app yeniyi kuti yije yakovya ukongwa kweniso yambula kusuzga kuyigwiriskiya ntchitu. Chifukwa chakuti makampani ngapanga apudeti mafoni kananandi waka, nasi tisintha app yeniyi nyengu zosi kuti yilutirizgi kugwira ntchitu umampha. Tipenja so kunozga kweniso kuyipanga kuti yije yasonu pochiŵerengeru cha magazini ndi vinthu vakuvwisiya visazgikiyapu pa JW Library.” Pa JW Library pasanirika mabuku pafufupi 200,000 nga vineneru vosi, mavidiyo ndipuso vinthu vakuvwisiya vakujumpha 600,000!

 Kuti app yeniyi, yilutirizgi kugwira ntchitu umampha pakhumbika vidya vinandi. Tikhumbika so kulipira mapulogilamu nga pa kompyuta. Layisensi yimoza yiguliskika madola 1,500 ngaku America pa chaka. Kusazgiyapu yapa, chaka chechosi tilipira pulogilamu ya MEPS ndalama zakukwana madola 10,000 nga ku America (U.S.) kuti app iyi yilutirizgi kugwira ntchitu umampha pa makompyuta ngafya, matabuleti, ndi mafoni.

 App ya JW Library yachitiska kuti ndalama zo zigwiriskikiya ntchitu pakupulinta, kupanga ndi kutumiza mabuku zisikiyeku. Mwakuyeruzgiyapu, ŵanaŵaniyani kabuku ka Kukambiskana Malemba Zuŵa Lelosi. Mu 2013 tingupulinta timabuku ta Kukambiskana Malemba Zuŵa Lelosi pafufupi 12 miliyoni. Kweni mu 2020, tingupulinta waka timabuku pafufupi 5 miliyoni chinanga kuti pacharu chosi apharazgi pafufupi 700,000 asazgikiyaku. Ntchifukwa wuli pe kusintha viyo? Ntchifukwa chakuti sonu abali ndi azichi anandi aŵerenga lemba la zuŵa kuziya pa JW Library. a

 JW Library yitovya so munthowa zinandi. Geneviève, yo waja ku Canada, wawona kuti app yeniyi yitimuwovya kusambira Bayibolu nyengu zosi. Iyu wangukamba kuti: “Kukamba uneneska, nkhaŵengi kuti ndito mabuku ngosi ngo ndikhumba kusambiriya, ndiziŵa cha asani ndatingi ndifiskengi kungasambira mulenji wewosi. Kweni chifukwa chakuti nde ndi app ya JW Library mu tabuleti yangu, nde ndi chechosi cho ndikhumba pakusambira. Kusambira Bayibolu nyengu zosi kwandiwovya kuja ndi chivwanu chakukho ndipuso kundere kufupi ndi Yehova.”

 App yeniyi yawovya ukongwa mu nyengu ya mulili wa COVID-19. Charlyn wa ku United States, wangukamba kuti: “Chifukwa cha mulili wa COVID-19 wo wasapaliya pacharu chosi, ndalondiyapu cha magazini ngafya ngakupulinta kwa chaka sonu. Kweni JW Library ye ndi vosi vo tikhumbikiya kuti tilutirizgi kuja ndi chivwanu chakukho ndipu nditimuwonga ukongwa Yehova pakutipaska mphasu yeniyi.”

 Ŵanthu anandi atuvwa nge mo Faye wa ku Philippines wavwiya. Iyu wangukamba kuti: “Ndigwiriskiya ntchitu app yanthazi ukongwa ya JW Library kuti ndilutirizgi kuja paubwezi wakukho ndi Yehova. Ndigwiriskiya ntchitu app yeniyi asani ndiŵerenga ndi mulenji. Nditiyigwiriskiya so ntchitu pakuvwisiya sumu asani ndigwira ntchitu za panyumba. Kweniso nditiyigwiriskiya ntchitu pa maunganu ndipuso asani ndinozgeke sambiru la Bayibolu. Asani nde ndi nyengu ndiwonere so mavidiyo ndipuso kuŵerenga nkhani zinyaki pamwenga Bayibolu asani ndilindizga kuchita vinthu vinyaki pamzeri. App iyi njakuzirwa ukongwa.”

 App iyi njakovya ukongwa muuteŵeti. Mwakuyeruzgiyapu, po mzichi Cameroon wapharazganga wakhumbanga kugwiriskiya ntchitu lemba lo mzichi munyaki wanguligwiriskiya ntchitu pambula kuswera. Kweni wanguliluwa lemba lo. Iyu wangukamba kuti: “Mwamwaŵi ndingukumbukiya mazu nga pa lemba lo. Ndingujula app ya JW Library, ndikuluta pa Bayibolu ndipu ndingulemba mazu ngo pamalu ngakufufuziya. Mwaliŵiliŵi ndingulisaniya lemba lo ndakhumbanga. Chifukwa chakuti ndigwiriskiyi ntchitu app yeniyi, ndifiska kusaniya mavesi nganandi ngo ndangaluwa.”

 Ndalama zo mupereka mwakugwiriskiya ntchitu nthowa zakupambanapambana zo ze pa donate.jw.org zatiwovya kuti tipangi kweniso kunozga app ya JW Library kuti yilutilizgi kuja yamampha ukongwa kwa abali ndi azichi ŵidu pacharu chosi. Titikuwongani ukongwa chifukwa cha mtima winu wakupaska.

1. Mu October 2013—App yo yenga ndi Bayibolu la Charu Chifya la kunozgeka so yingutuzgika

2. Mu January 2015—Mabuku nganyaki nga Chingelezi kweniso nga vineneru vinandi ngangwamba kusanirika

3. Mu November 2015—Akusazgamu mtundu wakushede

4. Mu May 2016—Tab ya maunganu yinguŵikika

5. Mu May 2017—Akusazgiyamu malu ngakulembapu manosi

6. Mu December 2017—Akusazgiyamu Study Bible

7. Mu March 2019—Akusazgiyamu kachigaŵa ko katovya kupanga dawunilodi vinthu vakuvwisiya, kuwonere vidiyo kweniso Buku la Kufufuziya Nkhani kuti munthu wawonengi malifarensi

8. Mu January 2021—Akuŵikamu vinthu vakukwaskana ndi buku lakuti Kondwani ndi Umoyu Kwamuyaya!