Tiyeruzgiyi kuti ada akambiskana ndi mwana wawu munthurumi wa vyaka 7. Yiwu atimukambiya kuti: “Chiuta wakupanga charu ndi vosi vo vilimu kweniso wakupanga lumwi, mwezi ndi nyenyezi. Vinthu venivi wakuvipanga kali ukongwa.” Kwa kanyengu kamanavi, mwana yo waŵanaŵaniya vo awiski amukambiya ndipu watiŵafumba kuti, “Ada, nanga ndiyani yo wakupanga Chiuta?”

Awiski atimumuka kuti: “Palivi yo wakupanga Chiuta. Iyu walivi chiyambi.” Vo awiski amuka, vamukhorweska pa nyengu yeniyi pe. Kweni po wakuwa, fumbu ili lilutirizga kumusuzga maŵanaŵanu. Iyu wawona kuti nkhwakusuzga kuvwisa kuti munthu munyaki waŵevi chiyambi pakuti chinanga nchilengedu che ndi chiyambi. Mwana yo watijifumba kuti: ‘Kumbi Chiuta wakutuliya pani?’

Kumbi Bayibolo limuka wuli? Limuka mwakukoliyana ndi mo amukiya ada wo taŵazumbuwa mu chakuyeruzgiyapu. Mosese wangukamba kuti: ‘Ambuya, . . . ngenga ngandawi mapiri, mwenga mundawumbi charu chapasi, kutuwa ku muyaya mpaka ku muyaya ndimwi Chiuta.’ (Sumu 90:1, 2) Mwakuyanana ŵaka, mchimi Yesaya nayu wangukamba kuti: ‘Kuti ukuziŵa cha? Kumbi ulivi kuvwa? Ambuya ndiyu Chiuta wamuyaya, Mulengi wa vigoti va charu chapasi’! (Yesaya 40:28) Mwakuyanana ŵaka, kalata yaku Yuda nayu yikamba kuti “yindaŵepu migonezi” Chiuta wengapu.​—Yuda 25.

Nge mo wakutumika Paulo wangukambiya, malemba yanga ngatitilongo kuti Chiuta ndi “Karonga wamuyaya.” (1 Timote 1:17) Venivi ving’anamuwa kuti Chiuta wengaku kwamba kali mwaviyo tingaziŵa cha po wakwambiya. Ndipu wakaŵangapu nyengu zosi. (Chivumbuzi 1:8) Iyu wadanika kuti Wanthazizosi chifukwa chakuti ngwamuyaya.

Nchifukwa wuli fundu yeniyi njakusuzga kuyivwisa? Chifukwa chakuti umoyu widu ngufupi ndipu tiwona utali wa nyengu mwakupambana ndi Yehova. Kwaku Chiuta virimika 1,000 ve nge zuŵa limoza chifukwa chakuti iyu ngwamuyaya. (2 Petro 3:8) Mwakuyeruzgiyapu: Kumbi zombi yo waja ndi umoyu mazuŵa pafupifupi 50, wangaziŵa kuti tija vyaka 70 pamwenga 80? Wangaziŵa cha! Bayibolo likonkhoska kuti isi te nge azombi ndipu tiyanana cha ndi Mulengi widu Mura. Zeru zidu zimana ukongwa kuziyeruzgiya ndi zaku Chiuta. (Yesaya 40:22; 55:8, 9) Mwaviyo, vakuziziswa cha kuti tileka kuvwisa vosi va mo Yehova waliri.

Chinanga kuti fundu yakuti Chiuta ngwamuyaya yingaŵa yakusuzga kuyivwisa kweni tingawona kuti njakuvwika. Asani munthu munyaki wangulenga Chiuta, munthu mweniyo watingi waŵengi Mulengi. Kweni nge mo Bayibolo likonkhoske, Yehova ndiyu ‘wakuvilenga vosi.’ (Chivumbuzi 4:11) Kusazgiyapu pa fundu yeniyi, tiziŵa kuti nyengu yinyaki kwengavi chilengedu. (Chiyambo 1:1, 2) Nanga chilengedu chikutuliya pani? Pakhumbikanga kuti paje Mulengi kuti chiŵepu. Mulengi wakuŵapu kulivi Mwana waki wapade, angelu kweniso vinthu vinyaki vosi. (Jobu 38:4, 7; Ŵakolose 1:15) Ivi vilongo kuti pakwamba wengaku yija. Iyu wakulengeka cha chifukwa pa nyengu yo pengavi chinthu chechosi cho chatingi chimulengengi.

Kuŵapu kwinu ndipuso kwa chilengedu chosi mbukaboni wakuti kwe Chiuta wamuyaya. Iyu watenere kuti waŵepu nyengu zosi chifukwa ndiyu wachitiska chilengedu chosi kuti chiyendengi ndi kuŵika marangu ngakuti chiyendiyengi. Ndipu ndiyu pe yo wakupaska umoyu vinthu vosi.​—Jobu 33:4.