Asani muvwisiya nkhani zo zichitika pacharu chapasi, panyaki muwona kuti nyengu zinyaki ŵanthu agwiriskiya nchitu visopa kuti achiti vinthu viheni. Ivi vilongo kuti ndi visopa vosi cha vo visopa Chiuta wauneneska. (Mateyu 7:15) Kukamba uneneska, ŵanthu anandi alandizgika.​—Ŵerengani 1 Yohane 5:19.

Chinanga kuti ve viyo, Chiuta waziŵa ŵanthu a mtima wamampha wo atanja vinthu vamampha kweniso vauneneska. (Yohane 4:23) Iyu wadana ŵanthu ŵenaŵa kuti asambiri uneneska kutuliya mu Mazu ngaki, Bayibolo.​—Ŵerengani 1 Timote 2:3-5.

Yehova Chiuta wawunganiska ŵanthu kutuliya mu visopa vakupambanapambana mwakuŵasambiza uneneska kweniso kuti ayanjanengi. (Mika 4:2, 3) Mwaviyo, mungaziŵa ŵanthu wo ŵe muchisopa chauneneska mwakuwona mo achitiya vinthu ndi anyawu.​—Ŵerengani Yohane 13:35.

Ŵanthu wo asopa mwauneneska agomezga Bayibolo ndipuso atiligwiriskiya nchitu pa umoyu wawu. (2 Timote 3:16) Yiwu atumbika zina laku Chiuta. (Sumu 83:18) Agomezga kuti ndi Ufumu waku Chiuta pe wo wazamuwovya ŵanthu. (Danyele 2:44) Yiwu alondo Yesu ndipu ‘aŵalisa ukweru’ mwakuchitiya anyawu vinthu vamampha. (Mateyu 5:16) Mwaviyo, Akhristu auneneska aziŵika chifukwa chakuti aluta kunyumba za ŵanthu kuchiŵapharazgiya uthenga wamampha wa Ufumu waku Chiuta.​—Ŵerengani Mateyu 24:14; Machitidu 5:42; 20:20.