Yesu wangufwa, wanguyuskika ndipuso wangukwera kuchanya m’chaka cha 33 C.E. Pavuli paki, iyu wangupaskika mazaza kuti waje Fumu. (Danyele 7:13, 14) Pambula kuswera yapa, Yesu nge Fumu, wachitengepu kanthu kuti wajalikiski chimangu pacharu kweniso kutuzgapu ukavu.​—Ŵerengani Sumu 72:7, 8, 13.

Yesu yo wazamuwusa ŵanthu, wazamuchita vinthu vamampha ukongwa. Iyu wazamugwiriskiya nchitu nthazi zo Awiski akumupaska kuti ŵanthu azije so akufikapu. Yiwu azamukondwa ndi umoyu pacharu chapasi chifukwa chakuti azamukota cha pamwenga kufwa.​—Ŵerengani Yohane 5:26-29; 1 Ŵakorinte 15:25, 26.

Kumbi sonu Yesu wachitanji?

Sonu, Yesu walongozga nchitu yakupharazga yo akusambira ŵaki auneneska achita pacharu chosi chapasi. Yiwu akambiya ŵanthu vo Bayibolo likamba vakukwaskana ndi Ufumu waku Chiuta. Yesu wangukamba kuti wazamulutirizga kulongozga nchitu yakupharazga yo wangupaska akusambira ŵaki mpaka po Ufumu waku Chiuta wazamutuzgiyapu maufumu nga ŵanthu.​—Ŵerengani Mateyu 24:14; 28:19, 20.

Yesu wagwiriskiya nchitu mpingu wachikhristu kulongozga ŵanthu ŵaki kuti ajengi ndi umoyu wamampha. Iyu walutirizgengi kuŵalongozga mpaka m’charu chifya cho Chiuta wakulayizga ndipu wazakuŵataska po mgonezi uwu wazamubwangandulikiya.​—Ŵerengani 2 Petro 3:7, 13; Chivumbuzi 7:17.