Mukondwengi Ndi Marangu Ngaku Yehova

“Visimisimi vinu nchihara changu cha muyaya.”—SUMU 119:111.

KUMBI MUNGAMUKA WULI?

Nchifukwa wuli tikondwa ndi marangu ngaku Yehova?

Kumbi tingachita wuli kuti tigomezgengi ukongwa Yehova?

Nchifukwa wuli kuchita phamphu pa nchitu za Ufumu nkhwakukhumbika?

1. (a) Kumbi ŵanthu achita wuli asani apaskika ulongozgi, nanga nchifukwa wuli achita viyo? (b) Kumbi kujikuzga kungachitiska munthu kuti wawuwonengi wuli ulongozgi?

 ŴANTHU avwiya ulongozgi mu nthowa zakupambanapambana. Munthu wangavwiya ulongozgi mwambula kusuzga kutuliya ku munthu yo we ndi udindu kweni wangakana kuvwiya ulongozgi asani utuliya ku munthu wa msinkhu waki pamwenga yo walivi udindu. Ŵanthu apambana ukongwa mo avwiya asani achenyeka kweniso apaskika ulongozgi. Anyaki achita chitima, aguŵa pamwenga achita soni penipo anyaki achiskika, avwisiya kweniso achitapu kanthu. Nchifukwa wuli apambana? Cho chichitiska, nkhujikuzga. Jalidu lakujikuzga lingachitiska munthu kuti waleki kuŵanaŵana umampha, wakani kulonde ulongozgi ndipuso waleki kuziŵa kuti ulongozgi utovya.—Nthanthi 16:18.

2. Nchifukwa wuli Akhristu auneneska awonga ulongozgi wakutuliya m’Mazu ngaku Chiuta?

² Akhristu auneneska awonga asani apaskika ulongozgi wo ungaŵawovya, ukongwa asani utuliya m’Mazu ngaku Chiuta. Ulongozgi wo Yehova wapereka utitiwovya kuziŵa vinthu vo titenere kukhwecha, kuziŵa mo tingakhweche jalidu lakwanja vinthu vakuliŵavu, jalidu la ureŵi, kumwa munkhwala wakutimbanyizga wongu ndipuso uloŵevu. (Nthanthi 20:1; 2 Ŵakor. 7:1; 1 Ŵat. 4:3-5; 1 Tim. 6:6-11) Ndipuso tikondwa ndi “chimwemwi cha mtima” cho tija nachu chifukwa chakuvwiya ulongozgi waku Chiuta.—Yes. 65:14.

3. Kumbi ndi maŵanaŵanu wuli ngo wakulemba sumu wenga nangu ngo kungaŵa kwamampha kungalondo?

³ Kuti tilutirizgi kuja pa ubwezi wamampha ndi Awuskefwi akuchanya, titenere kugwiriskiya nchitu ulongozgi wawu wazeru pa umoyu widu. Vingaŵa umampha asani tilongo kuti tiŵanaŵana nge wakulemba sumu, yo wakukamba  kuti: “Visimisimi vinu nchihara changu cha muyaya; ndivu likondwa la mtima wangu.”! (Sumu 119:111) Kumbi nasi tikondwa ndi marangu ngaku Yehova pamwenga nyengu zinyaki titingawona kuti ndi mphingu? Chinanga kuti nyengu zinyaki tingasuzgika kuti tizomerezgi ulongozgi wo tapaskika kweni tingaweriyanga vuli cha. Tikhumbika kuja ndi chigomezgu chakukho kuti Chiuta ngwazeru ukongwa! Tiyeni tikambiskani nthowa zitatu zo zingatiwovya kuja ndi chigomezgu chakukho.

MUROMBENGI KUTI MUJE NDI CHIGOMEZGU CHAKUKHO

4. Nchinthu wuli cho Davidi wangulutirizga kuchita pa umoyu waki?

⁴ Chinanga kuti Karonga Davidi wangukumana ndi vinthu vamampha ndipuso viheni kweni wangulutirizga kugomezga Mulengi waki. Iyu wangukamba kuti: “Ambuya, kwaku imwi, ndiyunuskiya mzimu [umoyu] wangu. Mwa Chiuta wangu, mwaku imwi ndagomekezga.” (Sumu 25:1, 2) Nchinthu wuli chinguwovya Davidi kuti wagomezgi Awiski akuchanya?

5, 6. Kumbi Mazu ngaku Chiuta ngatitikambiyanji pa nkhani ya ubwezi waku Davidi ndi Yehova?

⁵ Ŵanthu anandi aromba kwaku Chiuta asani akumana ndi masuzgu pe. Kumbi vingaŵa wuli asani mubwezi pamwenga mubali winu wakamba namwi pa nyengu yo wakhumba ndalama pe pamwenga chovyu? Mungayamba kukayikiya asani watikuyanjani nadi. Davidi wayanjanga Chiuta pa masuzgu pe cha. Kuja pa ubwezi ndi Yehova, kungumuwovya kuti waje ndi chigomezgu ndipuso wayanjengi Chiuta waki pa umoyu waki, pa nyengu ya masuzgu ndipuso yambula masuzgu.—Sumu 40:8.

⁶ Davidi wangutumbika Yehova ndi kumuwonga, wonani vo iyu wangukamba: “A Chiuta, Mbuyafwi, ndakurumbika mbwenu zina linu m’charu chosi chapasi! Imwi unkhankhu winu we m’malu ngakuchanya.” (Sumu 8:1) Kumbi mwawona kuti Davidi wenga nadi pa ubwezi wakukho ndi Awiski akuchanya? Iyu waziŵanga kuti Chiuta ndi mukulu kweniso we ndi unkhankhu, venivi vingumuchitiska kuti wathamikengi Yehova “zuŵa losi.”—Sumu 35:28.

7. Kumbi tiyanduwa wuli asani tiromba kwaku Chiuta?

⁷ Nge Davidi, tikhumbika kukambiskananga ndi Yehova kaŵikaŵi kuti timugomezgengi ukongwa. Bayibolo likamba kuti: “Ndereni kufupi kwaku Chiuta, ndipu wanderengi kufupi kwinu.” (Yak. 4:8) Kuromba kutitiwovya kuti tindere kufupi ndi Chiuta ndipuso ndi nthowa yakukhumbika yo tilonde mzimu wakupaturika.—Ŵerengani 1 Yohane 3:22.

8. Nchifukwa wuli tikhumbika cha kugwiriskiya nchitu mazu ngamoza pe nyengu zosi asani tiromba?

⁸ Kumbi mutanja kukamba marombu ngakuloŵeza pamwenga kugwiriskiya nchitu mazu ngamoza pe asani muromba? Asani ndi viyo, mwechendarombi muŵanaŵanengi dankha vo mukhumba kukamba. Kumbi mubwezi pamwenga mubali widu wangakondwa asani tikamba nayu nkhani yimoza pe nyengu zosi? Iyu wangayamba kukhumba kuleka kutivwisiya. Mbuneneska kuti Yehova wangakana cha rombu lakutuwa pasi pa mtima la mteŵeti waki. Kweni tingachita umampha kuleka kukamba vinthu mwakuchita kuloŵeza asani tiromba kwaku iyu.

9, 10. (a) Kumbi ndi vinthu vinyaki nivi vo tingakamba pakuromba? (b) Nchinthu wuli chingatiwovya kuti tirombengi kutuliya pasi pa mtima?

⁹ Kukamba uneneska, marombu ngidu ngakhumbika cha kuja ngakuthaŵiriya asani tikhumba kundere kufupi ndi Chiuta. Asani tiromba kwaku Yehova kutuliya pasi pa mtima, tinderengi kufupi nayu ndipuso timugomezgengi ukongwa. Kumbi ndi vinthu vinyaki nivi vo tingakamba pakuromba? Mazu ngaku Chiuta ngamuka kuti: “Mu kanthu kosi, mu rombu ndi mu niniziku pamoza ndi kuwonga, mapemphu nginu ngaziŵiki kwaku Chiuta.” (Ŵaf. 4:6) Asani tiromba, tingazumbuwa chechosi cho chikwaska ubwezi widu ndi Chiuta kweniso umoyu widu nge ateŵeti ŵaki.

¹⁰ Kuŵanaŵaniya mazu nga anthurumi ndi  anthukazi akugomezgeka wo marombu ngawu ngakulembeka m’Bayibolo, kungatiwovya. (1 Sam. 1:10, 11; Mac. 4:24-31) Buku la Sumu le ndi marombu nganandi ngakutuliya pasi pa mtima ndipuso sumu zakutumbika Yehova. Marombu kweniso sumu zenizi, zilongo mo ŵanthu avwiyanga asani akumana ndi masuzgu ndipuso asani akondwa. Kusanda mazu nga ŵanthu akugomezgeka ngenanga, kungatiwovya kuti tikambengi marombu ngamampha kwaku Yehova.

MULUNGURUKENGI PA MARANGU NGAKU CHIUTA

11. Nchifukwa wuli tikhumbika kulunguruka pa ulongozgi waku Chiuta?

¹¹ Davidi wangukamba kuti: “Chisimisimi cha Ambuya nchakukho, muzeleza chitimusanduska wazeru.” (Sumu 19:7) Chinanga kuti tingaziŵa vinandi cha, tingaja ndi zeru asani tivwiya marangu ngaku Chiuta. Kuti tiyanduwi ukongwa ndi ulongozgi wa m’Malemba, tikhumbika kulunguruka. Kuchita viyo, kutiwovyengi kulutirizga kuja akugomezgeka asani titeseka kusukulu ndi kunchitu, asani tikhumbika kuvwiya fundu zaku Chiuta pa nkhani ya ndopa, kuleka kuchitaku vinthu va ndali ndipuso kugwiriskiya nchitu fundu za m’Bayibolo pa nkhani ya vakuvwala ndi kujitoweska. Kuziŵa mo Chiuta wawone nkhani zenizi, kutiwovyengi kunozgeke masuzgu kweniso kusankhiya limu mumtima mwidu vo tingachita asani takumana ndi masuzgu. Kunozgeke, kungatiwovya kuti tileki kuzisuzgika ukongwa.—Nthanthi 15:28.

12. Kumbi tikhumbika kuŵanaŵaniya mafumbu nanga kuti tivwiyengi visimisimi vaku Chiuta?

¹² Po tilindizga kufiskika kwa vo Chiuta wakulayizga, kumbi vakuchita vidu vilongo kuti tilutirizga kuchita khumbu laku Chiuta? Mwakuyeruzgiyapu, kumbi tigomezga nadi kuti pambula kuswera yapa Babiloni Mukulu wabwangandulikengi? Kumbi tiwona kuti layizgu lakuzija ndi umoyu wamuyaya m’paradayisu pacharu chapasi lazamufiskika nadi nge mo tagomezgiyanga tichisambira ŵaka? Kumbi teche kulutirizga kuchita phamphu pa nchitu yakupharazga pamwenga tidanjizga vakukhumba vidu? Nanga wuli nkhani ya chiyuka, kutoweskeka kwa zina laku Yehova kweniso kuti ndiyu pe wakwenere kuwusa? Kumbi nkhani zenizi, teche kuziwona kuti zakukhumbika? Kulunguruka pa mafumbu ngenanga kungatiwovya kuti tichiti nge mo wakukambiya wakulemba sumu kuti: “Visimisimi vinu nchihara changu cha muyaya.”—Sumu 119:111.

13. Nchifukwa wuli Akhristu a mu nyengu ya akutumika angutondeka kuvwisa vinthu vinyaki? Kambani chakuwoniyapu.

¹³ Vinthu vinyaki vo vikambika m’Bayibolo tingavivwisa cha sonu chifukwa chakuti nyengu yakuti Yehova watikonkhoske yechendakwani. Yesu wangukambiya akutumika ŵaki mwakuwerezgawerezga kuti iyu wakhumbikanga kutombozgeka ndipuso kubayika. (Ŵerengani Mateyu 12:40; 16:21.) Kweni akutumika aziŵanga cha vo wang’anamuwanga. Yiwu anguziŵa wati wafwa ndipuso wati wasintha kuja nge munthu pavuli pakuti wayuskika. Iyu wanguwoneke ku akusambira ŵaki anandi ndipu ‘wangubanuwa chinjeru chawu kuwamu m’Malemba ngo.’ (Luka 24:44-46; Mac. 1:3) Mwakuyanana ŵaka, akulondo Khristu ŵati alonde mzimu wakupaturika pa Pentekoste mu 33 C.E., ndipu anguziŵiya kuti Ufumu waku Chiuta watingi uzijalikiskikengi kuchanya.—Mac. 1:6-8.

14. Nchakuwoniyapu chamampha nichi cho abali anandi alongo mu nyengu yidu chinanga kuti anguvwisa umampha cha vinthu vinyaki vakukwaskana ndi mazuŵa ngakumaliya?

¹⁴ Mwakuyanana ŵaka, penga vinthu vinyaki vakukwaskana ndi “mazuŵa ngakumaliya” vo Akhristu auneneska a mu nyengu yidu akhazganga kuti vichitikengi kweni vikuchitika cha. (2 Tim. 3:1) Mwakuyeruzgiyapu, anyaki aŵanaŵananga kuti m’chaka cha 1914, ŵenga pafupi kuluta kuchanya. Vo alindizganga vati vatondeka kuchitika nyengu yeniyo, kusanda  Malemba mwakuphwere ukongwa kunguŵawovya kuziŵa kuti akhumbikanga kugwira nchitu yikulu ukongwa yakupharazga. (Marko 13:10) Mwaviyo, m’chaka cha 1922, J. F. Rutherford, yo walongozganga nchitu yakupharazga wangukambiya wosi wo anguwungana pa unganu ukulu wa vyaru wo unguchitikiya ku Cedar Point, Ohio, U.S.A. kuti: “Awonani, Fumu yiwusa! Imwi ndimwi mutenere kupharazga zaku iyu. Mwaviyo, pharazgani, pharazgani, pharazgani za Fumu ndi ufumu waki.” Kutuliya pa nyengu yeniyo, ateŵeti aku Yehova aja achiziŵika ndi nchitu yakupharazga “evangeli [uthenga] wa Ufumu.”—Mat. 4:23; 24:14.

15. Kumbi tiyanduwa wuli asani tilunguruka pa mo Chiuta waja wachichitiya vinthu ndi ŵanthu ŵaki?

¹⁵ Asani tilunguruka pa mo Yehova wachitiyanga vinthu ndi ŵanthu ŵaki kali kweniso sonu, tija ndi chigomezgu chakukho kuti wazamufiska khumbu laki. Marangu ngaku Chiuta ngatitiwovya so kuti tikumbukengi mauchimi ngaki ngo ngazamufiskika. Kuchita viyo, kutiwovyengi kuti tigomezgengi malayizgu ngaki.

KUSOPA KUTIWOVYENGI KUJA NDI CHIGOMEZGU CHAKUKHO

16. Kumbi ndi vitumbiku wuli vo tisaniya asani tilutirizga kuchita phamphu mu uteŵeti?

¹⁶ Chiuta widu Yehova, ndi Chiuta wanthazi ukongwa ndipu iyu wafiska vo wakhumba. Wakulemba sumu wangukamba kuti: “Njani we ndi mazaza nge ndingo mwenangu imwi, Ambuya? Ndimwi wanthazi zikuru! Ngakuru mbwenu mazaza nginu!” (Sumu 89:8, 13) Mwakukoliyana ndi fundu yeniyi, Yehova wakondwa kweniso watititumbika chifukwa cha phamphu lidu pakovya vinthu va Ufumu. Iyu wawona ateŵeti ŵaki wosi anthurumi, anthukazi, ŵana ndipuso akukota kuti aja ŵaka cha ndi ‘kurya chakurya cha ukata [alesi].’ (Nthanthi 31:27) Nge mo Mulengi widu wachitiya, tija akutangwanika ndi nchitu za ufumu. Asani titeŵete Chiuta ndi mtima wosi, tiyanduwa  ndipu Yehova wakondwa kweniso watumbika uteŵeti widu.—Ŵerengani Sumu 62:12.

17, 18. Nchifukwa wuli tingakamba kuti kuchita vinthu mwakugomezgeka kutitiwovya kuti tigomezgengi ukongwa ulongozgi waku Yehova? Kambani chakuwoniyapu.

¹⁷ Kumbi kuchita vinthu mwakugomezgeka kutitiwovya wuli kuti tigomezgengi ukongwa Yehova? Ŵanaŵaniyani nkhani ya m’Malemba yo yikonkhoska vo vinguchitika Ayisraele achisere m’Charu Chakulayizgika. Yehova wangukambiya asembi wo angunyamuwa bokosi la phanganu kuti ayendi mpaka kuchifika m’Msinji wa Yordane. Kweni Ayisraele ŵe pafupi kufika anguwona kuti msinji unguzaza mpaka kusapaliya chifukwa cha vuwa yakumaliya. Kumbi yiwu atingi achitengi wuli? Kumbi atingi amangengi misasa m’mphepeti mwa msinji ndi kuja mwenimo kwa masabata pamwenga kwa nyengu yitali kuti maji ngaphwi? Awa, yiwu angugomezga ukongwa Yehova ndipu angulondo ulongozgi waki. Nanga nchinthu wuli chinguchitika? Bayibolo likamba kuti: “Asembi ŵati akanda ŵaka m’maji, maji nga mumsinji nganguleka kwenda . . . ndipu asembi anguma pakati pa msinji wambula maji wo wenga pafupi ndi Yeriko ndipu ŵanthu wosi anguyambuka.” (Yos. 3:12-17, Contemporary English Version) Aŵanaŵaniyani mo angukondwe ŵati awona kuti maji ngo ngatchimbiyanga ukongwa ngaleka kwenda! Mwambula kukayika, Ayisraele angulutirizga kuja ndi chivwanu mwaku Yehova chifukwa chakuti angugomezga ulongozgi waki.

¹⁸ Mbuneneska kuti Yehova watiŵachitiya vakuziziswa nge venivi cha ateŵeti ŵaki mazuŵa nganu kweni watiŵatumbika chifukwa chakuchita vinthu mwakugomezgeka. Mzimu wakupaturika waku Chiuta, utiŵawovya kuti agwirengi nchitu yo akupaskika yakupharazga uthenga wa Ufumu pacharu chosi chapasi. Kaboni mura waku Yehova, Khristu Yesu, wangusimikiziya akusambira ŵaki kuti wazakuŵawovya pa nchitu yakukhumbika yeniyi. Iyu wanguti: “Viyo rutani, sambizani mitundu yosi, . . . ini nde namwi mazuŵa ngosi mpaka ku umari wa mgonezi wo.” (Mat. 28:19, 20) Akaboni aku Yehova anandi ŵeniwo achitanga soni kweniso mantha, angazomerezga kuti mzimu wakupaturika waku Chiuta waŵawovya kuti apharazgengi mwambula mantha ku ŵanthu wo akumana nawu mu uteŵeti.—Ŵerengani Sumu 119:46; 2 Ŵakorinte 4:7.

19. Kumbi titenere kugomezganji chinanga kuti titondeka kuchita vinandi?

¹⁹ Abali ndi azichi anyaki atondeka kuchita vinandi chifukwa chakuti atama pamwenga mbakukota. Yiwu atenere kugomezga kuti Chiuta ‘walisungu ndi . . . wasangarusku losi’ waziŵa vo Mkhristu wauneneska weyosi wakumana navu. (2 Ŵakor. 1:3) Iyu waziŵa vosi vo tichita pakuwovya vinthu va Ufumu. Tosi tikhumbika kukumbuka kuti kugomezga sembi yo Khristu wakupereka, nchinthu chakukhumbika ukongwa kuti tizipozomoki penipo titesesa kuchita vosi vo tingafiska.—Ŵah. 10:39.

20, 21. Kumbi ndi nthowa nizi zo tilongole kuti tigomezga Yehova?

²⁰ Kusopa kwidu kusazgiyapu kugwiriskiya nchitu nyengu, nthazi ndipuso vinthu vo tenavu mwakukoliyana ndi vo tingafiska. Tikhumba ‘kuchita mlimu wa evangeli’ ndi mtima widu wosi. (2 Tim. 4:5) Kukamba uneneska tikondwa kuchita viyo chifukwa nchitu yeniyi yitovya ŵanthu “kufikapu pa mziŵiru wa uneneska.” (1 Tim. 2:4) Vakuwoneke limu kuti kutumbika Yehova kweniso kumuthamika, kutitiwovya kuti tije nayu pa ubwezi wakukho. (Nthanthi 10:22) Ndipu kutitiwovya so kuti timugomezgengi ukongwa Mulengi widu.—Ŵar. 8:35-39.

²¹ Nge mo takonkhoske, kuja ndi chigomezgu kuti Yehova watipaskengi ulongozgi wazeru kuchitika kwija cha, tikhumbika kwesesa kuja ndi chigomezgu chaviyo. Mwaviyo, mosi mo vingaŵiya, titenere kuromba kuti timugomezgengi. Tilungurukengi pa mo Yehova wangufiskiya malayizgu ngaki kali ndi mo wazakungafiskiya kunthazi kweniso tilutirizgi kusopa kuti tije ndi chigomezgu chakukho mwaku iyu. Kukamba uneneska marangu ngaku Yehova ngazamuŵapu mpaka muyaya. Namwiso mungazija ndi umoyu mpaka muyaya!

[Mafumbu]

[Chithuzi papeji 12]

[Chithuzi papeji 15]

Kumbi mugomezgengi Yehova nge mo ŵanthu ŵaki anguchitiya mu nyengu yaku Yoswa? (Wonani ndimi 17, 18)