Vo Bayibolo Limuka

Kumbi Diabolo wakutuliya nunkhu?

Chiuta wangumulenga kuti waje Diabolo cha. Panyengu yo wangumulenga wenga mungelu wamampha kweni pavuli paki wangusankha yija kuja Diabolo, yo wadanika so kuti Satana. Yesu wangukamba kuti, nyengu yinyaki Diabolo wachitanga vinthu mwauneneska ndipuso mwambula kunangiska. Mwaviyo, pakwambiriya Diabolo wenga mungelu murunji ndipu wenga mwana waku Chiuta.—Ŵerengani Yohane 8:44.

Kumbi mungelu mwenuyu wangusambuka wuli kuti waje Diabolo?

Mungelu yo wangusambuka Diabolo wangusankha yija kususkana ndi Chiuta ndipuso wangunyenga banja lakwamba kuti likolerani nayu. Mwaviyo, wangujisambusa kuti waje Satana, kung’anamuwa “Wakususka.”—Ŵerengani Chiyambo 3:1-5; Chivumbuzi 12:9.

Nge mo viliri ndi angelu wosi aku Chiuta, mungelu wamampha mwenuyu yo wangusambuka Diabolo, wenga ndi wanangwa wakusankha kuchita vinthu vamampha pamwenga viheni, kweni iyu wakhumbisiskanga kuti amusopengi. Wakhumbisiskanga kulonde unkhankhu m’malu mwakukondwesa Chiuta.—Ŵerengani Mateyu 4:8, 9; Yakobe 1:13, 14.

Kumbi Diabolo mwenuyu walutirizga wuli kulandizga ŵanthu? Kumbi mutenere kumuwopa? Mungasaniya kwamuka kwa mafumbu yanga m’Bayibolo.

Kuti muziŵi vinandi, wonani mutu 10 wa buku ili, Kumbi Bayibolo Lisambizanji Weniukongwa? lo likupharazgika ndi Akaboni aku Yehova

[Chithuzi papeji 32]