“Yiwu Mbacharu Cha”

“Charu chaŵatinkha, chifukwa yiwu mbacharu cha.”—YOHANE 17:14.

Kumbi Venivi Ving’anamuwanji? Yesu wenga wacharu cha ndipu iyu waseleriyangamu cha mu vakuchitika vakupambanapambana kusazgapu vandali. Iyu wangukonkhoska kuti: “Asani Ufumu wangu wenga wa charu ichi, mphanyi ateŵeti ŵangu achita nkhondu kuti ndileki kuperekeka kwa Ayuda. Kweni Ufumu wangu ngwakutuliya kucharu ichi cha.” (Yohane 18:36) Yesu wanguchiska so akusambira ŵaki kuti angajanga cha ndi mijalidu yo Mazu ngaku Chiuta ngakanizga ndipuso vo alongoro vikoliyanengi ndi Mazu ngenanga.—Mateyu 20:25-27.

Kumbi Akhristu a mu Nyengu ya Akutumika Angufiska Wuli Venivi? Jonathan Dymond yo walembanga vakukwaskana ndi visopa wangukamba kuti Akhristu akwambiriya “akananga kuchitaku [nkhondu]; ndipu chifukwa cha venivi yiwu akumananga ndi masuzgu nge kunyozeka, kumangika pamwenga kubayika.” Yiwu azomerezanga kusuzgika mumalu mwa kuselere vacharu. Mijalidu yawu yamampha nayu yaŵapambanisanga ndi anyawu. Pa nyengu iyi Peturo wangukambiya Akhristu kuti: “Yiwu azizwa kuti mulutirizga cha kutchimbiya nawu limoza mu nkharu zabwekabweka, ndipu venivi vichitiska kuti akunyozeningi.” (1 Peturo 4:4) Will Durant kaswiri wa mbiri yakali wangulemba kuti Akhristu “alengesanga visopa vaboza chifukwa cha mijalidu yawu yamampha ndipuso kuleka kuselere vacharu.”

Mbayani wo Achita Venivi Mazuŵa Nganu? Pa nkhani ya kuleka kuselere vacharu, buku linyaki likamba kuti: “Kukana kusere usilikali nkhunanga.” (New Catholic Encyclopedia) Nkhani yinyaki yo yenga mu magazini yinyaki yingukamba kuti lipoti lo wupu wa African Rights lingutuzga mu 1994, lingulongo kuti matchalitchi ngosi ngachitangaku nkhondu yo yachitikanga ku Rwanda “kupatuwaku Akaboni aku Yehova pe.”—Reformierte Presse.

Achikambiskana vo chipani cha Nazi chinguchita pakubaya ŵanthu mwankhaza, musambizi munyaki wa ku sekondale wangudandawula kuti, “pengavi gulu pamwenga wupu wo ungususapu maboza ngo ngakambikanga pamwenga vinthu vankhaza ndipuso kubaya ŵanthu ko kwachitikanga.” Kweni msambizi uyu wati waluta kumalu nganyaki ngakusungiyaku vinthu vakali (United States Holocaust Memorial Museum), wangulemba kuti: “Sonu ndaziŵa uneneska pa nkhani iyi.” Iyu wanguchiwona kuti Akaboni aku Yehova anguleka cha vo agomezganga chinanga kuti atombozgekanga ukongwa.

Nanga wuli pa nkhani ya mijalidu? Magazini yinyaki yingukamba kuti: “Achinyamata anandi Akatolika mazuŵa nganu akoliyana cha ndi dangu la tchalitchi lakuti ŵanthu angajaliyanga limoza cha pamwenga kugonana ŵechendatorani.” (U.S. Catholic) Mumagazini iyi mwenga mazu nga mulongozgi munyaki wa tchalitchi ili yo wangukamba kuti: “Ŵanthu anandi ukongwa wo ndiwona, ndingakamba waka kuti pafufupi hafu, asani atorana atuŵa kuti akwamba kali kuja limoza.” Kweni buku linyaki lingukamba kuti Akaboni aku Yehova “anderezeka cha pakulondo fundu za mijalidu yamampha pa umoyu wawu.”—The New Encyclopædia Britannica