1, 2. Kumbi mazu ngakuti ‘chakukandapu malundi’ ngang’anamuwanji?

 YEHOVA CHIUTA wangukamba kuti: “Kuchanya ndi mpandu wangu wachifumu, ndipu charu chapasi nchakukandapu malundi ngangu.” (Yes. 66:1) Iyu wangukamba so kuti: “Nditumbikengi malu ngakuŵikapu malundi ngangu.” (Yes. 60:13) Kumbi Chiuta wangutumbika wuli malu ngakuŵikapu malundi ngaki? Kumbi ivi vititikwaska wuli isi pakuti tija po iyu ‘waŵika malundi’ ngaki?

² M’Malemba nga Chiheberi, mazu ngakuti ‘chakukandapu malundi’ ngang’anamuwa so nyumba yo Ayisraele asopiyangamu. (1 Mik. 28:2; Sumu 132:7) Nyumba iyi yenga panu pacharu chapasi ndipu ndimu ŵanthu asopiyanga Chiuta mwauneneska. Ndichu chifukwa chaki, Yehova wayiwoniyanga kuti yenga yakutowa ukongwa. Mwaviyo, nyumba iyi yatumbikanga malu ngo Yehova waŵikapu malundi ngaki.

3. Kumbi mazuŵa nganu Chiuta wagwiriskiya ntchitu vinthu wuli kuti timusopengi, nanga ivi vingwamba zukwanji?

³ Mazuŵa nganu, Yehova wagwiriskiya ntchitu nyumba chayiyu cha kuti timusopengi mwauneneska. Kweni wagwiriskiya  ntchitu nthowa yinyaki yo yitimutumbika ukongwa kuluska nyumba yo Ayisraele asopiyangamu. Nthowa iyi ndi vo Chiuta wachita kuti tije nayu pa ubwezi kuporote mu sembi ya mwana waki Yesu Khristu. Nthowa iyi yingwamba kugwira ntchitu mu 29 C.E. po Yesu wangubatizikiya ndi kusankhika kuja Wasembi Mula wa kusopa kwauneneska.​—Ŵah. 9:11, 12.

4, 5. (a) Mwakukoliyana ndi Sumu chaputala 99, kumbi ŵanthu wo ateŵete Chiuta mwauneneska achitanji pa nkhani yakusopa kwauneneska? (b) Kumbi tosi tikhumbika kujifumba fumbu wuli?

⁴ Tiwonga vo Yehova wachita kuti tije nayu pa ubwezi. Ndichu chifukwa chaki titchukisa zina laki ndi kumulumba chifukwa wakutipaska sembi yaku Yesu. Nchinthu chakukondwesa ukongwa kuti Akhristu auneneska akujumpha 8 miliyoni atumbika Yehova mazuŵa nganu. Mwakupambana ndi ŵanthu amuvisopa vinyaki wo akamba kuti amutumbika Chiuta asani aluta kuchanya, Akaboni aku Yehova wosi aziŵa kuti akhumbika kutumbika Chiuta sonu, penipanu pacharu chapasi.

⁵ Asani tichita viyo, ndikuti tilondo ateŵeti akugomezgeka aku Yehova wo akonkhoskeka pa lemba la Sumu 99:1-3, 5. (Ŵerengani.) Lemba ili likamba kuti Mosese, Aroni ndi Samuele awovyanga ndi mtima wosi kusopa kwauneneska. (Sumu 99:6, 7) Mazuŵa nganu, Akhristu akusankhika wo ŵeche pacharu chapasi, nawu atovya ndi mtima wosi kusopa kwauneneska ŵendendaluti kuchanya. Akhristu anandi ‘ambereri zinyaki’ atovyana nawu. (Yoh. 10:16) Chinanga kuti alindizga vinthu vakupambana, wosi asopa Yehova panu pasi, ngo ndi malu ngakukandapu malundi ngaki. Weyosi wangachita umampha kujifumba kuti, ‘Kumbi ndikoliyana ndi vo Yehova wakunozga pa nkhani yakusopa kwauneneska?’

6, 7. Kumbi Akhristu a m’nyengu ya akutumika angukumana ndi suzgu wuli, nanga nchinthu wuli chinguchitika pati pajumpha vyaka vinandi?

⁶ Pati pajumpha nyengu mpingu wachikhristu wati wapangika, ŵanthu ampatuku angwambapu. (Mac. 20:28-30; 2 Ŵat. 2:3, 4) Mwaviyo, penga pakusuzga kuziŵa wo asopanga Chiuta mwauneneska. Pati pajumpha vyaka vinandi, Yehova wangwamba kunozga vinthu mwakugwiriskiya ntchitu Yesu Khristu. Chiuta wanguchita ivi Yesu wati wayamba kuwusa.

⁷ Mu 1919, ŵanthu wo asopanga Yehova mwauneneska anguziŵika. Yiwu anguyengeka kuti ateŵete Chiuta mo iyu wakhumbiya. (Yes. 4:2, 3; Mal. 3:1-4) Ndipu vo wakutumika Paulo wanguwona vingwamba kufiskika.

8, 9. Konkhoskani vinthu vitatu vo “paradayisu” yo Paulo wanguwona wang’anamuwa.

⁸ Vo Paulo wanguwona visanirika pa lemba la 2 Ŵakorinte 12:1-4. (Ŵerengani.) Paulo wangukamba kuti vo wanguwona venga uvumbuzi. Iyu wanguwona vo vazamuchitika kunthazi. Kumbi “paradayisu” yo Paulo wanguwona wang’anamuwanji? Chakwamba, wangang’anamuwa vitumbiku vakuliŵavu vo tazamulonde m’charu chifya. (Luka 23:43) Chachiŵi, wangang’anamuwa vitumbiku vinandi vauzimu vo tazamulonde m’charu chifya. Ndipu chachitatu, wangang’anamuwa vinthu vamampha vo vamuchitika kuchanya mu “paradayisu waku Chiuta.”​—Chiv. 2:7.

⁹ Nchifukwa wuli Paulo wangukamba kuti ‘wanguvwa mazu ngo munthu wangangakonkhoska  cha ndipuso ngo munthu wazomerezgeka cha kungakamba’? Wangukamba viyo chifukwa nyengu yenga yechendakwani kuti wakonkhoski vinthu vamampha vo wanguwona. Kweni mazuŵa nganu, te akuzomerezgeka kukamba vitumbiku vo Chiuta watitipaska.

10. Kumbi mazu ngakuti “paradayisu wauzimu” ndi ngakuti “kusopa kwauneneska” ngapambana wuli?

¹⁰ Kanandi gulu laku Yehova likamba za “paradayisu wauzimu.” Mazu yanga ngang’anamuwa ubwezi wo tenawu ndi Chiuta kweniso Akhristu anyidu. Kweni mazu ngakuti “paradayisu wauzimu” ndi ngakuti “kusopa kwauneneska” ngapambana. Kusopa kwauneneska ndi nthowa yo Chiuta wanozga kuti timusopengi mwauneneska. Penipo Paradayisu wauzimu watitiwovya kuziŵa ŵanthu wo ateŵete Chiuta mwauneneska mazuŵa nganu.​—Mal. 3:18.

11. Kumbi ndi mwaŵi wuli wo tenawu chifukwa chakuja mu paradayisu wauzimu?

¹¹ Vakukondwesa ukongwa kuti kwambiya mu chaka cha 1919, Yehova wazomerezga ŵanthu ambula urunji kuti agwirengi nayu ntchitu yakwambisa ndi kusazgiyaku paradayisu wauzimu pacharu chapasi. Kumbi namwi muchitaku ntchitu iyi? Kumbi mulutirizgengi kuteŵete limoza ndi Yehova kuti “malu ngakuŵikapu malundi” ngaki ngatumbikiki?

12. Mwakukoliyana ndi lemba la Yesaya 60:17, kumbi tosi tisimikizganji? (Wonani chithuzi cho che papeji 7.)

¹² Kusintha kwa gulu laku Yehova kukukambika kali pa lemba la Yesaya 60:17. (Ŵerengani.) Anamana ndi wo ayamba sonu uneneska aŵerengapu za kusintha uku pamwenga achita kuvwa kwa anyawu. Kweni abali ndi azichi wo awona kusintha uku mbamwaŵi ukongwa. Yiwu mbakusimikizga kuti Yehova walongozga gulu Laki kuporote mwaku Yesu, Fumu yo iyu wakusankha. Aziŵa kuti vo agomezga vauneneska ndipu nasi tiwona so viyo. Asani mungavwa vo akamba, chivwanu chinu chingakho ndipu mungayamba kumugomezga ukongwa Yehova.

13. Kumbi lemba la Sumu 48:12-14 lititichiska kuti tichitengenji?

¹³ Kaya taja nyengu yitali wuli mu uneneska, tosi tikhumbika kukambiyaku anyidu vakukwaskana ndi gulu laku Yehova. Vakuziziswa ukongwa kuja mu paradayisu wauzimu m’charu chiheni nge ndi ichi. Titenere kukambiyaku ‘mgonezi wo utuza’ vinthu vakukwaskana ndi gulu laku Yehova ndi paradayisu wauzimu.​—Ŵerengani Sumu 48:12-14.

14, 15. Kumbi ndi vinthu wuli vo vingusintha m’ma 1970, ndipu vawovya wuli?

¹⁴ Abali ndi azichi wo ateŵete Chiuta nyengu yitali, awona vinthu vinandi vo vasintha m’gulu laku Yehova. Vinthu ivi vawovya kuti gulu lilutiriyi kutowa. Yiwu aziŵa kuti kuvuli uku mipingu yenga ndi mteŵeti wa mpingu m’malu mwa wupu wa ŵara, vyaru vajanga ndi mteŵeti wa nthambi m’malu mwa Komiti ya Nthambi. Kweniso akumbuka kuti gulu lalongozgekanga ndi pulezidenti wa Watch Tower Society m’malu mwa Wupu Wakulongozga wa Akaboni aku Yehova. Chinanga kuti ŵanthu anyaki aŵawovyanga, kweni munthu yumoza ndiyu walongozganga mpingu, ofesi ya nthambi ndi likulu  lidu. Kwambiya m’ma 1970, gulu lingwamba kulongozgeka ndi wupu wa ŵara m’malu mwa munthu yumoza.

¹⁵ Kumbi kusintha uku kwawovya? Hinya. Chifukwa wuli? Chifukwa asinthanga asani avwisa umampha Malemba. M’malu mwakuti munthu yumoza ndiyu walongozgengi, zeru za ŵanthu anandi wo Yehova wasankha zitovya kuti vinthu viyendengi umampha m’gulu.​—Ŵaef. 4:8; Nthanthi 24:6.

16, 17. Kumbi ndi vinthu nivi vo vasintha mazuŵa nganu vo vitikukondweskani, nanga nchifukwa wuli?

¹⁶ Vinthu vasintha so ukongwa mazuŵa nganu. Mwakuyeruzgiyapu, gulu lasintha mo mabuku ngidu ngawoneke, nkhani zaki, kweniso nthowa zakugaŵiya. Vakukondwesa ukongwa kugaŵiya mabuku ngakovya ndipuso ngakutowa mu uteŵeti. Asani tigwiriskiya ntchitu nthowa zasonu pakupharazga nge webusayiti yidu ya jw.org, ndikuti tilondo Yehova yo wakhumba kuti ŵanthu wosi aziŵi uneneska.

¹⁷ Tikondwa so ukongwa chifukwa chakusintha kwa nyengu ya maunganu. Kusintha uku kwatiwovya kuti tije ndi nyengu yinandi yakuchitiya Kusopa kwa Pabanja ndi kusambira Bayibolu pakutija. Unganu wadera ndi wachigaŵa navu vasintha. Mwaviyo, tiwona kuti chaka ndi chaka vinthu vija vamampha kuluska kali. Tikondwa ukongwa kusambira vinthu vinandi musukulu zo ze m’gulu laku Yehova. Tiwona kuti Yehova ndiyu walongozga kusintha uku. Iyu walutirizga  kutowesa gulu laki ndi paradayisu wauzimu yo tilimu.

18, 19. Kumbi tingachita wuli kuti paradayisu wauzimu walutiriyi kutowa?

¹⁸ Te ndi mwaŵi ukulu kuti nasi tiwovyaku kuti paradayisu wauzimu waje wakutowa ukongwa. Tichita viyo asani tipharazga uthenga wamampha wa Ufumu ndi kusambiza ŵanthu anandi. Asani tawovya munthu kuti wabatiziki, ndikuti tasazgiyaku paradayisu wauzimu.—Yes. 26:15; 54:2.

¹⁹ Tingawovya so kuti paradayisu walutiriyi kutowa asani nyengu zosi titesesa kuja ndi nkharu yamampha. Asani tichita viyo, ŵanthu anandi atitikhumbira. Kukamba uneneska, nkharu yamampha ndiyu yichitiska ŵanthu kuti azi m’gulu ndi kuja pa ubwezi ndi Chiuta kweniso Khristu.

20. Mwakukoliyana ndi lemba la Nthanthi 14:35, kumbi titenere kuchitanji?

²⁰ Yehova ndi Yesu atenere kuti akondwa ukongwa asani awona paradayisu wakutowa mazuŵa nganu. Tikondwa kugwira ntchitu yakutowesa paradayisu wauzimu. Ivi vilongo kuti m’charu chifya tazamukondwanga ukongwa kugwira ntchitu yakunozga charu kuti chije paradayisu. Titenere kuŵanaŵaniya lemba la Nthanthi 14:35 lo likamba kuti: “Fumu yikondwa ndi wantchitu yo wachita vinthu mwazeru.” Mwaviyo, tiyeni tilutirizgi kuchita vinthu mwazeru po titesesa kutowesa paradayisu wauzimu.